Shekeme—Motse o o Kafa Mokgatšheng

FA GAREGARE ga mpa ya naga e Modimo a neng a e tlhophetse batho ba gagwe, e e neng e le fa gare ga Thaba ya Ebale le Thaba ya Gerisime, go na le motse wa Shekeme. E ne e le gone koo—mo e ka nnang dingwaga di le dikete tse nnè tse di fetileng—mo Jehofa a neng a solofetsa Aberahame jaana: “Lefatshe le, ke tlaa le naya losika lwa gago.”—Genesise 12:6, 7.

Go dumalana le tsholofetso eno, setlogolwana sa ga Aberahame e bong Jakobe se ne sa thibelela kwa Shekeme mme sa aga sebeso gone se a neng a se bitsa “Modimo ke Modimo wa Iseraele.” Go bonala Jakobe a ne a epa sediba mo karolong eno gore ba lelapa la gagwe ba bone metsi mmogo le letsomane la gagwe, sediba se ka makgolokgolo a dingwaga morago ga moo se neng se itsiwe e le “sediba sa ga Jakobe.”—Genesise 33:18-20, bapisa NW, ntlhanyana e e kwa tlase; Johane 4:5, 6, 12.

Lefa go ntse jalo, ga se maloko otlhe a lelapa la ga Jakobe a a neng a tlhagafalela kobamelo ya boammaaruri. Dina, e bong morwadie, o ne a ya go batla ditsala mo basetsaneng ba Bakanana ba motse wa Shekeme. Dina, yo ka nako eo a neng a santse a le mosha, o ne a tlogela megope ya lelapa la gagabo e e neng e sireletsegile mme a simolola go etela motse o o neng o le gaufi, a ya go itirela ditsala koo.

Makawana a motse oo a ne a tla leba jang lekgarebana leno le le sa itseng monna le le neng le etela motse wa bone ka metlha—gongwe a sa tsamaye le ope? Morwa kgosana o ne “a mmona; mme a mo tsaya a lala nae, a mo senya.” Ke ka ntlha yang fa Dina a ne a ipakela kotsi ka go tsalana le Bakanana ba ba neng ba se na boitsholo jo bo siameng? A ke ka go bo a ne a ikutlwa a tlhoka ditsala tsa basetsana ba dithaka tsa gagwe? A o ne a le tlhogoethata e bile a itaola jaaka ba bangwe ba bokgaitsadie? Bala polelo ya Genesise, mme o leke go tlhaloganya kafa Jakobe le Lea ba tshwanetseng ba bo ba le mo tlalelong le go tlhabiwa ke ditlhong ka ntlha ya diphelelo tse di setlhogo tsa go bo morwadiabone a ne a etela kwa Shekeme.—Genesise 34:1-31; 49:5-7; bona gape Tora ya Tebelo, June 15, 1985, tsebe 31.

Mo e ka nnang dingwaga di le 300 morago ga moo, diphelelo tsa go tlhokomologa dikaelo tse di direlwang puso ya Modimo di ne tsa bonala gape. Kwa Shekeme, Joshua o ne a rulaganya gore go nne le nngwe ya dikopano tse di sa lebalegeng mo hisitoring ya Iseraele. Akanya ka se se neng se diragala kwa mokgatšheng. Batho ba ba fetang milione—banna, basadi le bana—ba ditso tse thataro tsa Iseraele ba eme fa pele ga Thaba ya Gerisime. Ka kwa ga mokgatšha mo e ka nnang palo e e lekanang ya batho ba ba tswang mo ditsong tse dingwe tse thataro ba eme fa pele ga Thaba ya Ebale.a Mme kwa tlase, go bapa le araka ya kgolagano le fa gare ga bontsintsi jo bobedi jwa Baiseraele, go eme baperisiti le Joshua. A bo e ne e le thulaganyo e ntle jang ne!—Jošua 8:30-33.

E re ka dithaba tseno tse pedi di ne di tlhagelela ka kwa godimo ga boidiidi jono jo bogolo jwa batho, di re neela pharologanyo e kgolo fa gare ga bontle le go sa ungwe. Mekgokolosa e e kwa godimo ya Gerisime e ne e bonala e le tala e bile e ungwa, fa ya Ebale e ne e le tshetlha fela thata e bile e le lolea fela. A o ka utlwa go ngunanguna ka boitumelo fa Baiseraele ba emetse nako ya gore Joshua a bue? Modumo mongwe le mongwe o a arabana mo lefelong leno la tlholego.

Mo diureng tse nnè go ya go tse thataro tse Joshua a di tsayang a bala ‘mo lokwalong lwa molao wa ga Moshe,’ batho le bone ba nna le seabe. (Jošua 8:34, 35) Kwantle ga pelaelo, Baiseraele ba ba fa pele ga Gerisime ba re Amene! morago ga ditshegofatso dingwe le dingwe, fa Amene! wa ba ba fa pele ga Ebale o gatelela phutso nngwe le nngwe. Gongwe tebego e e lolea ya Thaba ya Ebale e ne e gakolola batho ka diphelelo tse di setlhogo tsa go tlhoka kutlo.

Joshua o tlhagisa jaana: “Go hutsege yo o nyatsang rraagwe kgotsa mmaagwe.” Ka bongwe fela, mantswe a batho ba ba fetang milione a araba jaana: “A go nne jalo.” Joshua o emela gore karabo eno e kokobele pele a ka tswelela pele jaana: “Go hutsege yo o sutisang molelwane wa ga gabo.” Gape ditso tse thataro, tse di kopaneng le baagi ba baeng, ba goa ba re: “A go nne jalo.” (Duteronome 27:16, 17) Fa o ne o le koo, a o ne o ka lebala kopano eo e neng e tshwaretswe fa gare ga dithaba? A go nna kutlo go ne go ka se gatisediwe mo mogopolong wa gago go ya go ile?

Ka bonako fela pele Joshua a swa mo e ka nnang dingwaga di le 20 moragonyana, gape o ne a phuthela setšhaba kwa Shekeme gore ba tle go nonotsha maitlhomo a bone. O ne a dira gore mongwe le mongwe a itlhophele. “Itshenkeleng gompieno yo lo tlaa mo direlang,” o ne a bolela jalo. “Mme ka ga me, le ba ntlo ya me, rona re tlaa direla Jehofa fela.” (Jošua 24:1, 15) Go bonala gore dikopano tseno tse di neng di nonotsha tumelo kwa Shekeme di ne di tlhotlheletsa thata. Ka dingwagangwaga morago ga go swa ga Joshua, Baiseraele ba ne ba etsa sekao sa gagwe se se ikanyegang.—Jošua 24:31.

Mo e ka nnang makgolo a dingwaga a le 15 moragonyana fa Jesu a ne a ikhuditse kafa tlase ga moriti wa Thaba ya Gerisime, go ne ga nna le motlotlo o o neng o kgothatsa tota. E re ka Jesu a ne a lapile morago ga loeto lo lotelele, o ne a dula fa sedibeng sa ga Jakobe fa mosadi wa Mosamaria a ne a tla a tshotse nkgwana ya metsi. Mosadi yono o ne a gakgametse thata fa Jesu a ne a mo kopa gore a mo nose metsi, e re ka Bajuta ba ne ba sa buisane le Basamaria, tota e bile ba ne ba ka se nwele mo dinkgwaneng tsa bone. (Johane 4:5-9) Mafoko a ga Jesu a a latelang a ne a mo gakgamatsa le go feta.

“Mongwe le mongwe yo o nwang metsi a, o tlaa ba a nyorwa gape; mme le fa e le mang yo o tlaa nwang metsi a ke tlaa a mo nosang, ga a ketla a tlhola a nyorwa gope; metsi a ke tlaa a mo nosang a tlaa tswa motswedi wa metsi mo go ene, a a tswelelang botshelong jo bo sa khutleng.” (Johane 4:13, 14) Akanya fela kafa mosadi yono a neng a kgatlhegela tsholofetso eno ka teng, ka gonne go ga metsi mo sedibeng seno se se boteng e ne e le tiro e e bokete. Jesu o ne a tswelela pele a tlhalosa gore go sa kgathalesege gore Jerusalema tota le yone Thaba ya Gerisime di ne di le botlhokwa mo hisitoring ya tsone, e ne e se mafelo a bodumedi a a botlhokwa go atamela Modimo mo go one. Se se neng se le botlhokwa e ne e le boikutlo jwa pelo le boitshwaro, e seng lefelo. O ne a bolela jaana: ‘Baobamedi ba ammaaruri ba tla obamela Rara ka Mowa le ka boammaaruri; gonne Rara o batla ba ba ntseng jalo go nna baobamedi ba gagwe.’ (Johane 4:23) A bo mafoko ao a tshwanetse a bo a ne a gomotsa jang ne! Gape mokgatšha ono o ne wa nna lefelo le batho ba neng ba rotloediwa gore ba direle Jehofa mo go lone.

Gompieno motse wa Nablus o gaufi le marope a Shekeme wa bogologolo. Thaba ya Gerisime le Thaba ya Ebale di santse di tlhomologile thata mo mokgatšheng oo, di eme e le bosupi jo bo bonalang jwa ditiragalo tsa nako e e fetileng. Sediba sa ga Jakobe, se se kwa tlase ga dithaba tseno, se santse se ka etelwa. Fa re tlhatlhanya ka ditiragalo tse di neng tsa direga kwa lefelong leo, re gakololwa botlhokwa jwa go tlotlomatsa kobamelo ya boammaaruri, fela jaaka Joshua le Jesu ba ne ba re ruta go dira jalo.—Bapisa Isaia 2:2, 3.

[Dintlha tse di kwa tlase]

[Motswedi wa Setshwantsho mo go tsebe 31]

Pictorial Archive (Near Eastern History) Est.