A o A Gakologelwa?

A ditokololo tsa bosheng jaana tsa Tora ya Tebelo di go tswetse molemo? Fa go ntse jalo, ke ka ntlha yang fa o sa itlhatlhobe gore a o sa ntse o gakologelwa ka dipotso tse di latelang?

◻ Pharologano fa gare ga “letsatsi la Morena” le “letsatsi la ga Jehofa” ke eng? (Tshenolo 1:10; Joele 2:11)

“Letsatsi la Morena” le akaretsa go diragadiwa ga diponatshegelo tse 16 tse di tlhalositsweng mo go Tshenolo dikgaolo 1 go ya go 22 le ditiragalo tsa konokono tse Jesu a neng a bolelela pele ka tsone fa a ne a araba potso ya barutwa ba gagwe malebana le go nna gone ga gagwe. Fa letsatsi la Morena le fitlha mo setlhoeng sa lone, letsatsi le le boitshegang la ga Jehofa le tla bo le simolola fa a atlhola lefatshe la ga Satane le le boikepo. (Mathaio 24:3-14; Luke 21:11)—12/15, tsebe 11.

◻ Dingwe tsa dikarolo tse di tlhomologileng tsa Baebele ya Makarios ke dife?

Leina Jehofa le tlhagelela ka makgetlho a a fetang 3500 mo Baebeleng ya Makarios. Mokanoki mongwe wa dibuka tsa sedumedi tsa Se-Russia o ne a bolela jaana: “Thanolo [eno] e tsamaisana sentle le mokwalo wa Sehebera, mme puo e e dirisitsweng e itshekile e bile e tshwanela se e leng sone.”—12/15, tsebe 27.

◻ “Boammaaruri” jo Jesu a neng a re bo tla re golola ke bofe? (Johane 8:32)

Ka “boammaaruri,” Jesu o ne a bolela ka tshedimosetso e e tlhotlheleditsweng ke Modimo—segolo jang tshedimosetso e e malebana le go rata ga Modimo—e re e boloketsweng mo Baebeleng.—1/1, tsebe 3.

◻ Jehu le Jehonatabe ba segompieno ke bomang?

Jehu o tshwantshetsa Jesu Keresete, yo o emelwang mo lefatsheng ke “Iseraele wa Modimo,” Bakeresete ba ba tloditsweng. (Bagalatia 6:16; Tshenolo 12:17) Fela jaaka Jehonatabe a ile a tla go kgatlhantsha Jehu, “boidiidi jo bogolo” go tswa mo ditšhabeng bo ile jwa tla go thusa baemedi ba ga Jesu ba ba mo lefatsheng. (Tshenolo 7:9, 10; 2 Dikgosi 10:15)—1/1, tsebe 13.

◻ Ke eng se se kaiwang ke go “tsamaya le Modimo”? (Genesise 5:24; 6:9)

Go bolela gore ba ba dirang jalo, ba ba jaaka Enoke le Noa, ba ne ba itshwara ka tsela e e neng e bontsha tumelo e e nonofileng mo Modimong. Ba ne ba dira se Jehofa a neng a se ba laetse le go laola matshelo a bone go dumalana le se ba neng ba se itse malebana le ene fa a ntse a dirisana le batho.—1/15, tsebe 13.

◻ Ke ka ntlha yang fa motho a tshwanetse go rulaganya go sa le gale a rulaganyetsa gore fa a ka swa?

Ka tsela nngwe, go dira dithulaganyo tse di ntseng jalo ke mpho mo lelapeng la gago. Go bontsha lorato. Go supa gore o batla go ‘tlamela maloko a e leng a ntlo ya gago’ tota le fa o sa tlhole o na le bone. (1 Timotheo 5:8)—1/15, tsebe 22.

◻ Ke eng se “kgolagano e kgologolo” e neng ya se fitlhelela? (2 Bakorintha 3:14)

E ne e tshwantshetsa kgolagano e ntšha e bile, ka ditlhabelo tsa yone tse di neng di ntshiwa gantsintsi, e ne e bontsha kafa batho ba tlhokang thata go gololwa mo boleong le mo losong ka teng. E ne e le “mogogi . . . yo o gogelang kwa go Keresete.” (Bagalatia 3:24)—2/1, tsebe 14.

◻ Kgolagano e ntšha ke ya bosakhutleng ka ditsela dife? (Bahebera 13:20)

Sa ntlha, go farologana le kgolagano ya Molao, le ka motlha e ka se ka ya emisediwa ka e nngwe. Sa bobedi, matswela a go dira ga yone ke a a nnelang ruri. Mme sa boraro, babusiwa ba ba mo lefatsheng ba Bogosi jwa Modimo ba tla tswelela pele ba solegelwa molemo ke thulaganyo ya kgolagano e ntšha go ralala Dingwaga Tse di Sekete.—2/1, tsebe 22.

◻ Melemo e e nnang gone ka ntlha ya go leboga ke efe?

Boipelo jo motho a nang najo ka ntlha ya go leboga go tswa mo pelong bo oketsa boitumelo le kagiso ya gagwe. (Bapisa Diane 15:13, 15.) Mme e re ka go leboga e le nonofo e e siameng, go mo sireletsa gore a se ka a nna le maikutlo a a sa siamang a a jaaka bogale, lefufa le go kgopisega.—2/15, tsebe 4.

◻ Ba ba tsetsweng ka moya ba tseetswe kwa dikgolaganong dife?

Kgolagano e ntšha, e Jehofa a e dirang le maloko a Iseraele wa semoya, le kgolagano ya Bogosi, e Jesu a e dirang le balatedi ba dikgato tsa gagwe ba ba tloditsweng. (Luke 22:20, 28-30)—2/15, tsebe 16.

◻ Ke meletlo efe e meraro e megolo e Baiseraele ba neng ba laetswe gore ba nne gone kwa go yone?

Moletlo wa Dinkgwe Tse di sa Bedisiwang, o o neng o tla morago fela ga Tlolaganyo ya Nisane 14; Moletlo wa Dibeke, mo letsatsing la bo50 go tloga ka Nisane 16; le Moletlo wa go Rora, kana Moletlo wa Diobo, mo kgweding ya bosupa. (Duteronome 16:1-15)—3/1, ditsebe 8, 9.

◻ Ke ka ntlha yang fa e le tshiamelo go nna gone kwa dikokoanong tsa Bokeresete?

Jesu o ne a re: “Koo go nang le ba le babedi kgotsa ba le bararo ba phuthegile ka leina la me, ke gone koo mo gare ga bone.” (Mathaio 18:20; 28:20) Gape, tsela nngwe e e botlhokwa e re fepiwang semoyeng ka yone ke ka dipokano tsa phuthego le ka dikokoano tse dingwe tse dikgolo. (Mathaio 24:45)—3/1, tsebe 14.

◻ Leina Nimerode le simologile kae?

Bakanoki ba le mmalwa ba dumela gore leina Nimerode ga se leina le a le neilweng fa a tsholwa. Go na le moo ba tsaya gore ke leina le a le neilweng moragonyana go tshwanela botho jwa gagwe jwa botsuolodi, fa bo se na go lemotshega.—3/15, tsebe 25.

◻ Lelapa le botlhokwa go le kana kang mo setšhabeng?

Batho ba tlhoka lelapa. Hisetori e bontsha gore jaaka fa thulaganyo ya lelapa e ntse e fela, nonofo ya batho le ya ditšhaba e a koafala. Ka jalo lelapa le ama ka tlhamalalo go tlhomama ga setšhaba le go gola sentle ga bana le ga masika a mo isagweng.—4/1, tsebe 6.

◻ Ke dilo dife di le tharo tse di supang gore Baebele ke Lefoko la Modimo?

(1) E bua boammaaruri le mo dilong tsa saense; (2) e na le melaometheo e e sa felelweng ke nako e e leng mosola mo botshelong jwa gompieno; (3) e na le boporofeti jo bo opang kgomo lonaka jo bo ileng jwa diragadiwa, jaaka fa bo supiwa ke ditiragalo tsa hisitori.—4/1, tsebe 15.