A Ruriruri Bibela e Boitshepo?

KE BATHO ba bakae gompieno ba ba lebang Bibela jaaka Lefoko la Modimo le le boitshepo? Mo motlheng ono wa batho ba ba sa itseng melaometheo ya bodumedi ka tlhomamo, bontsi bo e leba jaaka e e ka se kang ya thusa ebile e sa dire gope, ba belaela gore a tota e boitshepo. Le eleng bangwe ba baeteledipele ba ditumelo tsa Labokeresete ba ruta gore Bibela e tletse ka dikgang fela tse di sa reng sepe le ditlhamane. Ba belaela gore ‘a motho ope fela yo o botlhale a ka dumela tsela eo Bibela e tlhalosang hisitori ka yone.’—The Interpreter’s Dictionary of the Bible, Bolumo 2, tsebe 611.

Bakanoki ba maemo a a kwa godimo ba jala dipelaelo tsa gore a tota go siame go leba Bibela jaaka Lefoko la Modimo. Mongwe wa bone o ne a re “fa motho a batla go bua puo ya mofuta wa Lefoko la Modimo, Bibela e tshwanetse go bidiwa Lefoko la Iseraele, Lefoko la Bakeresete bangwe ba bagolo ba ntlhantlha.” (The Bible in the Modern World, e e kwadilweng ke James Barr) Wena o akanya jang? A Bibela ke Lefoko la Modimo? A ruriruri e boitshepo?

Ke Mang Yo O Kwadileng Bibela?

Buka ya ntlha ya Bibela eleng ya Genesise, ka tlwaelo fela go bolelwa fa e kwadilwe ke Moshe, Mohebera yo a neng a tshela dingwaga di le 3 500 tse di fetileng. Go ya ka Bibela ka boyone, Dikwalo tse dingwe tsotlhe di ne tsa kwalwa ke banna ba ba ka nnang 40 ba ba tswang mo maemong a a farologaneng a botshelo, mme go ne ga felela ka gore go nne le dibuka, kana dikarolwana tsa Bibela di le 66. Lefa go ntse jalo, banna bano ba ne ba sa itebe gore ke bone tota ba ba kwadileng Bibela. Mongwe wa bakwadi o ne a bolela jaana: ‘Lokwalo longwe le longwe lo kwadilwe ka tlhotlheletso ya Modimo.’ (2 Timotheo 3:16, NW) Mongwe o ne a kwala jaana ka bao ba kwadileng Bibela: “Go bua ga batho ga cwa mo Modimoñ, ka ba tlhotlhelediwa ke Mōea o o Boitshèpō.”—2 Petere 1:21.

Seno se baya bakwadi bano mo maemong a batshwari ba pene fela, kana bakwaledi, ba ba neng ba laolwa, kana ba kaelwa ke Modimo. Go ya ka Bibela, mokwadi gantsi o ne a letlwa go dirisa mafoko a gagwe fa a kwala tshedimosetso e a e neilweng ke Modimo. (Habakuke 2:2) Ke ka lone lebaka leo Bibela yotlhe e kwadilweng ka mekgwa e e farologaneng ya go kwala. Mme Modimo o ne a kaela go kwalwa ga yone ka metlha.

Re ka dumela gore puo ya bakwadi bano ya gore ba tlhotlheleditswe ke Modimo ka boyone ga se bosupi jwa gore Bibela ke molaetsa wa bomodimo o o tswang go Mmopi o o yang mo bathong. Lefa go ntse jalo, lebaka la gore Mogodimodimo ke ene Mokwadi wa Bibela kana nnyaa le tshwanetse go bonala ka phepafalo fela fa buka eno ka boyone e tlhatlhobiwa ka kelotlhoko ebile e le ka kgopolo e e siameng. A Bibela e re naya bosupi jwa gore e kwadilwe ke Modimo? Eleruri, a re ka bua re nonofile gore Bibela e boitshepo?