Baalogi ba Gileade Ba Amogela Mpho ya Tirelo ya Borongwa
KA MARCH 1, 1992, maloko a a 22 a setlhopha se se neng se aloga sa bo 92 sa Sekolo sa Watchtower sa Bibela sa Gileade a ne a amogela mpho—mpho ya tirelo ya borongwa. Fa a ne a bua le setlhopha seno, Lloyd Barry wa Setlhopha Se Se Laolang o ne a bolela jaana: “Ekete lo ka amogela mpho eno e e molemolemo ka boitumelo jo bogolo, lwa ba lwa e dirisa go itumedisa ba bangwe.”
Baeng ba ba laleditsweng ba ka nna 4 662 le maloko a lelapa la Bethele ba ne ba phuthegetse kwa Holong ya Dikopano ya Jersey City, kwa New Jersey, go tla go reetsa thulaganyo ya kaloso. Kwa dikagong tsa New York tsa Mokgatlho wa Watchtower tse di kwa Brooklyn, Wallkill, le kwa Patterson go ne go na le ba bangwe ba le 970 bao ba neng ba golagantswe ka mogala wa thelefone. Botlhe ba ne ba reetsa ka kelotlhoko jaaka fa baalogi ba ne ba neelwa kgakololo la bofelo eo e neng e tla ba thusa gore ba tseele mpho ya tirelo ya borongwa kwa godimo ba bo ba e dirise ka botlhale.
Thulaganyo e ne e simolotswe ka gore go opelwe ka matlhagatlhaga pina 155, e e reng “Cholanañ.” Morago ga moo, botlhe ba ne ba tseega maikutlo fa Frederick W. Franz, yo e leng poresidente e e dingwaga di 98 ya Sekolo sa Gileade, a ne a rapela go tswa mo pelong. Go tswa foo, modulasetulo, Carey Barber wa Setlhopha Se Se Laolang, o ne a amogela botlhe mo thulaganyong ya kaloso a re: “Barongwa ba Gileade ga ba ise ba ko ba tlhokege go feta kafa ba tlhokegang ka gone gompieno jaana.” Fa a sena go akgela jalo, o ne a itsise ka motseletsele wa dipuo tse dikhutshwane tse di mosola tseo di neng di tla latela.
Curtis Johnson wa Komiti ya Legae la Bethele o ne a bua pele, a buelela setlhogo se se reng “Tlhokomela Tshingwana ya Gago Thata.” Mokaulengwe Johnson o ne a umaka gore fa barongwa bano ba basha ba fitlha kwa dikabelong tsa bone, mongwe le mongwe wa bone o tla bo a na le tshingwana ya semoya eo a tshwanetseng go e lema. (1 Bakorintha 3:9) Batho ba ga Jehofa ba ba mo lefatsheng lotlhe ke tshingwana ya semoya e e tlhogang tshiamo le pako fa pele ga merafe yotlhe. (Isaia 61:11) ‘Tsela eo o tla tlhokomelang tshingwana ya gago ya semoya ka yone mo isagweng,’ go ne ga gatelela jalo sebui, ‘e tla ama thata kafa o tla atlegang ka gone mo kabelong ya gago ya borongwa.’ Ke eng se se tla ba thusang go tlhokomela tshingwana ya bone ya semoya? ‘Jehofa o ka nna jaaka lebota le le sireletsang go dikologa tshingwana ya gago ya semoya. Fa e le gore o ikemiseditse go dira ditiro tse di tshwanetseng, nna o atamalane le ene ka thapelo, go tswa foo o bo o dira ditiro tse di dumalanang le dithapelo tsa gago.’
Go ne ga latela Lloyd Barry a bua ka setlhogo se se reng “Itumeleng mo Moreneng ka Metlha Yotlhe.” (Bafilipi 4:4) Ereka a nnile morongwa kwa Japane ka dingwaga tse di fetang 25, o ne a dirisa boitemogelo joo go akantsha baalogi ka dilo tse di mosola tseo di ka ba thusang gore ba itumelele mpho ya tirelo ya borongwa. O ne a re: ‘Lo tlile go lemoga gore boitumelo jo lo nnang le jone mo tirelong ya Modimo bo lo thusa go fenya bontsi jwa dikgatelelo gongwe le mangwe a mathata a botsogo a lo tlileng go kopana le one kwa kabelong ya lona ya borongwa.’ (Diane 17:22) O ne a gakolola baalogi gore ba ka nna ba kopana le maemo a a farologaneng thata le ao ba ntseng ba a tlwaetse. Ba ka nna ba tshwanelwa ke gore ba ithute puo e ntšha. ‘Lo tla tshwanelwa ke go dira ka natla gore lo ithute puo eo. Mme lefa go ntse jalo fa lo setse lo kgona go buisana ka phuthologo le batho ka segabone, seno le sone se tla oketsa boitumelo jwa lona.’
Morago ga foo go ne ga bua Eldor Timm wa Komiti ya Feketori, a tlhalosa setlhogo se se reng “Lebang Fela kwa Mokgeleng.” Mokgele ono ke eng? Botshelo jo bo sa khutleng! Gore re tle re bo bone re tshwanetse ra tlhoma matlho a rona mo go jone. Sebui se ne sa tshwantshanya sa bo sa supa pharologanyo e e fa gare ga Bakeresete ba ba mo lobelong lwa botshelo le batabogi ba dikgaisano tsa atletiki tsa lekgolo la ntlha la dingwaga. Jaaka batabogi, Bakeresete ba tshwanetse gore ba ikatise ka tlhagafalo, ba utlwe melao, ba latlhe merwalo e e boima. Mme lefa go ntse jalo Bakeresete ga ba tshwane le batabogi ba mmatota ka gonne ba mo lobelong lo lo sianwang botshelo jotlhe le gone ba batla mokgele o o nnelang ruri. Ga go nne le mofenyi a le mongwe fela, mme go na le moo botlhe ba ba tabogang lobelo lwa botshelo go fitlha kwa bokhutlong jwa lone ba tla amogela mokgele. Mokaulengwe Timm o ne a konela ka go re: ‘Gore re amogele mokgele wa botshelo, re tshwanetse go nna le kagiso le Jehofa, Monei wa mokgele. Mme gore re nne le kagiso le Jehofa, re tshwanetse go nna le kagiso le bakaulengwe ba rona.’
Go ne ga latela Milton Henschel wa Setlhopha Se Se Laolang a buelela setlhogo se se reng “Kgomotso ya Dikwalo E Re Naya Tsholofelo.” (Baroma 15:4) ‘Mo dikgweding tse tlhano tse di fetileng,’ sebui se ne sa simolola jalo, ‘lo ntse lo tshwaregile ka Bibela. Lo ile lwa dira go ya kafa e laelang ka teng. Lo na le tsholofelo e e nonofileng. Jaaka fa lo ya kwa dikabelong tsa lona, tsweetswee gakologelwang gore ke ka ntlha yang fa tumelo ya lona e nonofile thata jaana. Ke ka gonne lo ile lwa dira go ya kafa Dikwalo di laelang ka teng.’ Sebui se ne sa naya sekai sa pego ya Bibela eo e nayang tsholofelo, ka go lebisa go Baatlhodi kgaolo 6 go ya go kgaolo 8, tseo di begang kafa Gideone a neng a romiwa ka gone gore a golole Iseraele mo kgatelelong ya Bamidiana. Fa a sena go bua ka pego eno le kafa e leng botlhokwa ka gone mo motlheng wa rona, o ne a re: ‘Fa o nna le tshono ya go dira go ya kafa Dikwalo di laelang ka teng le go akanya kaga dilo tseno, go a go lapolosa. Go dira gore o nne pelokgale.’
Botlhe ba ne ba šwegašwega go utlwa gore batlhatlheledi ba babedi ba bagolo ba sekolo seno ba ne ba tla neela baithuti kgakololo efe ya bofelo. Go ne ga bua Jack Redford pele a bua ka setlhogo se se reng “Dira Selo Se Se Tshwanetseng.” O ne a gakolola baalogi jaana: ‘Kwa Gileade lo ne lwa thapisiwa fela thata kaga gore ke eng se se tshwanetseng go ya ka Dikwalo. Jaanong lo ya kwa dikabelong tse di gwetlhang tsa borongwa. Ebile re a itse gore lo ka nna lwa kopana le mathata a a boima fa lo ntse lo tsweletse pele. Go sa kgathalesege seno, ebile go sa kgathalesege tsela eo lo ikutlwang ka yone, re a itse gore lo ka dira se se tshwanetseng.’ Ba tla thusiwa ke eng? Selo sa ntlha, go leba ba bangwe ka tsela e e tshwanetseng. Sebui se ne sa re: ‘Lo se ka lwa solofela boitekanelo mo bathong ba ba sa itekanelang.’ Go leba maemo a a tsosang diteko ka tsela e e tshwanetseng le gone go ka thusa. ‘Mo botshelong rotlhe re na le nako e dilo di re tsamaelang sentle ka yone le nako e dilo di sa re tsamaeleng sentle ka yone,’ o ne a rialo. ‘Mongwe le mongwe a ka kgona go dirisana le boemo fa dilo di mo tsamaela sentle. Tsela eo o dirisanang le boemo ka yone fa dilo di sa go tsamaele sentle ke yone e tla supang gore a o tla itshoka mo tirelong ya borongwa.’—Yakobe 1:2-4.
Mokwadisi wa sekolo ebong Ulysses Glass, o ne a tlhopha setlhogo se se reng “Re Ka Solofela Eng mo Isagweng?” O ne a kgothaletsa baalogi gore ba boloke tsholofelo ya bone e phatsima, a bua jaaka Rre. (Diane 13:12) ‘Ga go motlhofo go lemoga fa o simolola go felelwa ke tsholofelo,’ o ne a tlhalosa jalo. ‘Maemo a ka dira gore re akanye thata kaga dilo tse di re amang ka namana go na le go akanya thata kaga dilo tse di amang kamano ya rona le Modimo. Re ka nna ra lwala kana ra bona ekete ba bangwe ga ba re tshware sentle. Bangwe ba ka nna ba bo ba na le dilo tse di bonalang di le dintsi go re feta kana ba nna le matswela a a gaisang a rona mo bodiheding, mme re ka nna ra fufega go se kae. Fa re ka letla dilo tseno gore ka iketlo di age mo megopolong ya rona, e tla re go ise go ye kae tsholofelo ya Bogosi e tla fela mo pelong le mo mogopolong wa rona, mme re ka nna ra bo ra kgaotsa go itshoka mo lobelong lwa botshelo.’ Go ka dirwa eng? ‘Gore re tle re tsosolose tsholofelo ya rona go tlhokega gore re tseye kgato. Re tshwanetse ra tlatsa megopolo ya rona le dipelo tsa rona ka ditsholofetso tsa Modimo tsa mmannete mme re tlhome megopolo ya rona kwa Bogosing jwa Modimo jo e leng jwa mmatota. Gape re tshwanetse go boela ra buisana le Jehofa, ka gonne seno eleruri se tla re itumedisa.’
Karl Klein wa Setlhopha Se Se Laolang o ne a neela puo ya kaloso. Setlhogo sa gagwe se ne se re “Ke Ka Ntlha Yang fa O Tshwanetse go Ikokobetsa?” Mme karabo ya potso eo ke efe? ‘Ka gonne ke sone selo se se tshwanetseng go dirwa ebile go siame go se dira, selo se go leng botlhale e bile go bontsha lorato go se dira,’ o ne a tlhalosa jalo mo mafokong a gagwe a ntlha. Bareetsi ba ne ba kgatlhega thata fa a tlhalosa dikai tse nne tsa batho ba ba neng ba ikokobeditse tseo go leng molemo gore re di etse: (1) Jehofa Modimo, yo eleruri a neng a ikokobeditse fa a ne a dirisana le Aberahame le Moshe (Genesise 18:22-33; Dipalō 14:11-21; Baefesia 5:1); (2) Jesu Keresete, yo o neng a ‘ikokobetsa a bo a nna kutlo go fitlha a swela mo mokgorong wa pogisetso’ (Bafilipi 2:5-8; 1 Petere 2:21); (3) moaposetoloi Paulo, yo o neng a ‘direla Morena ka boikokobetso jotlhe jwa pelo’ (Ditihō 20:18, 19; 1 Bakorintha 11:1); le (4) ‘ba ba re laolang,’ jaaka poresidente wa ntlha wa Mokgatlho, Mokaulengwe Russell, yo o kileng a kwala jaana: “Tiro eno e Morena a ileng a itumelela go dirisa dinonofo tsa rona tsa maemo a a kwa tlase mo go yone ga e a ka ya nna go tlhama mme e ile ya nna go aga sesha, go baakanya, go dira gore go nne le kutlwano.” (Bahebera 13:7) Mokaulengwe Klein o ne a tlhalosa mabaka a mangwe a a nonofileng a go bo re tshwanetse go ikokobetsa. Kwantle ga pelaelo, go reetsa kgakololo ya gore ba ikokobetse go tla thusa baalogi gore ba dirise mpho ya tirelo ya borongwa ka botlhale!
Fa a sena go akgela jalo, modulasetulo o ne a itsise madume ao a neng a amogetswe go tswa kwa dikarolong tse di farologaneng tsa lefatshe. Jaanong e ne e le nako ya gore baalogi ba amogele dipoloma tsa bone. Ba ne ba tswa kwa dinageng tse supa—Canada, Finland, Fora, Mauritius, Netherlands, Sweden, le United States. Mme lefa go ntse jalo dikabelo tsa bone tsa borongwa di ba isa kwa dinageng tse 11—Bolivia, Estonia, Grenada, Guatemala, Honduras, Hungary, Mauritius, Peru, Togo, Turkey, le Venezuela.
Morago ga sebakanyana sa go ikhutsa, thulaganyo ya thapama e ne ya simolola ka Thuto e e khutshwafaditsweng ya Tora ya Tebelo eo e neng e tshwerwe ke Joel Adams wa Komiti ya Lephata la Tirelo. Morago ga moo, baalogi ba ne ba neela dipontsho tsa mangwe a maitemogelo ao ba neng ba nna le one mo nakong ya fa ba le mo sekolong. La bofelo, go ne ga nna le terama eo e ileng ya sedimosa bareetsi botlhe, go akaretsa le baalogi e e neng e re Ke Ka Ntlha Yang Fa O Tshwanetse go Tlotla Thulaganyo ya Bolegodimo?
Eleruri, baalogi bano ba ile kwa dikabelong tsa bone tsa kwa dinageng di sele ba gakolotswe le go kgothadiwa ka ditsela tseo di tla ba thusang go dirisa mpho ya tirelo ya borongwa eseng gore e ba itumedise ka bobone fela mme gape le gore e itumedise ba bangwe.
[Tšhate mo go tsebe 22]
Dipalo tsa Tlelase
Palo ya dinaga tse ba tswang kwa go tsone: 7
Palo ya dinaga tse ba rometsweng kwa go tsone: 11
Palogotlhe ya baithuti: 22
Palogare ya dingwaga tsa bone: 33,4
Palogare ya dingwaga tsa bone ba le mo boammaaruring: 16,7
Palogare ya dingwaga tsa bone ba le mo bodiheding jwa nako e e tletseng: 11,8
[Setshwantsho mo go tsebe 23]
Tlelase ya bo 92 E E Alogang ya Sekolo sa Watchtower sa Bibela sa Gileade
Mo lenaaneng le le fa tlase fano, mela e badilwe go tswa kwa pele go ya kwa morago mme maina a kwadilwe go tswa kafa molemeng go ya kafa mojeng wa mola mongwe le mongwe.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.