Ke Ka Ntlha Yang Fa Basupi Ba Nnela go Etela Batho?
‘BA A bo ba tla gape! Mme ba ne ba le fa mo dibekeng di sekae fela tse di fetileng!’ A o setse o akanya ka seo fa mongwe wa Basupi ba ga Jehofa a go etela? Batho ba le bantsintsi gompieno ba etelwa ke Basupi ba ga Jehofa ka metlha. O ka nna wa ipotsa gore, Ke ka ntlha yang fa ba nnela go tla le mororo ba itse gore bontsi jwa batho ba na le bodumedi jwa bone kana ga ba kgatlhege? Potso eo e tlhoka karabo.
Boikarabelo jwa Bone Fa Pele ga Modimo
Basupi ba ga Jehofa ba ithutile mo Dikwalong gore fa e sa le ka 1914, ngwaga wa fa Ntwa ya Lefatshe I e ne e simologa, ditiragalo tsa lefatshe di ntse di diragatsa boperofeti jwa Bibela malebana le bokhutlo jwa tsamaiso eno ya lefatshe ya segompieno le puso e e tlang ya Bogosi jwa Modimo mo lefatsheng leno. Bothubaki, tshololo ya madi, le letlhoo, tse di setseng di feditse mo e ka nnang lekgolo la dingwaga, go bonala di tlogetse batho ba sena tsholofelo go feta lefa e le leng pele ya gore ba tla bona tharabololo ya mathata a bone mo dipolotiking. Dintwa le borukhutlhi tse di santseng di tlhokofatsa batho ke bosupi jwa gore puso ya motho e paletswe ke go fetola dipelo tsa batho, megopolo le maikutlo. Letlhoo le le sa feleng le le sa leng ka le le gone mo hisitoring le santse le senya kamano e e fa gare ga ditso, merafe, le ditlhopha tsa bodumedi. Seo se ntse jalo mo dikarolong tse di katologaneng tse di jaaka Afghanistan, Afrika Borwa, Bogare Botlhaba, India, Ireland Bokone, le naga e pele e neng e le Yugoslavia. He, ke eng se se tla lereng tharabololo e e tla nnelang ruri?
Ke Eng Se Se Tlhotlheletsang Basupi?
Basupi ba ga Jehofa ba lemoga gore tharabololo ya Modimo—ka puso ya Bogosi jo a bo solofeditseng ka Keresete Jesu—ke yone fela tharabololo e e molemo. Tota le Jesu o ile a rapelela puso ya Bogosi joo mo thapelong ya gagwe ya sekao e e tumileng thata: “Rra echo eo o kwa legodimoñ, Leina ya gago a le itshepisiwè. Bogosi yoa gago a bo tlè. Go rata ga gago a go dihwè mo lehatshiñ yaka kwa legodimoñ.” Basupi ba dumela gore thapelo eno tota e kopa Modimo gore a tsene dikgang tsa batho ka bogare.—Mathaio 6:9, 10.
Ka jalo ke ka ntlha yang fa Basupi ba ga Jehofa ba ikutlwa go tlhokega gore ba tsamaye ka ntlo le ntlo ka metlha gore ba leke go isa molaetsa oo? Ka ntlha ya ditaolo tse pedi tse Jesu a neng a di gatelela: “U ratè Yehofa Modimo oa gago ka pelo eotlhe ea gago, le ka mōea otlhe oa gago, le ka tlhaloganyō eotlhe ea gago. E ke eōna taolō e kgolo le ea ntlha. Me e ñwe ea bobedi e e chwanañ naeō ke e, U ratè oa ga eno yaka u ithata.”—Mathaio 22:37-39.
Basupi ba batla go segofadiwa ke Modimo, mme ka gonne ba rata baagisani ba bone, ba batla gore le bone ba segofadiwe ka mo go tshwanang. Ka gone, ka go latela sekao sa ga Jesu, ba ikutlwa ba patelediwa ke lorato le le senang bopelotshetlha gore ba etele baagisanibabone. Ba batla gore bogolo ba nne le sebaka sa go itse se ‘Modimo o o itumetseng’ o se solofeditseng batho ba ba kutlo mo lefatsheng le le phepafaditsweng.—1 Timotheo 1:11; 2 Petere 3:13.
Morongwa wa Mokeresete e bong Paulo o ne a dumela mo ditsholofetsong tsa Modimo mme ke ka moo a neng a kwala jaana: “Ke nna Paulo, motlhanka oa Modimo, le moaposetoloi oa ga Yesu Keresete, kaha tumeloñ ea baitsheñkedwi ba Modimo, le kaha kicoñ ea boamarure e e kaha poihoñmodimo, mo choloheloñ ea botshelō yo bo sa khutleñ, yo Modimo, o o sa kakeñ oa aka, o bo sholoheditseñ batho pele ga metlha e e senañ tshimologō.” Ee, Modimo, “o o sa kakeñ oa aka,” o ‘solofeditse’ bao ka boikokobetso ba batlang go mo itse le go mo direla, botshelo jo bo sa khutleng.—Tito 1:1, 2; Sefania 2:3.
A Basupi Ba A Duelwa?
Ka dinako tse dingwe, bangwe ba ile ba bolela gore Basupi ba duelelwa bodihedi jwa bone. Seno ga se boammaaruri! Ba tsaya mafoko ano a ga Paulo ka tsela e e masisi fa a ne a kwalela phuthego ya Korintha: “Ga re etse ba bantsi, ba ba bapalañ ka lehoko ya Modimo: me re bua mo go Keresete yaka e le ka bopeloephèpha, yaka e le ka Modimo, yaka e le mo ponoñ ea Modimo.”—2 Bakorintha 2:17.
Baeteledipele bangwe ba bodumedi ba a rera gore ba tle ba duelwe, e ka tswa ba duelelwa ditirelo tsa bodumedi kana go rotloetsa ditiro tsa kgwebo mo ditirelong tsa bone tsa thelebishene. Bontsi jwa ditumelo di na le baruti ba ba duelwang.
Se se fapaaneng le seo, Basupi ga ba na baruti ba ba duelwang, e bile gantsi dibuka tsa bone tsa Bibela ba di neela batho ba ba batlang boammaaruri ka bopeloephepa mahala, ntswa ba le bantsi ba bone ba tlhotlheletsega go ntsha meneelo ka go rata. E dirisediwa go duela ditshenyegelo tsa tiro eno ya go rera ya lefatshe ka bophara. Go dumalana le kgakololo eno ya ga Jesu: “Lo amogetse hèla, naeañ hèla,” Basupi ba dirisa dithoto tsa bone ka go rata ka go dirisa diura di le dimilionemilione mo tirelong ya Modimo ngwaga le ngwaga, go akaretsa nako le maatla. Ka gone, ba ruta batho ba ba kgatlhegang ka ntlo le ntlo gape ba dirisa dithuto tsa magae tsa Bibela.—Mathaio 10:8; 28:19, 20; Ditihō 20:19, 20.
Mabaka a bontsha gore Basupi ba ga Jehofa ga ba na boikutlo jwa go ipatlela madi, go a batlela diphuthego tse di mo lefelong la bone, kana go a batlela Mokgatlho wa Watch Tower. Ga go na ope wa bone yo o duelelwang go tsamaya ka ntlo le ntlo. He tiro eno e tshegediwa jang ka madi? Ka gore batho ba ba nang le kanaanelo go dikologa lefatshe ba ntshe meneelo ka go rata. Ga go tsewe dikoleke dipe fela.
Kafa go Neela ga Bone Bosupi go Amang Batho ka Teng
A batho ba etse tlhoko bodihedi jwa ntlo le ntlo le go rera ka tsela e e seng ya ka tlwaelo ya Basupi? Bosupi jo bo tswang mo metsweding ya dikgang bo dira gore re arabe potso eo ka ee yo o utlwalang sentle. Basupi ba ga Jehofa ba ntse ba umakiwa mo mananeong a thelebishene le mo dibaesekopong fa go supiwa mongwe yo o kokotang mo ntlong. Go bolelwa ka ga Basupi mo ditshwantshong tsa metlae. Tiro ya bone e e tlhaga e itsege thata mo e leng gore borametlae go dikologa lefatshe ba ile ba bua ka Basupi ba ga Jehofa mo metlaeng ya bone. Di ka nna tsa bonala e kete di a ba sotla, mme gantsi di theilwe mo lebakeng la motheo le le siameng—la gore Basupi ba itsiwe ka go rera ga bone ka ntlo le ntlo ka metlha.—Ditihō 20:20.
Setshwantsho sengwe sa bosheng jaana sa metlae se ne se bontsha monna mongwe a palama thaba a ya go bona “guru [moruti wa Mohindu].” O ne a bolela jaana: “Mpolelele ka dilo tse di gakgamatsang tse di tla diragalang!” “Moruti wa Mohindu” o ne a araba jang? “A re boneng . . . Go tla nna ditlala, dikgogodi tsa bolwetsi, le dithoromo tsa lefatshe. Letsatsi le tla fetolwa lefifi le kgwedi madi.” Motho yo o botsang o ne a botsa jaana: “Dikgang tse di molemo ke dife?” Mme “moruti wa Mohindu” o ne a mo araba jaana: “Modimo o tla phimola dikeledi tsotlhe . . . mme ga go kitla go nna le loso lefa e le bohutsana lefa e le botlhoko!” Moeng o ne a botsa a re: “O itsile jang dilo tseo?” O ne a araba jang? “Ga go na ope yo o ka tilang Basupi ba ga Jehofa!” Mme seo le sone se ka tswa se diragaletse mokwadi yono wa metlae!
Selo sa botlhokwa mo setshwantshong seno le tse dingwe tse di tshwanang le sone ga se go bontsha fela kafa maeto a Basupi a sa kgaotseng ka gone mme gape di bontsha gore molaetsa wa bone o a tshwana. Ka bokhutshwane fela, mokwadi yono o ne a tlhalosa karolo ya konokono ya go neela bosupi ga bone ka ntlo le ntlo a bo a nopola le dikwalo.—Bapisa Mathaio 24:7, 29; Tshenolō 21:3, 4.
Lebaka la go bo bontsi jwa batho ba gana molaetsa wa bone ga go kgobe Basupi marapo kana gone go fokotsa botlhaga jwa bone. Moaposetoloi Petere o ne a tlhagisa jaana: “Mo metlheñ ea bohèlō bashotli ba tla tla ka chotlō, ba tsamaea kaha dithatoñ tsa bōnè, ba re, Polèlō ea choloheco ea go tla ga gagwè e kae? gonne e sa le borara ba rōbala, dilō cotlhe di sa nntse di nntse yaka di nntse di nntse le mo tshimologoñ ea popō.” Go sa kgathalesege seno, Basupi ka go tlhotlhelediwa ke lorato, ba tswelela pele ba etela baagisanibabone mme ba tla dira jalo go fitlha Modimo o fedisa tsamaiso eno e e senyegileng ya gompieno.—2 Petere 3:3, 4.
Jesu o ne a bolela gore mo metlheng ya bofelo, mafoko a a molemo a tshwanetse go rerwa pele. Go tlhatlhoba mo go oketsegileng gore ke ka ntlha yang le gore jang, bona ditlhogo tse pedi tse di latelang.—Mareko 13:10.
[Setshwantsho mo go tsebe 9]
Basupi ba ga Jehofa ga ba na setlhopha sa baruti se se duelwang—botlhe ke badihedi ba ba ithaopileng