A go Na le Mongwe yo o Amegang Tota?
“Dikeledi tsa ba ba patikwang” di fetogile noka. Ke dikeledi tsa batho ba bantsintsi ba ba tlhaselwang ka “dipatiko” mo lefatsheng lotlhe. Gantsi batho ba ba tlhaselwang ba ikutlwa ba “se na mogomotsi”—gore ga go na ope yo o amegang ka bone.—Moreri 4:1.
LE MORORO go na le noka e kana kana ya dikeledi, ba bangwe ga ba amiwe ke go bo bengkabone ba boga. Ba itlhokomolosa botlhoko jwa batho ba bangwe ka boomo, fela jaaka moperesiti le Molefi mo setshwantshong sa ga Jesu Keresete sa monna yo o neng a tlhasetswe, a kgothositswe mme a tlogetswe fa thoko ga tsela a le gaufi le go swa. (Luke 10:30-32) Fa fela dilo di sa ntse di tsamaela bone le malapa a bone sentle, ga ba tshwenyege ka batho ba bangwe. Tota e bile ba re, “Go kgathala mang?”
Ga re a tshwanela go gakgamadiwa ke seno. Moaposetoloi Paulo o ile a bolelela pele gore mo “malatsing a bofelo” batho ba le bantsi ba tla bo ba se na “katamalano e e bothitho ya tlholego.” (2 Timotheo 3:1, 3) Motho mongwe yo o elang dilo tlhoko o ne a hutsafala ka ntlha ya boikutlo jo bo leng teng jwa go sa amege. O ne a bolela jaana: “Filosofi ya bogologolo ya kwa Ireland le tlwaelo ya go amega ka ba bangwe le go abelana e tseetswe sebaka ke molao o mosha wa go nna pelotshetlha.” Lefatshe ka bophara, batho ba pelotshetlha, ga ba amege gotlhelele ka mathata a batho ba bangwe.
Go Tlhokega Mongwe Yo o Amegang
Tota go tlhokega mongwe yo o ka amegang. Ka sekai, akanya ka monna mongwe wa Mojeremane yo o neng a jewa ke bodutu yo o neng a “fitlhelwa a dutse fa pele ga thelebishene ya gagwe—dingwaga tse tlhano fa a se na go swa ka Keresemose.” Go ne go se na ope yo o neng a tlhologelelwa “motshelanosi yo o tlhadilweng yono wa segole” yo o neng a hutsafaditswe ke botshelo jwa gagwe jo bo sa itumediseng, go fitlha madi a gagwe a a neng a le mo bankeng a a duelelang rente ya gagwe a fela. Go ne go se na ope yo tota a neng a amega ka ene.
Akanya gape ka batho ba ba busiwang ke babusi ba ba maatla ba ba bogagapa. Mo lefelong lengwe, batho ba ba ka nnang 200 000 (kwatara ya baagi) “ba ne ba swa ka ntlha ya kgatelelo le lehuma” fa naga ya bone e sena go tsewa mo go bone ka dikgoka. Kana akanya ka bana bangwe ba ba neng ba tshwarwa ka bosetlhogo jo bo feteletseng thata. Pego nngwe e ne ya bolela jaana: “Palo ya bana ba [naga nngwe] ba ba neng ba bona bosetlhogo jo bontsi—dipolao, dititeo, petelelo tse ka nako tse dingwe di neng di dirwa ke bana ba bangwe ba dingwaga tsa bolesome e a boitshega.” O ka tlhaloganya fa motho yo o boneng tshiamololo e e kana kana a ka botsa a hutsafetse gore “A tota go na le mongwe yo o amegang ka nna?”
Go ya ka pego nngwe ya lekgotla la Ditšhaba Tse di Kopaneng, batho ba le dikete di le dimilione di le 1,3 mo dinageng tse di tlhabologang ba tshwanetse go tshela ka madi a a lekanang le a a kwa tlase ga diranta di le tlhano ka letsatsi. Ba tshwanetse ba bo ba ipotsa gore a go na le mongwe yo o amegang ka bone. Pego nngwe mo go The Irish Times ya re tota le diketekete tsa batshabi “ba tshwanelwa ke go nna mo dikampeng tse di tlhomolang pelo kana mo nageng e e sa ba tshwareng sentle kana go leka go boela kwa nagagaeng ya bone e e sentsweng [kana, e e tlhatlhamolotsweng] ke ntwa kana dikgaogano tsa setso.” Yone pego eo e akaretsa kgato eno e e tsitlisang marapo: “Tswala matlho a gago o bo o bala go fitlha go tharo, go sa tswa go swa ngwana a le mongwe. Ke mongwe wa bana ba le 35 000 ba ba tla swang gompieno ka ntlha ya phepelotlase kana malwetse a a ka thibelwang.” Ga go gakgamatse go bo ba le bantsi ba ngomogile pelo e bile ba galefile!—Bapisa Jobe 7:11.
A dilo tseno di tshwanetse go diragala ka tsela eno? A tota go na le mongwe yo o sa amegeng fela mme e bile a nang le maatla a go emisa pogo le go fedisa botlhoko jotlhe jo batho ba bo utlwang?
[Motswedi wa Setshwantsho mo go tsebe 2]
Cover and page 32: Reuters/Nikola Solic/Archive Photos
[Motswedi wa Setshwantsho mo go tsebe 3]
A. Boulat/Sipa Press