Maduo A go Sa Ipone Tsapa

E NE e le mosadi wa Mogerika yo o neng a nna kwa Finikia ka ngwaga wa 32 C.E. Morwadie o ne a lwala thata mme o ne a batla se se ka mo alafang. Fa a sena go utlwalela moeng mongwe yo o neng a etetse kgaolo ya bone—yo go neng go dumelwa gore o ne a na le maatla a go fodisa balwetse—o ne a ikemiseditse gore o tla lala a mmone gore a tle a mo kope thuso.

Fa a sena go kopana le ene o ne a khubama ka mangole, mme a mo kopa jaana: “Nkutlwela botlhoko, Morena, Morwa Dafite; morwadiake o tshwenngwa thata ke mowa o o maswe.” Ka tsela e e ntseng jalo, mosadi wa Mogerika o ne a kopa Jesu gore a fodise morwadie.

A o ka akanya fela gore o ne a tlhoka go nna pelokgale le boikokobetso go le kana kang gore a kgone go dira seno? Jesu e ne e le motho yo o neng a na le thata le seriti mme o ne a boletse gore o ne a sa batle gore ope a itse kwa a teng. O ne a isitse baaposetoloi ba gagwe kwa Finikia gore ba ye go ikhutsa, mme e seng gore ba ye go dira mo gare ga Baditšhaba ba ba sa dumeleng. Mo godimo ga moo, Jesu e ne e le Mojuta mme ene e ne e le Moditšhaba, e bile kwantle ga pelaelo o ne a itse sentle ka tsela e Bajuta ba neng ba bifela baditšhaba ka teng e bile ba sa batle go kopana le bone ka ntlha ya go ba nyatsa. Lefa go ntse jalo, o ne a ikemiseditse go bonela ngwana wa gagwe kalafi.

Jesu le baaposetoloi ba gagwe ba ne ba leka go thibela mosadi yoo gore a se ka a batla thuso ka nako eo. La ntlha, Jesu o ne a se ka a bua sepe le ene. E ne ya re fa mosadi a ntse a tsweletse a lela a sa kgaotse, barutwa ba raya Jesu ba tenegile ba re: “Mo reye a tsamaye, gonne o re tlhaeletsa kwa morago.”

Mme o ne a sa ikaelela go tsamaya a ise a fiwe thuso e a neng a e kopa. Go na le moo, o ne a ikoba fa maotong a ga Jesu, a re: “Morena, a ko o nthuse.”

Fa a ne tlhalosa boikarabelo jwa gagwe jo bogolo mo baneng ba Iseraele, mme gape ka ntlha e nngwe a leka go bona gore o na le tumelo e e kanakang, Jesu o ne a mo tlhalosetsa jaana ka kutlwelobotlhoko: “Ga go a tshwanela fa go ka tsewa dijo tsa bana, [ba Iseraele] tsa latlhelwa dintsa [Baditšhaba].”

Go na le gore a kgopisiwe ke tsela e e sa siamang e a neng a bua ka letso la gagwe ka yone, o ne a tswelela a sa ipone tsapa ka go batla thuso ga gagwe ka go bua jaana: “Ee, Morena; gonne le e leng dintša di tle di je matlhotlhora a a wang mo lomating lwa bojelo lwa beng ba tsone.”

Jesu o ne a duela go sa ipone tsapa ga mosadi wa Mogerika ka go mo akgolela tumelo ya gagwe le ka go mo direla se a neng a se kopa. A o ko o akanye ka fa a neng a itumetse ka teng fa a ne a boela gae mme a fitlhela morwadie a fodile gotlhelele!—Mathaio 15:21-28; Mareko 7:24-30.

Fela jaaka mosadi yoo wa lekgolo la ntlha la dingwaga, re tshwanetse go nna re sa ipone tsapa mo maitekong a re a dirang nako tsotlhe gore re itumedise Jehofa mme a tle a re amogele. Fela jaaka go ile ga direga ka mosadi yo wa Mogerika, Baebele e re tlhomamisetsa gore re tla duelwa fa re sa lape “mo go direng molemo.”—Bagalatia 6:9.

Go sa ipone tsapa ke eng? Ke ka ntlha yang fa re go tlhoka? Ke mabaka afe a a ka nnang a dira gore re latlhegelwe ke nonofo eno, gore re itlhoboge kgotsa re ineele? Re ka solofela go amogela maduo afe fa re sa ipone tsapa go direla Mmopi wa rona le Rraarona, Jehofa?

Dikishinare nngwe e tlhalosa lediri “go sa ipone tsapa” jaaka “go tshwarelela o sa tlogele mo maikaelelong mangwe, mo boemong bongwe, mo sengweng se o batlang go se dira, go sa kgathalesege dikgoreletsi tse di ka nnang teng, ditlhagiso kgotsa dilo tse di busetsang morago. . . . go tswelela o ntse o le teng; go nnela ruri.”

Baebele e gakolola batlhanka ba ga Jehofa ka makgetlho a le mantsi gore ba tswelele ba dira thato ya gagwe ka metlha. Ka sekai, re bolelelwa gore re ‘batle bogosi pele,’ gore ‘se se molemo re se tshware thata,’ gore re “nnele ruri mo thapelong” le gore re “se lapeng” mo go direng molemo.—Mathaio 6:33; 1 Bathesalonika 5:21; Baroma 12:12; Bagalatia 6:9.

Mo botshelong jwa rona jwa letsatsi le letsatsi, rotlhe re tlhoka go nna le nonofo eo ya go sa ipone tsapa le go e tlhagolela gore re tle re kgone go falola. Fa re sena nayo ga re ka ke ra kgona go fitlhelela sepe sa boleng jwa boammaaruri se se nnelang ruri. Akanya ka sekai sa ngwana a leka go ema ka dinao a tsamaya dikgato tsa ntlha tse di reketlang. Ga go a tlwaelega gore lesea le ka ithuta go ema le go tsamaya motlhofo fela ka letsatsi le le lengwe. Rotlhe fa re ne re le bana gongwe re ne ra leka mme ra palelwa ka makgetlho a le mantsi pele ga re feletsa re kgona go tsamaya ka katlego. Go ka bo go ne ga direga eng fa e ne e kare re sena go palelwa ke go tsamaya lekgetlho la ntlha ra bo re sa tlhole re leka? Gongwe re ka bo re ntse re gogoba ka mabogo le mangole a rona! Go sa ipone tsapa go botlhokwa gore motho a kgone go fitlhelela mekgele e e nang le mosola le go oketsa bokgoni jwa gagwe le boitlotlo tse di tsamaelanang le gone. Ke fela jaaka sekapuo sengwe se tlhalosa se re: “Bafenyi ga ba ke ba tlogela mo tseleng, ba ba tlogelang mo tseleng ga ba ke ba fenya.”

Batho ba ba sa bolong go bulatsela ka nako e telele ba lemoga gore motho ga a atlege ka go bo a na le bokgoni jo bo kgethegileng kgotsa ditalente. Go tlhokega gore motho a ngaparele se a se dirang, go ititaya sehuba go dira thato ya ga Jehofa ka botlalo le go nna le bopelokgale jwa go lwantsha dilo tse di ka mo kgoreletsang ka nakwana, le e leng go tshwenyega thata mo maikutlong. Mokgele wa go kopanela ka bosakhutleng mo masegong a Modimo o tshwanetse go nna o ntse o bonala sentle.

Ee, rona rotlhe ba re batlang go amogelwa ke Jehofa e bile re batla go fenya mo lebelong la botshelo re tshwanetse go sa ipone tsapa, go nnela ruri le go itshoka. Fa re sena dinonofo tseno re ka nna ra se ka ra amogelwa ke Jehofa ra bo ra latlhegelwa ke tuelo ya botshelo jo eleng botshelo ruri.—Pesalema 18:20; Mathaio 24:13; 1 Timotheo 6:18, 19.

Gantsi go a thatafala gore Mokeresete a se ka a ipona tsapa mo ditirong tsa gagwe tsa semoya go na le mo dilong tse dingwe tse a tshwanetseng go di dira. Monna o ka nna a tswelela a dira ka thata kwa a berekang teng gore a tlhokomele ba lelapa la gagwe ka dilo tse ba di tlhokang senameng, mme o ka nna a bo a ‘lapile thata’ go ka tshwara thuto ya ka metlha ya Baebele le mosadi wa gagwe le bana. Ke mabaka afe a a dirang gore go sa ipone tsapa mo ditirong tsa Bokeresete go nne thata jaana mo bathong ba bantsi?

Lebaka lengwe ke go kgobega marapo, mo go bakiwang ke go palelwa ga rona le makoa a rona motho ka bongwe. Fa re nnela go akanya ka diphoso tsa rona, re ka nna ra tlalelwa mme ra itlhoboga, re akanya gore Jehofa ga a kake a re itshwarela maleo otlhe a rona.

Lebaka le lengwe ke moya o o tletseng mo lefatsheng wa boitsholo jo bo sa siamang, tsietso, le kilo. (1 Johane 2:15, 16) Mongwe wa “mekgwa e mentle” e tlhotlheletso ya lefatshe e ka e senyang ke go sa ipone tsapa ga Bokeresete.—1 Bakorinthe 15:33.

Go sa ipone tsapa ga rona go ka koafadiwa ke kganetso ya batho le go bo ba sa kgathalele tirelo ya rona e e boitshepo. Ka go swaba, re ka nna ra konela ka gore batho ba ba mo tshimong ya rona ka tlhamalalo fela ga ba batle boammaaruri. Seno se ka nna sa dira gore re ipotse gore, ‘Mosola wa teng ke eng?’ mme re bo re tlogela tirelo ya rona e e kgethegileng ya bodiredi.

Gape re ka nna ra tlhotlhelediwa ke mowa wa lefatshe wa go batla go iitumedisa. Ke ka ntlha yang fa re tshwanetse go sokola le go intsha setlhabelo go le kanakana fa batho botlhe ba lebega ba iketlile e bile ba sa dire ka natla?—Bapisa Mathaio 16:23, 24.

Fa re batla go dira thato ya ga Jehofa re sa ipone tsapa, re tshwanetse go apara botho jwa Bokeresete mme re tshele ka moya, e seng ka nama. (Baroma 8:4-8; Bakolosa 3:10, 12, 14) Go itse gore Jehofa o leba kgang jang go tla re thusa gore re tswelele ka ditiro tsa rona tse di botlhokwa tsa semoya.—1 Bakorinthe 16:13.

Dikai Tsa go sa Ipone Tsapa

Jehofa o ile a re fa dikai tse dintsi tse di kgothatsang tsa batlhanka ba ba neng ba tswelela ba ikanyega mo go ene ba sa ipone tsapa le fa ba ne ba lebane le diteko tse dintsi tse di setlhogo. Ka go di tlhatlhoba, re bona ka fa re ka tlhagolelang go sa ipone tsapa ga Bokeresete ka teng le go nna re ntse re dira jalo le lebaka la go bo go le tlhwatlhwakgolo jaana.

Sekai se segolo ke sa ga Jesu, yo o neng a bogisediwa go galaletsa leina la ga Jehofa thata. Baebele e re kgothaletsa go ithuta ditiro tsa ga Jesu ka kelotlhoko tsa go bo a ile a ineela a sa ipone tsapa: “Ke gone, e re ka re dikanyeditswe ke boidiidi jo bo kalokalo jwa basupi, a le rona re latlheng bokete bongwe le bongwe, le boleo jo bo bofefo go re rareetsa, mme a re sianeng ka bopelotelele tshiano e re e beilweng pele, re ntse re lebile kwa go Jesu, mosimolodi le mowetsi wa tumelo ya rona, yo e rileng ka boitumelo jo o bo beetsweng pele a itshokela mokgoro, a nyatsa ditlhong, mme a dula ka fa ntlheng ya letsogo le legolo la setulo sa Modimo sa bogosi. A lo ke lo akanyeng ene yo o itshoketseng kganelo e e kalokalo ya baleofi ba ba ikganetsang, gore lo tle lo se ka lwa lapa, lwa ngodiega mo meweng ya lona.”—Bahebere 12:1-3.

Lebelo la botshelo ke la sekgala se se telele, ga se le lekhutshwane la legwatagwata. Ke lone lebaka la go bo re tlhoka go sa ipone tsapa mo go tshwanang le ga ga Keresete. Mokgele, e bong kwa makgaolakgannyeng, o ka nna wa bo o sa iponatse sentle fa karolo e kgolo ya lebelo e ntse e tsweletse. Mokgele o tshwanetse go bonala sentle mo leitlhong la rona la mogopolo gore re tle re kgone go o batla ka ditlhaloganyo tsa rona mo tseleng yotlhe, e e batlang mo gontsi mo go rona. Jesu o ne a na le setshwantsho seo mo tlhaloganyong fa pele ga gagwe, se e neng e le, “boitumelo jo o bo beetsweng pele.”

Ke eng se se akarediwang mo boipelong jono jwa Bakeresete gompieno? Ke tuelo ya botshelo jwa bosasweng kwa legodimong mo go ba sekaenyana le botshelo jo bo sa khutleng mo go ba bantsi mo lefatsheng. Gape ke kgotsofalo e motho a e bonang e e tlisiwang ke go itse gore o itumedisa pelo ya ga Jehofa e bile o nnile le seabe mo go itshepiseng leina la Modimo.—Diane 27:11; Johane 17:4.

Gape boitumelo jono bo akaretsa tsalano e kgolo thata le e e itumedisang le Jehofa. (Pesalema 40:8; Johane 4:34) Tsalano e e ntseng jalo e a nonotsha gape e tlamela botshelo, ka jalo e naya motho nonofo ya gore a taboge mo lebelong ka boitshoko mme a se ka a itlhoboga. Mo godimo ga moo, Jehofa o segofatsa kamano e e ntseng jalo ka go tshololela moya wa gagwe o o boitshepo mo batlhankeng ba gagwe, mo go felelang ka koketsego ya boipelo le tiro e e ipedisang.—Baroma 12:11; Bagalatia 5:22.

Go akanya ka sekao sa ga Jobe sa go sa ipone tsapa le tumelo go na le mosola. O ne a sa itekanela gape a na le kitso e potlana ka seemo se a neng a le mo go sone. Ka jalo, ka dinako tse dingwe o ne a tle a itshiamise e bile a tle a kgobege marapo. Lefa go ntse jalo, o ne a tswelela a supa gore o ititeile sehuba go boloka bothokgami jwa gagwe mo go Jehofa mme le gore le ka motlha a se ka a Mo latlha. (Jobe 1:20-22; 2:9,10; 27:2-6) Jehofa o ne a duelela Jobe go bo a ne a ineetse a sa ipone tsapa, ka go mo fa masego a semoya le a senama le tsholofelo ya botshelo jo bosakhutleng. (Jobe 42:10-17; Jakobe 5:10, 11) Jaaka Jobe, re ka nna ra bogisiwa thata ra bo ra latlhegelwa thata mo botshelong jwa rona gone jaana, mme gape re ka tlhomamisega gore Jehofa o tla segofatsa boitshoko jwa rona jwa boikanyego.—Bahebere 6:10-12.

Mo metlheng ya segompieno, Basupi ba ga Jehofa jaaka setlhopha ba ile ba supa go sa ipone tsapa ga Bokeresete mo go direng thato ya ga Jehofa. Ka sekai, tiro ya bone ya ka ntlo le ntlo ya go sa ipone tsapa le go rera phatlalatsa e ile ya dira gore ba tlhongwe matlho ke lefatshe lotlhe mmogo le go rerela mongwe le mongwe molaetsa wa bone. Metswedi ya tshedimosetso e ile ya nna ya tlhalosa thata ka matlhagatlhaga a bone le go ititaya sehuba ga bone go rera mafoko a a molemo go sa kgathalesege dikganetso le diteko. Nngwe ya tsone e ne ya ntsha seele se se neng se ntsha ntlha se se reng “Ga go na ope yo o ka tilang Basupi ba ga Jehofa!”—Mathaio 5:16.

Jehofa o ile a segofatsa Basupi ba gagwe mo maitekong a bone a go sa ipone tsapa ka go oketsa maungo a bone mo bodireding. Ela tlhoko boitemogelo jwa Basupi ba ba neng ba kgona go dira mo maemong a a farologaneng kwa Italy ka bo1960 fa go ne go na le Basupi ba ka tshwara 10 000 ba ba neng ba rerela setšhaba sa batho ba ba fetang 53 000 000. Mo toropong e nngwe e go neng go nna batho ba le 6 000, go ne go sena Basupi. Batho ba ne ba itshwara ka tsela e e seng botsalano mo bodireding jwa Basupi bano ba ba neng ba etile.

E ne e re nako le nako fa bakaulengwe ba ile go rera koo, basadi ba bantsi le bone banna ba mo toropong eo ba bo ba kokoanya basimanyana mme ba ba rotloetsa gore ba sale Basupi morago, ba ba leletse melodi le gore ba ba tlhodie thata. Morago ga metsotso e sekaenyana go ntse go diragala seno, bakaulengwe ba ne ba patelesega gore ba tloge ba ye kwa toropong e nngwe. Ka maikaelelo a go neela baagi ba toropo eno bosupi ka botlalo gangwe fela, bakaulengwe ba ne ba swetsa ka gore ba rere koo fela ka malatsi a pula e neng e na thata, ka tsholofelo ya gore basimanyana ba ne ba sena go ba tshwenya. Ba ne ba lemoga gore batho ba toropo eo ba ne ba sa ikemisetsa go inesa ka pula fela gore ba tle ba kgoreletse baboledi bano. Ka tsela eno ba ne ba neela bosupi jo bo molemo. Ba ne ba kgona go bona batho ba ba kgatlhegang. Ba ne ba simolola dithuto tse disha tsa Baebele. Matswela e ne ya nna gore, ga go a ka ga nna fela le phuthego e e tsweletseng sentle e e neng ya tlhongwa mo torotswaneng eo, mme gape tiro ya go rera e ne ya simololwa go dirwa le ka malatsi a pula e neng e sa ne ka one. Jehofa o tsweletse go segofatsa go sa ipone tsapa ga Basupi ba gagwe mo lefelong leo le go ralala Italy. Jaanong go na le Basupi ba ga Jehofa ba ba fetang 200 000 mo nageng eo.

Maduo a go sa ipone tsapa go dira se se siameng a magolo. Basupi ba ga Jehofa ka maatla a moya wa Modimo ba ile ba kgona go fitlhelela tiro e kgolo thata mo hisitoring ya batho, ka go rera mafoko a a molemo a Bogosi, mo matlong a batho le ka ditsela tse dingwe, mo dimilioneng tsa batho. (Sekaria 4:6) Ba ile ba itumelela go bona mokgatlho wa ga Jehofa wa mo lefatsheng o gola le go nonofa ka tsela e e gakgamatsang e le tiragatsong ya boperofeti jwa Baebele. (Isaia 54:2; 60:22) Ba na le segakolodi se se phepa mo Modimong, mme ba ipelela tsholofelo ya botshelo jo bo sa khutleng. Mo godimo ga tsotlhe, ba ipelela tsalano e kgolo le Mmopi, Jehofa Modimo.—Pesalema 11:7.

[Ditshwantsho mo go tsebe 25]

Jesu o ne a duela go sa ipone tsapa ga mosadi yono wa Mogerika yo o boikokobetso

[Setshwantsho mo go tsebe 26]

Botshelo mo Paradaiseng ke nngwe ya dilo tse di itumedisang tse Bakeresete gompieno ba di solofeditsweng