Botshelo le Bodihedi tsa ga Jesu

Go Itatola kwa Lolwapeng lwa Kgotla

FA BA sena go tlogela Jesu kwa tshimong ya Gethesemane mme ba tshaba ka ntlha ya poifo, baaposetoloi ba bangwe, Petere le Johane ba a ema. Gongwe ba kopana le Jesu fa a isiwa kwa ntlong ya ga Anase. Fa Anase a mo romela kwa go Moperesiti yo Mogolo Kaiafase, Petere le Johane ba mo sala morago mme ba tsamaela kwa moragonyana, gongwe ba sa itse gore ba ka dira eng ka ba ne ba boifa gore ba tla baya matshelo a bone mo kotsing le ka ba ne ba amegile thata ka seo se tlileng go diragalela Mong wa bone.

Fa ba goroga kwa legaeng le legolo la ga Kaiafase, Johane o kgona go tsena mo lolwapeng lwa kgotla, ereka moperesiti yo mogolo a mo itse. Lefa go ntse jalo, Petere o sala a eme kwa ntle kwa mojako. Mme go ise go e kae Johane o a boa mme o bua le motho yo o disang mojako, ebong mosetsana wa motlhanka, mme Petere o letliwa go tsena.

Jaanong go setse go le tsididi, mme ba ba dirang mo ntlong le maotlana a moperesiti yo mogolo ba goditse molelo wa magala. Petere o tla go ikomosa fa go bone fa a ntse a letile go utlwa gore tsheko ya ga Jesu e feletse jang. Fa a le koo, mo leseding la molelo oo, motlhokomedi wa kgoro yo a neng a letlile Petere go tsena o kgona go mmona sentle. “Le wèna u nu u na le Yesu oa Mogalilea,” o tlhaeletsa jalo.

A shakgaditswe ke go supiwa gore ke mang, Petere o itatola fa pele ga bone botlhe gore ga a ise a ko a itse Jesu. “Ga ke itse, leha e le go tlhaloganya se u se buañ,” o bolela jalo.

Fa a rialo, Petere o tswela kwa ntle gaufi le tsela e e yang kwa kgorong. Fa a le koo, mosetsana mongwe gape o a mmona mme le ene o raya ba ba emeng foo a re: “Monna eo le èna, o na a na le Yesu oa Monasara.” Petere o itatola gape a ikana a re: “Ga ke mo itse, monna eouō.”

Petere o nna a ntse a le mo lolwapeng loo lwa kgotla, a leka go dira gore a se ka a lemogiwa ka gope. Gongwe eno ke yone nako eo a neng a tsibosiwa ke go lela ga mokoko mo lefifing la moso. Ka nako eno, tsheko ya ga Jesu e tsweletse, gongwe e tshwaretswe mo karolong ya ntlo e e kwa godimo ga lolwapa lwa kgotla. Gongwe Petere le ba bangwe ba ba letileng kwa tlase ba bona basupi ba ba farologaneng ba ba tlisitsweng go tla go naya bosupi fa ba ntse ba tswa ba tsena.

Go setse go fetile oura fa esale Petere a supiwa fa e le tsala ya ga Jesu. Jaanong ba sekae ba bao ba emeng foo ba tla kwa go ene mme ba mo raya ba re: “Rure o moñwe oa bōnè le wèna; gonne loleme loa gago loa gu shupa.” Mongwe mo setlhopheng seno ke wa losika lwa ga Maleko, yoo Petere a neng a kgaola tsebe ya gagwe. “A ga kea gu bōna u na naè kwa tshimoñ?” o bua jalo.

“Ga ke mo itse monna eouō.” Petere o gatelela jalo ka bogale. Ebile o leka go ba tlhatswa pelo gore ba phoso botlhe ka go hutsa le go ikana mo a bileng a bolela gore a welwe ke bomadimabe fa e le gore ga a bue boammaaruri.

Fela fa Petere a sena go itatola laboraro, mokoko o a lela. Mme ka yone nako eo, Jesu yo go lebegang a tswetse fa lolwapaneng lo lo fa godimo ga kgotla, o a retologa mme o a mo leba. Ka bonako fela, Petere o gakologelwa seno seo Jesu a neng a se bua dioura di sekae fela tse di fetileng kwa kamoreng e e kwa godimo: “E tla re koko e tona e se e be e lele gabedi, u tla bo u intatotse gararo.” A utlwisitswe botlhoko ke boleo jo bogolo jono jwa gagwe, Petere o tswela kwa ntle mme o lela botlhoko.

Tota seno se ne se ka diragala jang? Petere o ne a ka itatola Mong wa gagwe gararo ka bofefo jaana ka go latelelana morago ga go tlhomamisa fa a nonofile semoyeng jang? Ga go gakgamatse gore maemo ano a ne a wela Petere a sa lemoge. Boammaaruri bo a sokamisiwa mme Jesu o bolelwa e le senokwane fela se se tshwanang le botlhe. Se se siameng se dirwa gore se lebege se le phoso, yo o senang molato o pegwa molato. Ka jalo ka ntlha ya kgatelelo ya nako eno, Petere o a fekeediwa. Ka bonako fela tsela eo a ntseng a itse sentle gore o tshwanetse a ikanyega ka yone e a senyega. O remega ditokololo ka ntlha ya go boifa motho. A seo le ka motlha se se ka sa re diragalela! Mathaio 26:57, 58, 69-75; Mareko 14:30, 53, 54, 66-72; Luke 22:54-62; Yohane 18:15-18, 25-27.

▪ Petere le Johane ba kgona jang go tsena ka kgoro ya lolwapa lwa kgotla ya moperesiti yo mogolo?

▪ Fa Petere le Johane ba le mo lolwapeng lwa kgotla, go diragala eng mo ntlong?

▪ Mokoko o lela ga kae, mme Petere o itatola gore ga a itse Keresete ka go latelelana jang?

▪ Petere o kaya eng fa a hutsa le go ikana?

▪ Ke eng se se dirang gore Petere a itatole gore o itse Jesu?