Nnang Lo Itekanetse mo Tumelong!
Dintlhakgolo go tswa go Tito
DIPHUTHEGO tsa Bakeresete kwa setlhaketlhakeng sa Mediterranean sa kwa Kereta di ne di tlhoka go tlhokomelwa semoyeng. Ke mang yo o neng a ka kgona go ba thusa? Ebu, e ne e le modiri mmogo le Paulo ebong Tito! O ne a le pelokgale, a tshwanelegela go ruta, a tlhoafetse mo ditirong tse di molemo, ebile a itekanetse mo tumelong.
Paulo o ne a etela Kereta mo nakong e e fa gare ga go tsenngwa ga gagwe lekgetlo la ntlha mo kgolegelong le go tsenngwa ga gagwe lekgetlo la bobedi kwa Roma. O ne a tlogela Tito kwa setlhaketlhakeng seo gore a sale a siamisa dilo dingwe le gore a tlhophe bagolwane ba phuthego. Tito gape o ne a tshwanetse go ya go kgalemela baruti ba maaka le gore a tlhome sekao se se molemo. Sotlhe seno se tlhalosiwa mo lekwalong la ga Paulo a le kwalela Tito, leo go ka tswang le ne le rometswe go tswa kwa Makedonia mo gareng ga 61 le 64 C.E. Fa balebedi ba motlha wa segompieno le badumedi mmogo le bone ba dirisa kgakololo ya ga moaposetoloi seno se ka ba thusa gore ba nne pelokgale, ba nne ba ba tlhoafetseng, le ba ba itekanetseng mo semoyeng.
Ke Eng Seo Se Batlegang mo Balebeding?
Go ne go le botlhokwa gore go tlhophiwe balebedi le gore go rarabololwe mathata mangwe a a masisi. (1:1-16) Gore motho a tlhophiwe jaaka molebedi, o ne a tshwanetse gore a bo a sena mokgobo, a tlhoma sekao se se molemo ka boene mmogo le mo botshelong jwa gagwe jwa lelapa, a kgona go tshola baeng, a le tekatekano, ebile a le boikgapo. O ne a tshwanetse go ruta seo se leng boammaaruri le gore a tlhagise le go kgalemela bao ba bontshang dipono tse di ganetsang. Go ne go tlhokega gore a nne pelokgale ka gonne batho ba ba sa laegang bao ba leng mo diphuthegong tseo ba ne ba tshwanetse ba didimadiwa. Go ne go ntse jalo segolobogolo ka bao ba neng ba ngaparetse fela mo go rupisiweng, ka gonne ba ne ba bodisitse malapa go sa sale ope. Go ne go tlhokega kgalemelo e e maatla fa e le gore diphuthego di ne di tshwanetse go nna di itekanetse mo semoyeng. Gompieno, balebedi ba Bakeresete le bone ba tlhoka bopelokgale gore ba kgalemele le go laya, ka maikaelelo a go aga phuthego.
Dirisa Thuto E E Itekanetseng
Tito o ne a tshwanetse go ruta thuto eo e itekanetseng semoyeng. (2:1-15) Banna ba ba godileng ba ne ba tshwanetse ga nna ba ba tlhomang dikao tse di molemo mo go nneng tekatekano, ba tsaya dilo ka tsela e e masisi, ba le mogopolo o o lekalekaneng, ba na le tumelo, lorato, le boitshoko. Basadi ba ba godileng ba ne ba tshwanetse go nna “masisi mo mokgweñ oa bōnè.” Jaaka “ba ba rutañ batho se se molemō,” ba ne ba ka kgona go thusa basadi ba babotlana gore ba nne le pono e e siameng malebana le ditiro tsa bone jaaka basadi ba ba nyetsweng le bommè. Banna ba ba botlana ba ne ba tshwanetse go nna le mogopolo o o lekalekaneng, mme batlhanka ba ne ba tshwanetse go ineela kafa tlase ga beng ba bone ka mokgwa o o neng o ka kgabisa thuto ya Modimo. Bakeresete botlhe ba ne ba tshwanetse go gana boikepo bongwe le bongwe mme ba tshele ba le tekatekano mo mogopolong mo tsamaisong eno ya dilo fa ba santse ba letetse ponatshegelo e e galalelang ya Modimo le ya ga Jesu Keresete, “eo o re intsheditseñ gore a re rekololè mo tshiamololoñ eotlhe, le gore a intlahaletsè batho ba ba tla nnañ boshwa yoa gagwè, ba ba tlhōahaletseñ ditihō tse di molemō.” Ka go dira kgakololo eno e e itekanetseng, a le rona re ‘kgabise thuto ya Modimo.’
Kgakololo ya ga Paulo e e konelang e tokafatsa botsogo jwa semoya. (3:1-15) Go a tlhokafala gore re bontshe go ineela ka tshwanelo mo babusing le gore re tlhagolele go nna batho bao ba akanyetsang. Bakeresete ba na le tsholofelo ya botshelo jo bo sa khutleng, mme mafoko a ga Paulo a ne a tshwanetse go otlelelwa go ba kgothaletsa gore ba boloke megopolo ya bone mo ditirong tse di molemo. Dipotso tsa boeleele le dikganetsanyo malebana le Molao di ne di tshwanetse go tilwa, motho yo o tsosang lekoko le ene o ne a tshwanetse go sa amogelwe morago ga gore a tlhagisiwe gabedi. Jaaka fa bagolwane ba dirisa kgakololo eno gompieno, bone le badumedi mmogo le bone ba tla nna ba itekanetse mo tumelong.
[Lebokoso/Setshwantsho mo go tsebe 22]
Ba Sa Lemalela Bojalwa: Lemororo basadi ba sa tshwanela go ruta banna mo phuthegong, basadi ba ba godileng ba ka nna ba laya basadi ba babotlana kwa thoko. Mme e le gore ba nne le bokgoni mo ntlheng eno, basadi ba ba godileng ba tshwanetse ba utlwa mafoko a ga Paulo: “Basadi bagolo le bōnè ba nnè masisi mo mokgweñ oa bōnè, e se bapateletsi, ba sa lemalèla boyalwa, e le ba ba rutañ batho se se molemō.” (Tito 2:1-5; 1 Timotheo 2:11-14) Ka ntlha ya go amega kaga seo go nwa go se dirang, balebedi, batlhanka ba bodihedi, le basadi ba ba godileng ba tshwanetse go nna le tekatekano, ba sa nwe bojalwa bobe. (1 Timotheo 3:2, 3, 8, 11) Bakeresete botlhe ba tshwanetse go tila botagwa mme ga ba a tshwanela go nwa dinotagi fa ba dira ‘tiro e e boitshepo’ ya go rera mahoko a a molemo.—Baroma 15:16; Diane 23:20, 21.