Onesiforo—Mogomotsi yo o Pelokgale

“NNANG lo gopotse ba ba mo dikgoleng tsa kgolegelo jaaka e kete lo golegilwe le bone, le ba ba tshwerweng setlhogo.” (Bahebera 13:3) Fa moaposetoloi Paulo a kwala mafoko ano mo e ka nnang ka 61 C.E., ene ka boene o ne a setse a kile a tsenngwa mo kgolegelong ka makgetlho a le mmalwa mme o ne a tla golegiwa gape pele a nna moswelatumelo. (Ditiro 16:23, 24; 22:24; 23:35; 24:27; 2 Bakorintha 6:5; 2 Timotheo 2:9; Filimone 1) Go ne go le botlhokwa thata ka nako eo fela jaaka go ntse le gone jaanong gore diphuthego di tlhokomele badumedimmogo ba ba lebaneng le go lekwa ga tumelo ya bone.

Morutwa mongwe wa lekgolo la ntlha la dingwaga yo o neng a tsaya seo tsia thata e ne e le Onesiforo. O ne a etela Paulo fa a ne a tsentswe mo kgolegelong ka lekgetlho la bobedi kwa Roma. Moaposetoloi o ne a kwala jaana ka ga gagwe: “E kete Morena a ka naya ba ntlo ya ga Onesiforo kutlwelobotlhoko, ka gonne gantsi o ne a ntlisetsa tapologo, mme o ne a se ka a tlhabisiwa ditlhong ke dikeetane tsa me. Phapaanong le seo, e rile go diragala gore a bo a le mo Roma, a mpatla ka tlhoafalo a ba a mpona.” (2 Timotheo 1:16, 17) A o kile wa ipha nako ya go akanya gore mafoko a a mmalwa ano a kaya eng tota? Gongwe go dira jalo go tla dira gore o anaanele Onesiforo thata. O tla bona gore e ne e le mogomotsi yo o pelokgale.

Go Tsenngwa ga ga Paulo ga Bobedi mo Kgolegelong

Fa a sena go gololwa la ntlha kwa kgolegelong, Paulo o ne a tsenngwa mo kgolegelong ya Roma gape mme e le kafa tlase ga maemo a a farologaneng. Pele ditsala di ne di kgona go ya kwa ntlong ya gagwe e a e hirileng mme o ne a bonala a dumela gore o tla tloga a gololwa. E re ka a latlhilwe ke ba le bantsi, go ne go bonala a tla tloga a nna moswelatumelo.—Ditiro 28:30; 2 Timotheo 4:6-8, 16; Filimone 22.

Paulo o ne a le mo kgolegelong mo lekgetlhong leno mo e ka nnang ka 65 C.E. Mo e ka nnang ngwaga pelenyana—ka July 64 C.E.—molelo o ne wa laila Roma, o baka ditshenyego tse dikgolo mo mafelong a le 10 a dikgaolo di le 14 tsa motse. Go ya ka mokwalahisitori wa Moroma e bong Tacitus, Mmusimogolo Nero o ne a sa kgone go “nyeletsa tumelo e e maswe ya gore molelo o o boitshegang oo o ne o tshubilwe ka taolo e e ntshitsweng ke ene. Ka jalo, go nyeletsa pego eo, Nero o ne a tshwara balatofadiwa mme a bogisa setlhopha se se neng se ilwa ka ntlha ya bomaswe jwa sone, se baagi ba neng ba se bitsa Bakeresete a bo a se tlhokofatsa ka tsela e e setlhogo tota. . . . Ba ne ba bolawa ka go sotliwa ka ditsela tse di farologaneng. Ba ne ba gagolakwa ke dintšha ba sena go apesiwa matlalo a dibatana mme ba bo ba nyelela, kana ba ne ba kokotelwa mo difapaanong, kana ba latlhelwa mo dikgabong tsa molelo mme ba tuka gore ba lale ba bonesitse jaaka dipone fa letsatsi le sena go phirima.”

Paulo o ne a le mo boemong jo bo ntseng jalo e bile a lebeletse go diragalelwa ke dilo tse di ntseng jalo fa a ne a le mo kgolegelong gape. Ga go gakgamatse go bo a ne a itumela thata fa tsala ya gagwe Onesiforo e ne e nna e mo etela! Mme a re sekasekeng boemo jo bo ntseng jalo go tswa kafa letlhakoreng la ga Onesiforo.

Go Etela Paulo Mogolegwa

Go bonala fa ba lelapa la ga Onesiforo ba ne ba nna kwa Efeso. (2 Timotheo 1:18; 4:19) Gore a e ka tswa e le gore Onesiforo o ne a tlile mo motsemoshateng wa mmusomogolo ka mabaka a gagwe kana go tla go etela Paulo ka mo go kgethegileng ga go a tlhalosiwa. Le fa go ntse jalo, moaposetoloi o ne a akgela jaana: ‘Fa go ne go diragala gore Onesiforo a bo a le mo Roma, gantsi o ne a ntlisetsa tapologo.’ (2 Timotheo 1:16, 17) Tapologo ya mofuta ofe? Le mororo thuso ya ga Onesiforo e ka tswa e ne e akaretsa thuso ya dithoto, go bonala fa go nna gone ga gagwe le gone e ile ya nna thuso ya go nonotsha le go kgothatsa Paulo. Tota e bile, dithanolo tse dingwe di balega jaana: “Gantsi o ne a itumedisa moya wa me,” kana “gantsi o ne a nkgomotsa.”

Go kgotsofatsa keletso ya go etela mogolegwa wa Mokeresete kwa Roma ka nako eo e ne e le kgwetlho. Go farologana le lekgetlho la ntlha la fa Paulo a ne a le kwa kgolegelong, go bonala fa Bakeresete ba kwa Roma ba ne ba sa tlhole ba itse kwa a leng teng. Mo motseng o mogolo o o jaaka Roma, go ne go se motlhofo go bona mogolegwa a le mongwe yo o fitlhegileng fa gare ga ba bantsintsi ba ba neng ba golegilwe ka ntlha ya ditlolo tse di farologaneng. Ka jalo, go ne go tlhokega gore motho a batle a tlhoafetse. Mokanoki e bong Giovanni Rostagno o tlhalosa dilo ka tsela eno: “Mathata a ka tswa a ne a farologane. Se se botlhokwa le go feta, go ne go tlhokega matsetseleko a magolo a a sa tlwaelegang mo patlong eno. Go kokoanya tshedimosetso go tswa mo lefelong le lengwe go ya go le lengwe le go bonala o tlhoafetse go bona kgolegelo e go nang le mogolegwa yo o tsofetseng yo o tlhagafetseng bobe yo o neng a na le melato e mentsi go ka tswa go ne go tsositse pelaelo e e sa tlhokegeng.”

Mokwadi P. N. Harrison o tlhalosa boemo jo bo tshwanang ka tsela e e phepafetseng ka go bolela jaana: “Go bonala fa re bona sefatlhego se se sa bonaleng sentle sa motho a le mongwe fela yo o nang le maikaelelo yo o tsamayang le boidiidi jwa batho mme re kgatlhegela thata motho yo re sa mo itseng yono yo o tswang gaufi le lewatle la Aegean, fa a ntse a tsamaya mo mebileng e a sa e tlwaelang, a kokota mo mabating a mantsi, a latelela tshedimosetsonyana nngwe le nngwe e a e bonang, le fa a tlhagisiwa ka dikotsi tsa gone ga a kgobege marapo ka se a se batlang; go fitlhela a fitlha mo ntlong e a golegilweng mo go yone e e fitlhegileng, lentswe le a le itseng le mo dumedisa mme o bona Paulo a bofeletswe ka dikeetane mo lesoleng la Moroma.” Fa e le gore lefelo leo le ne le tshwana le dikgolegelo tse dingwe tsa Roma, gongwe le ne le le tsididi, le le lefifi e bile le le leswe, go tletse ka dikeetane le dipogisego tsa mefuta yotlhe.

Go ne go le kotsi thata fa o ka lemogiwa gore o tsala ya mogolegwa yo o tshwanang le Paulo. Go ne go le kotsi le go feta go nna o ntse o mo etela. Go ipolela phatlalatsa gore o Mokeresete o ne o ipaya mo kotsing ya go tshwarwa le go bolawa ka go tlhokofadiwa. Mme Onesiforo o ne a sa kgotsofalele go eta ka lekgetlho le le lengwe kana a le mabedi fela. E bile o ne a sa tlhabiwe ke ditlhong kana go boifa go dira jalo “gantsi.” Eleruri Onesiforo o ne a dira go dumelana le se leina la gagwe le se kayang, “Motshola Melemo,” a thusa ka bopelokgale le ka lorato go sa kgathalesege dikotsi tsa gone.

Ke ka ntlha yang fa Onesiforo a ne a dira seno sotlhe? Brian Rapske o ne a akgela jaana: “Kgolegelo e ne e se fela lefelo le motho a neng a boga mo mmeleng mo go lone mme gape e ne e le lefelo le le neng le tlhobaetsa mogolegwa thata ka ntlha ya go tshwenyega thata mo maikutlong. Mo boemong jo bo ntseng jalo, go nna gone ka namana le dikgothatso tsa molomo tsa bathusi di ne di tla kgothatsa mogolegwa thata mo maikutlong.” Go bonala fa Onesiforo a ile a lemoga seo mme ka bopelokgale a ema tsala ya gagwe nokeng. A bo Paulo a tshwanetse a bo a ile a anaanela thuso e e ntseng jalo jang ne!

Go ne Ga Diragala Eng ka Onesiforo?

Mo lekwalong la gagwe la bobedi le a neng a le kwalela Timotheo, Paulo o ne a dumedisa bantlo ya ga Onesiforo mme a bolela jaana ka ene: “E kete Morena o ka mo naya go bona kutlwelobotlhoko e e tswang kwa go Jehofa ka letsatsi leo.” (2 Timotheo 1:18; 4:19) Ba le bantsi ba akanya gore mafoko a a reng “ka letsatsi leo” a kaya letsatsi la Modimo la katlholo mme ka jalo ba swetsa ka gore Onesiforo o ne a sule. Fa go ne go ntse jalo, gongwe “Onesiforo o ne a boaboela gantsi kwa lefelong le le kotsi leno . . . mme a feleletsa a otlhailwe ka loso,” go akantsha jalo P. N. Harrison. Gone mme, Onesiforo o ka tswa a ne a seyo fela kwa gae, kana Paulo o ka nna a bo a mo akareditse mo ditumedisong tse a neng a di romelela bantlo ya gagwe yotlhe.

Bangwe ba dumela gore go na le bokao jo bo kgethegileng ka polelo e e reng: “E kete Morena o ka mo naya go bona kutlwelobotlhoko e e tswang kwa go Jehofa ka letsatsi leo.” Ba akanya gore mafoko ano a dira gore go tshwanele gore go rapelelwe meya e e tswileng le e gongwe e bogang mo lefelong lengwe la moya. Le fa go ntse jalo, kgopolo e e ntseng jalo e thulana le thuto ya Dikwalo ya gore baswi ga ba utlwe sepe. (Moreri 9:5, 10) Tota le fa Onesiforo a ne a sule, Paulo o ne a tlhalosa fela gore o eletsa e kete tsala ya gagwe e ka bona kutlwelobotlhoko ya Modimo. “Re na le tshwanelo ya go eleletsa botlhe seo,” go bolela jalo R. F. Horton. “Mme go rapelela baswi le go ba ntshetsa Mmisa, ke kgopolo e e neng e se mo mogopolong wa [moaposetoloi].”

E Kete re ka Nna Bagomotsi ba ba Ikanyegang ka Nitamo

Le fa e ka tswa e le gore Onesiforo o ne a latlhegelwa ke botshelo jwa gagwe fa a ne a sa ntse a thusa Paulo kgotsa go sa nna jalo, eleruri o ne a ipaya mo kotsing gore a bone moaposetoloi le go mo etela kwa kgolegelong. Mme ga go na pelaelo gore Paulo o ne a anaanela thata kemonokeng le kgothatso tse a neng a di tlhoka tse a neng a di bona mo go Onesiforo.

Fa Bakeresetekarona ba le mo tekong, ba bogisiwa, kana ba le mo kgolegelong, re ka nna ra kgona go ba gomotsa le go ba kgothatsa. Ka jalo e kete re ka ba rapelela le go dira gotlhe mo re ka go kgonang go ba thusa. (Johane 13:35; 1 Bathesalonika 5:25) E kete re ka nna bagomotsi ba ba pelokgale fela jaaka Onesiforo.

[Setshwantsho mo go tsebe 31]

Onesiforo o ne a kgothatsa moaposetoloi Paulo yo o neng a le kwa kgolegelong ka bopelokgale