Ba ne Ba Dira go Rata ga Jehofa

Jesu o Galalediwa e le Mesia e Bile e le Kgosi!

BOIDIIDI jo bo tsositseng modumo jo bo neng bo tsena mo Jerusalema ka Nisane 9, 33 C.E., bo ne jwa gakgamatsa Bajuta ba le bantsi. Le mororo go ne go tlwaelegile go bona batho ba ologela mo motseng pele ga Tlolaganyo, baeti bano bone ba ne ba farologane. Motho wa botlhokwa mo gare ga bone e ne le monna mongwe yo o neng a palame eselana ya esela. Monna yono e ne e le Jesu Keresete, mme batho ba ne ba ala diaparo le dikala tsa makolwane fa pele ga gagwe fa ba ntse ba goa ba re: “Hosana, Morwa Dafite; go bakwe yo o tlang ka leina la Morena; Hosana mo bogodimodimong.” Fa ba bona boidiidi, batho ba ba neng ba setse ba le mo Jerusalema ba ne ba tlhotlheletsega go kopana le mokoloko oo wa batho.—Mathaio 21:7-9; Johane 12:12, 13.

Le mororo a ne a galalediwa gone jaanong, Jesu o ne a itse gore o tlile go sekisiwa. Ebu, mo malatsing a matlhano fela, o ne a tla bolawa mo go one motse ono! Ee, Jesu o ne a itse gore Jerusalema e ne e se lefelo le le botsalano, o ne a tsena mo motseng ka tsela e e ntseng jalo a bonwa ke mongwe le mongwe a ntse a akantse ka seo.

Boporofeti Jwa Bogologolo bo Diragaditswe

Ka 518 B.C.E., Sekaria o ne a bolelela pele ka go tsena ga ga Jesu mo Jerusalema ka go thela loshalaba. O ne a kwala jaana: “Thela lošalaba wena morwadia Jerusalema; bona, kgosi ya gago e etla kwa go wena; o tshiamo, o na le poloka o boikokobetso, o palame esela, e bong eselana ngwana wa esela. . . . O tlaa bua kagiso le merafe, mme puso ya gagwe, e tlaa tswa lewatleng lengwe e ya lewatleng le lengwe, e tlaa tswa Nokeng e ye go fitlha kwa dikhutlong tsa lefatshe.”—Sekaria 9:9, 10.

Ka jalo go tsena ga ga Jesu mo Jerusalema ka Nisane 9 go ne go diragatsa boporofeti jwa Baebele. E ne e se selo se se neng sa itiragalela fela mme se ne se rulagantswe ka kelotlhoko. Pelenyana ga moo, fa Jesu a ne a le kwa ntle ga Jerusalema, o ne a laetse barutwa ba gagwe ba babedi jaana: “Yang mo motsaneng o lo lebaganyeng nao, mme lo tlaa akofa lo fitlhela esela e golegilwe, e na le eselana ya yone; di gololeng, lo tle natso kwano go nna. Mme fa mongwe a bua sengwe le lona, lo re: ‘Morena o a di batla;’ mme o tlaa akofa a di lesa.” (Mathaio 21:1-3) Mme ke ka ntlha yang fa Jesu a ne a batla go tsena mo Jerusalema a palame esela, mme ke eng se se neng se bolelwa ke tsela e boidiidi jwa batho bo neng jwa itshwara ka gone?

Molaetsa o o Malebana le Bogosi

Gantsi go bona dilo ka matlho go nonofile thata go feta lefoko le le builweng. Ka gone, ka dinako tse dingwe Jehofa o ne a dirisa baporofeti ba gagwe gore ba diragatse molaetsa wa bone gore molaetsa wa bone wa boporofeti o gatelelwe. (1 Dikgosi 11:29-32; Jeremia 27:1-6; Esekiele 4:1-17) Dilo tseno tse di bonalang sentle tsa puisano di ile tsa kgomarela tota le mo mogopolong wa mmogedi yo o peloethata tota ka tsela e e sa lebalesegeng. Ka tsela e e tshwanang, Jesu o ne a diragatsa molaetsa o o nonofileng ka go tsena mo motseng wa Jerusalema a palame esela. Jang?

Mo metlheng ya go kwalwa ga Baebele esela e ne e dirisiwa ka maikaelelo a a tlotlegang. Ka sekai, fa Solomone a ne a ya go tlodiwa jaaka kgosi o ne a palama “mo mmoulong” wa ga rraagwe, e leng ngwana wa esela e tonanyana e kopane le ya mofuta o mongwe. (1 Dikgosi 1:33-40) Ka jalo go tsena ga ga Jesu mo Jerusalema a palame esela go ne go tla raya gore o ne a iponatsa e le kgosi.a Se boidiidi jwa batho bo neng jwa se dira se ne se gatelela molaetsa ono. Kwantle ga pelaelo, setlhopha seo se neng se na le Bagalalia thata, se ne sa ala diaparo tsa sone fa pele ga ga Jesu—sesupo se se neng se gakolola batho ka bogosi jwa ga Jehu. (2 Dikgosi 9:13) Fa ba ne ba bolela gore Jesu ke “Morwa Dafite” ba ne ba gatelela gore o ne a na le tshwanelo ya go busa. (Luke 1:31-33) Mme go dirisa ga bone makala a makolwane go ne go bontsha gore ba ikobela taolo ya gagwe ya bogosi.—Bapisa Tshenolo 7:9, 10.

Ka jalo mokoloko wa batho o o neng wa tsena mo Jerusalema ka Nisane 9 o ne o bontsha sentle gore Jesu e ne e le Mesia e bile e le Kgosi e e tlhomilweng ke Modimo. Ke boammaaruri gore ga se botlhe ba ba neng ba itumeletse go bona Jesu a amogelwa ka tsela eno. Bogolo jang Bafarasai ba ne ba akanya gore ga go a tshwanela go bo Jesu a ne a ka neelwa tlotlo e e ntseng jalo ya segosi. Ga go belaetse gore ba ne ba bolela jaana ka mantswe a a galefileng: “Moruti, kgalemela barutwa ba gago.” Jesu o ne a araba jaana: “Ke a lo bolelela gore fa ba, ba ka didimala, maje a tlaa akofa a goa.” (Luke 19:39, 40) Ee, Bogosi jwa Modimo e ne e le setlhogo sa ga Jesu sa go rera. O ne a tla bolela molaetsa ono ka bopelokgale go sa kgathalesege gore a batho ba o amogela kana nnyaa.

Thuto mo go Rona

Go ne go tlhoka bopelokgale jo bogolo gore Jesu a tsene mo Jerusalema ka tsela e e neng ya bolelelwa pele ke moporofeti Sekaria. O ne a itse gore go dira jalo go ne ga gakatsa baba ba gagwe. Pele a tlhatlogela kwa legodimong, Jesu o ne a laela barutwa ba gagwe gore ba rere mafoko a a molemo a Bogosi jwa Modimo le gore ba “dire merafe yotlhe barutwa.” (Mathaio 24:14; 28:19, 20) Gape go dira tiro eno go tlhoka bopelokgale. Ga se batho botlhe ba ba batlang go reetsa molaetsa ono. Ba bangwe ga ba o kgatlhegele, fa ba bangwe bone ba o gana. Dipuso tse dingwe di ile tsa dira dithibelo mo tirong ya go rera kana di ile tsa go iletsa gotlhelele.

Lefa go ntse jalo, Basupi ba ga Jehofa ba lemoga gore mafoko a a molemo a Bogosi jo bo tlhomilweng jwa Modimo a tshwanetse go rerwa, go sa kgathalesege gore a batho ba a reetsa kana ga ba reetse. (Esekiele 2:7) Fa ba ntse ba tswelela pele go dira tiro eno e e bolokang botshelo, ba tlhomamisediwa jaana ke tsholofetso eno ya ga Jesu: “Bonang, ke bo ke ntse ke na le lona ka metlha yotlhe, go ya bokhutlong jwa metlha.”—Mathaio 28:20.

[Ntlha e e kwa tlase]