A Meletlo ya Thobo e Itumedisa Modimo?

MOKOA o mogolo wa maungo a a monate, merogo e mentle le dingata tsa mabele a a nonneng o a kgatlha. Ka nako ya thobo dialetare le mafelo a therelo a kgabisiwa ka dilo tse di ntseng jalo mo dikerekeng tsotlhe tsa Engelane. Kwa Yuropa jaaka kwa mafelong a mangwe, mediro e mentsi e supa tshimologo le bowelo jwa nako ya thobo.

Batho ba ba ikaegileng ka mmu gore ba tshele ba lebogela thata se naga e se ungwang. Totatota, Modimo o ne a laela setšhaba sa Baiseraele sa bogologolo go keteka meletlo e meraro ya ngwaga le ngwaga e e neng e amana thata le thobo. Mo masimologong a dikgakologo, ka nako ya Moletlo wa Dinkgwe Tse di sa Bedisiwang, Baiseraele ba ne ba ntshetsa Modimo ngata ya mabutswapele a thobo ya barele. Kwa Moletlong wa Dibeke (kana, Pentekosete) go ya kwa bofelong jwa dikgakologo, ba ne ba ntsha dinkgwe tse di dirilweng ka mabutswapele a korong ya thobo. Ka letlhafula e ne e le Moletlo wa go Rora, o o neng o supa bofelo jwa ngwaga wa temothuo wa Baiseraele. (Ekesodo 23:14-17) Meletlo eno e ne e le “diphuthego tse di itshepileng” le dinako tsa go itumela.—Lefitiko 23:2; Duteronome 16:16.

Go tweng he ka meletlo ya thobo ya motlha wa rona? A di itumedisa Modimo?

E na Le Boheitane

E re ka moruti mongwe wa Anglican kwa Cornwall, kwa Engelane a ne a tshwenngwa ke tsela e meletlo ya nako e thobo e neng e tshwarwa ka yone le botagwa jo bo neng bo amana le go ketekiwa ga yone, ka 1843 o ne a swetsa go tsosolosa ngwao ya thobo ya motlha wa bogare. O ne a tsaya mangwe a mabele a ntlha a a robilweng me ka one a dira senkgwe a se direla moletlo wa sakaramente mo kerekeng ya gagwe. Ka go dira jalo, o ne a tsweletsa moletlo wa Lammas—o e leng moletlo wa “Bokeresete” o bangwe ba reng o simologile ka kobamelo ya bogologolo ya modimo wa Ba-Celtic e leng Lugh.a Ka jalo, moletlo wa thobo wa segompieno wa Anglican o simologile kwa boheitaneng.

Go tweng ka meletlo e mengwe e e nnang teng kwa bofelong jwa motlha wa thobo? Go ya ka Encyclopædia Britannica, bontsi jwa ditlwaelo tsa meletlo eno di simologile ka “kobamelo ya dilo tsa tlholego mo moyeng wa mmidi [mabele] kana mmammidi.” Mo mafelong mangwe balemirui ba dumela gore moya o mo teng ga ngata ya bofelo ya mabele a a tshwanetseng go robiwa. Go koba moya oo, ba beletsa mabele fa fatshe. Gongwe go sele ba logela matlhare mangwe a mabele go nna “setshwantsho sa mabele” se ba se bayang se bolokegile e le sa “lesego” go fitlha ngwaga o o latelang fa go jalwa peo. Ka nako ba lema diako tsa mabele gape mo mmung ba solofetse gore seno se tla segofatsa thobo e ntšha.

Ditlhamane dingwe di amanya nako ya thobo le kobamelo ya modimo wa Sebabilone e bong Tamuse, molekane wa modimogadi wa tsalo e leng Ishetare. Go kgaola tlhaka ya mabele a a buduleng go ne go tshwana le loso lwa ga Tamuse lo lo sa lebelelwang. Ditlhamane tse dingwe di amanya nako ya thobo le ditlhabelo tsa batho—selo se e leng makgapha mo go Jehofa Modimo.—Lefitiko 20:2; Jeremia 7:30, 31.

Pono ya Modimo ke Eng?

Tsela e Modimo a neng a dirisana le Baiseraele ba bogologolo ka teng e supa ka phepafalo gore Jehofa, Mmopi le Motswedi wa botshelo, o batla gore baobamedi ba gagwe ba obamele ene fela. (Pesalema 36:9; Nahume 1:2) Mo motlheng wa ga moporofeti Esekiele, mokgwa wa go lelela modimo Tamuse e ne e le ‘selo se se makgapha thata’ mo matlhong a ga Jehofa. Seno mmogo le mekgwa e mengwe ya bodumedi jwa maaka, e ne ya dira gore Modimo a se ka a utlwa dithapelo tsa baobamedi bao ba maaka.—Esekiele 8:6, 13, 14, 18.

Bapisa seno le se Jehofa Modimo a ileng a laela Baiseraele go se ela tlhoko malebana le thobo. Ka nako ya Moletlo wa go Rora, Baiseraele ba ne ba nna le kopano e e masisi e mo go yone babotlana le bagolo, bahumi le bahumanegi, ba neng ba nna mo diobong tse di kgabisitsweng ka dikala tsa ditlhare tse dikima. Eno e ne e le nako ya boitumelo jo bogolo mo go bone mme gape e ne e le nako ya go akanya ka tsela e Modimo a ileng a golola bagologolwane ba bone ka yone ka nako ya Khudugo go tswa kwa Egepeto.—Lefitiko 23:40-43.

Ka nako ya meletlo ya Baiseraele, ditlhabelo di ne di ntshediwa Jehofa, Modimo o o osi wa boammaaruri. (Duteronome 8:10-20) Fa e le ka tumelo ya dilo tsa tlholego e e umakilweng fa godimo, ga go na gope koo Baebele e buang ka dijalo, tse di ntseng jaaka dingata tsa mabele tse di nang le moya.b Mme Dikwalo di supa ka phepafalo gore medimo e e itiretsweng e nna e ntse e sa tshele, e sa kgone go bua, go bona, go utlwa, go dupa, go tshwara kana go thusa baobamedi ba yone ka sepe.—Pesalema 115:5-8; Baroma 1:23-25.

Bakeresete gompieno ga ba ka fa tlase ga kgolagano ya Molao o Modimo a o dirileng le setšhaba sa bogologolo sa Iseraele. Eleruri, Modimo ‘o e ntshitse mo tseleng ka go e kokotela mo koteng ya ga Jesu ya tlhokofatso.’ (Bakolosa 2:13, 14) Batlhanka ba ga Jehofa ba motlha wa segompieno ba tshela ka “molao wa ga Keresete” mme ba anaanela dilo tsotlhe tse Modimo a di ba nayang.—Bagalatia 6:2.

Moaposetoloi Paulo o ne a bolela ka phepafalo gore meletlo ya Sejuda e ne e le “moriti wa dilo tse di tla tlang,” a oketsa ka gore “mme selo sa mmatota ke sa ga Keresete.” (Bakolosa 2:16, 17) Ka jalo, Bakeresete ba boammaaruri ba amogela tlhaloso eno ya Dikwalo: “Dilo tse merafe e di isang setlhabelo e di isetsa madimona setlhabelo, mme e seng Modimo . . . Ga lo ka ke lwa bo loo nwa senwelo sa ga Jehofa le senwelo sa madimona.” (1 Bakorintha 10:20, 21) Mo godimo ga moo, Bakeresete ba tsaya tsia tlhagiso ya gore ba “tlogele go ama selo se se seng phepa.” Mo lefelong le o nnang mo go lone, a meletlo ya thobo e na le dikamano tsa boheitane kana tsa bodumedi? Fa go ntse jalo, Bakeresete ba boammaaruri ba tshwanetse go tila go kgopisa Jehofa ka go ineela go nna le seabe mo kobamelong epe e e leswafaditsweng.—2 Bakorintha 6:17.

Fa ngwana yo o anaanelang a amogela mpho go tswa go rraagwe, o leboga mang? A o leboga motho yo a sa mo itseng gotlhelele kana motsadi wa gagwe? Ka thapelo e e tswang pelong baobamedi ba Modimo ba leboga Jehofa Rraabone wa selegodimo letsatsi le letsatsi, ka ntlha ya bopelotshweu jwa gagwe jo bogolo.—2 Bakorintha 6:18; 1 Bathesalonika 5:17, 18.

[Dintlha tse di kwa tlase]