Kopano ya “Babaki ba ba Itumetseng”—A o Tla Nna Teng Kwa go Yone?

BOITUMELO! A lefoko leo le utlwala le sa tlwaelega, gongwe e bile le rona, mo nakong eno e e tletseng mathata? Eleruri dipampiri tsa dikgang ga di bue dilo tse di itumedisang di le dintsi. Dintwa tsa semorafe, tlala e e anameng, go tlhoka ditiro, kgotlelo e e kotsi, go sa iketla ga tsa polotiki, bokebekwa—dilo tseno ga se tse di ka itumedisang pelo, a ga go jalo?

Gompieno batho ba le bantsi ba leka go ijesa monate ka sengwe le sengwe se ba ka se kgonang mo botshelong. Mme boitumelo jone? Boitumelo bo ile jwa tlhalosiwa e le “go ipela; go kgana ka boitumelo.” Ga se batho ba le bantsi ba ba nnang le boitumelo jwa boammaaruri, mme fa ba nna najo, gantsi ke ka nakwana fela.

Lefa go ntse jalo, fa Baebele e bolelela pele ka motlha wa rona e ne ya re: ‘Ke gone go bua Morena Modimo jaana, a re: “Bonang, batlhanka ba me ba tla itumela. Bonang, batlhanka ba me ba tla opela ka go thama ga pelo.”’ (Isaia 65:13, 14) Go ka direga jalo jang?

Gore o tle o bone karabo, re go laletsa gore o nne gone kwa go nngwe ya dikopano tsa kgaolo tsa Basupi ba ga Jehofa tse di tla tshwarwang ka 1995. Setlhogo sa dikopano tseno sa re “Babaki ba ba Itumetseng,” mme go tsenwa mahala. Thulaganyo eno ya kopano ya malatsi a le mararo e tla bo e na le dipuo tse di theilweng mo Baebeleng, dipontsho, metlotlo, le tse dingwe tse di oketsegileng. Mo thulaganyong eno yotlhe, kgang e e tla bong e gatelelwa thata e tla bo e le boitumelo.

Dikopano tseno di simologa ka June kwa United States mme di tla tswelela pele mo ditoropokgolong go dikologa lefatshe go fitlha mo masimologong a 1996. Go tshwanetse ga bo go tla nna le nngwe gaufi le wena. Ke eng fa o sa botse Basupi ba ga Jehofa ba ba nnang mo lefelong la lona? Re go laletsa ka lorato gore o nne teng.