O Kgona go Buisana Sentle go le Kana Kang le Molekane wa Gago?

“LEKWALO la Lerato le le Kwadilweng ke Motho wa Dingwaga Tse 60.” Seo e ne e le setlhogo sa kgaisano e e neng e dirwa ke banka nngwe kwa Japane dingwaga di sekae tse di fetileng. E ne e kopa Bajapane ba dingwaga tse di magareng ga 50 le 60 gore ba tlhalose “tsela e ba ikutlwang ka yone tota” ka batho ba ba nyalaneng le bone. Mongwe wa bone o ne a kwalela mosadi wa gagwe a re: “O ka nna wa ipolaya ka ditshego, mme ke tshwanetse go bua seno, ke bua ke tlhatswegile pelo ka re: Ke itumelela go bo ke go nyetse.”

Mo dingwaong tse di farologaneng, go akaretsa ngwao ya kwa dinageng tsa Botlhaba, batho ga ba kgothalediwe go ntsha maikutlo a bone ba gololesegile. Mme batho ba feta 15 000 ba ne ba tsenela kgaisano eno ya makwalo a lorato. Batho ba ne ba e ratile thata mo e leng gore go ne ga dirwa kgaisano e nngwe gape morago ga yone, mme go ne ga gatisiwa dibuka tse di neng di theilwe mo makwalong ao. Seno se bontsha gore batho ba bantsi ba na le keletso e kgolo ya go tlhalosa kafa ba ikutlwang ka teng ka balekane ba bone ba ba ba ratang. Le fa go ntse jalo, go na le ba ba sa rateng go tlhalosetsa balekane ba bone kafa ba ikutlwang ka teng. Ka ntlha yang? E ka tswa e le ka gonne go tlhokega gore ba dire maiteko ba bo ba nne le bokgoni gore ba kgone go tlhalosetsa batho ba bangwe kafa ba ikutlwang ka teng—go akaretsa balekane ba bone.

Hitoshi Kato, yo o kwadileng buka ka go tlogela tiro a re mo banyalaning ba ba godileng ba kwa Japane, gantsi basadi ke bone ba simololang ka dikgang tsa go tlhala banna ba bone ka gonne ba sa bolo go boloka dikgopi ka dingwagangwaga. A re: “Mme gape ke matswela a go bo banyalani ba sa buisane fa ba na le mathata.”

Fa monna a tlogela tiro, a ka nna a gakgamala fela fa a bona mosadi wa gagwe a mo naya lekwalo la tlhalo. Go ka tswa go fetile dingwaga di le dintsi banyalani bano ba sa tlhalose kafa ba ikutlwang ka teng ka molekane wa bone wa lenyalo. Monna le mosadi ba ka tswa ba kile ba leka go ntsha maikutlo a bone mme ba palelwa ke go buisana sentle. Go na le gore ba godise kamano ya bone e e molemo, gantsi ba ne ba iphitlhela ba gagautlhana ka mafoko.

Monna le mosadi ba ka rarabolola jang dikgotlhang tsa bone ka kagiso le go tlhalosa maikutlo a bone ka tsela e e siameng? O tla itumelela go itse gore dikakantsho tse di molemo go gaisa tsotlhe tse di leng teng, di fitlhelwa mo Baebeleng e e sa bolong go kwalwa bogologolo e bile e sa bolo go ratwa thata ke batho ka makgolokgolo a dingwaga—e seng mo bukeng nngwe e e kwadilweng bosheng ke mogakolodi mongwe wa tsa manyalo.