Ikaege Ka Maatla A A Tswang mo Modimong
Dintlhakgolo go Tswa go Timotheo wa Bobedi
JEHOFA o naya batlhanka ba gagwe maatla a go itshokela diteko le pogiso. Mme abo Timotheo le Bakeresete ba bangwe ba ne ba tlhoka maatla a a tswang kwa Modimong jang ne! Roma e ne ya jewa ke molelo ka 64 C.E., mme magatwe a ne a bolela gore e ne e tshubilwe ke Mmusi Nero. O ne a itshireletsa ka go pega Bakeresete molato, mme seno go lebega se ne sa lere pogiso. Go lebega moaposetoloi Paulo a ne a le mo kgolegelong gape kwa Roma ka nako eo (mo e ka nnang ka 65 C.E.). Lemororo a ne a lebane le loso, o ne a kwalela Timotheo lekwalo la bobedi ka nako eo.
Lekwalo la ga Paulo le ne la thusa Timotheo gore a ipaakanyetse go ganetsa batenegi mme a nne a nonofile le fa a bogisiwa. Le ne le mo kgothaletsa go nna a dira botswelelopele jwa semoya le go mmolelela ka maemo a ga Paulo mo kgolegelong. Lekwalo leno gape le thusa babadi go ikaega ka maatla a a tswang mo Modimong.
Itshokele Pogiso mme O Rute Ka Bonolo
Modimo o re naya maatla a go itshokela pogiso jaaka baboledi ba mafoko a a molemo. (1:1-18) Paulo ga a ise a ko a lebale le ka motlha go rapelela Timotheo, mme o ne a gakologelwa tumelo ya gagwe e e seng ya boitimokanyi. Modimo o ne o sa naya Timotheo “mōea oa bogatlapa, ha e se oa nonohō le oa loratō le oa mogopolō o o tlhōmameñ.” Ka jalo a se ka a tlhajwa ke ditlhong go neela bosupi le fa a bogisediwa mafoko a a molemo. O ne a kgothalediwa gape “go tshegetsa sekaō sa mahoko a a molemō” ao a neng a a utlwile mo go Paulo, fela jaaka le rona re tshwanetse go kgomarela boammaaruri jwa mmatota jwa Bokeresete lemororo ba bangwe ba bo tlogela.
Dilo tseo Paulo a neng a di ruta di ne di tshwanetse go bewa mo magetleng a banna ba ba ikanyegang bao ba neng ba tla di ruta ba bangwe. (2:1-26) Timotheo o ne a kgothalediwa go nna lesole le le molemo tota la ga Keresete, a ikanyega fa a bogisiwa. Paulo ka boene o ne a boga mo kgolegelong ka ntlha ya go rera mafoko a a molemo. O ne a kgothaletsa Timotheo go dira bojotlhe jwa gagwe go itshupa e le modiri yo o amogelwang ke Modimo, a tila dipuo tse di lolea tseo di ganetsang se se boitshepo. Mme o ne a bolelelwa gore motlhanka wa Morena o tshwanetse go kaela ba bangwe ka bonolo.
Rera Lefoko!
Maatla a a tswang kwa Modimong a ne a tla tlhokega go lebana le metlha eno ya bokhutlo le go tshegetsa boammaaruri jwa Dikwalo. (3:1-17) Go ne go tla nna le banna bao “ba nntseñ ba ithuta, me ba sa nonoha gopè go hitlha mo kicoñ ea boamarure” ba tswa mo banneng bao eseng ba bomodimo. “Batho ba ba boshula le batsietsi ba tla nna ba shulahalèla pele hèla ba tsietsa, ba bile ba tsiediwa.” Lefa go ntse jalo, Timotheo o ne a tshwanetse gore ‘a nnele ruri mo dilong tse a di ithutileng.’ Ka jalo le rona re tshwanetse ra dira jalo ka re itse gore “lokwalō loñwe le loñwe [lo] kwadilwe ka tlhotlheleco ea Modimo, lo bile lo molemō go ruta, le go kgalemèla, le go shokolola, le go kaèla ka tshiamō: Gore motho oa Modimo a tlè a nnè boitèkanèlō, a iketleeleletse rure tihō ñwe le ñwe e e molemō.”
Timotheo o ne a tshwanetse go ganana le batenegi mme a wetse bodihedi jwa gagwe. (4:1-22) O ne a ka dira jalo ka go “rèra lehoko” le go nna a le bolokile. O ne a tlhoka go dira jalo gonne phuthego e ne e lebane le “motlha wa mathata,” (NW) gonne bangwe ba ne ba ruta thuto ya maaka. Basupi ba ga Jehofa le bone gompieno ba kgomarela Lefoko la Modimo, ba le ruta mo diphuthegong le mo bathong ba ba kwantle le eleng fa maemo a iketlile. Paulo o ne a “bolokile tumèlō,” lemororo ba bangwe ba ne ba mo latlhile. Mme ‘Morena o ne a ema fa go ene, a ba a mo naya thata; e le gore taetso e tle e bolelwe ka botlalō ka ene.’ A le rona re ikaege ka maatla a a tswang kwa Modimong mme re nne re rere mafoko a a molemo.
[Lebokoso/Setshwantsho mo go tsebe 31]
Lesole Le Le Molemo: Paulo o ne a kgothatsa Timotheo jaana: “U tlhakanèlè bothata le nna, yaka motlhabani eo o molemō oa ga Keresete Yesu. Ga go motlhabani opè eo o reñ a le mo ntweñ a be a itlhakatlhakantse le dilō tsa botshelō yono; e be e le gore a kgatlhè èna eo o mo kwadileñ motlhabani.” (2 Timotheo 2:3, 4) Lesole le le neng le tsamaya ka dinao la Moroma ‘le ne le boga tota, fa le ne le rwele ditlhabano tse di bokete, selepe, kgetse, dijo tsa malatsi a le mararo, le dilo tse dingwe. (Josephus’ Wars of the Jews, Book 3, kgaolo 5) Le ne le sa batle dilo dipe fela tsa kgwebo, gonne seo se ne se ka se itumedise baokamedi ba lone ba ba neng ba duelela ditshenyegelo tsa lone. Ka mo go tshwanang, Mokeresete le ene o a boga ka ntlha ya diteko tse di amanang le go nna “motlhabani eo o molemō oa ga Keresete.” Lemororo a ka bo a dira tiro nngwe eo a itshedisang ka yone gore a diragatse boikarabelo jwa gagwe jwa Dikwalo, ga a tshwanela go letla go amega gope fela ga gagwe ka dilo tse di bonalang go mo thibela go lwa ntwa ya semoya. (1 Bathesalonia 2:9) O dirisa “chaka ea Mōea, e e leñ lehoko ya Modimo,” fa a tsamaya ka ntlo le ntlo, mme o thusa go golola batho mo dilong tse di phoso tsa bodumedi. (Baefeso 6:11-17; Yohane 8:31, 32) Ereka matshelo a le mo kotsing, a masole otlhe a Bakeresete a nne a itumedise Jesu Keresete le Jehofa Modimo ka tsela eno.