Go Bua Boammaaruri—A re Go Lebeletse Fela mo Bathong ba Bangwe?

MOSETSANA mongwe wa dingwaga tse 16 o ne a re: “Ke tlhoile maaka, e bile ke tlhoile go akediwa!” Eo ke tsela e bontsi jwa rona re ikutlwang ka yone. Re rata go akanya gore tshedimosetso e re e newang—ka molomo kana e kwadilwe—e boammaaruri. A mme rona re bua boammaaruri fa re naya ba bangwe tshedimosetso?

Mo patlisisong e e dirilweng kwa Jeremane, batho ba bantsi ba ba neng ba botsolodiwa ba ne ba re “go siame go bua maaka mo dilong tse di sa reng sepe gore motho a itshireletse kana a sireletse ba bangwe, e bile tota go a tlhokega gore batho ba tle ba kgone go dirisana sentle mmogo.” Mokwadi mongwe wa dikgang ene o ne a kwala a re: “Go bua boammaaruri fela ka dinako tsotlhe ke selo se se siameng se se molemo mme go dira gore botshelo bo se ka jwa kgatlha.”

A re ka tswa re batla gore batho ba bangwe ba bue boammaaruri mme rona ka dinako tse dingwe re dumela gore re na le mabaka a a utlwalang a go sa bue boammaaruri? A go a kgathalesega gore a re bua boammaaruri kana nnyaa? Diphelelo tsa go sa bue boammaaruri ke dife?

Tshenyo e e Bakwang ke Maaka

Akanya ka tshenyo e e ka bakwang ke maaka. Maaka a dira gore balekane ba lenyalo le maloko a lelapa ba se ka ba tshepana. Tshebo e e seng boammaaruri e ka senya motho seriti. Badiri ba ba tsietsang ba dira gore ditshenyegelo tsa go tsweledisa kgwebo di ye kwa godimo mme seo se dira gore dilo tse di dirwang mo kgwebong eo di nne turu. Fa batho ba kwala maaka mo diforomong tsa lekgetho seo se dira gore dipuso di tlhoke madi a go dira ditirelo tsa setšhaba. Tshedimosetso ya maaka e e ntshiwang ke babatlisisi e ka senya ditiro tsa batho tse go neng go lebega di tla tswelela sentle le go senya maina a dikolo kana mekgatlho e babatlisisi bao ba e berekelang. Ditsela tse di sa tlhamalalang tsa go nna le madi a mantsi mo nakong e khutshwane di tseela batho ba ba beeletsang madi mo go tsone madi a ba a bereketseng botshelo jotlhe kana di nna le diphelelo tse di maswe go feta seo. Ke sone se Baebele e re bolelelang gore gareng ga dilo tse di makgapha mo go Jehofa Modimo ke “loleme lo lo maaka” le “mosupi wa maaka yo o bilolang maaka”!—Diane 6:16-19.

Go anamisa maaka go ka senya dilo, go ka senyetsa batho kana setšhaba sotlhe ka kakaretso. Ga go na ope yo o ka ganetsang seo. Fa go ntse jalo, ke ka ntlha yang fa batho ba bua maaka ka boomo? Mme a kgang nngwe le nngwe e e seng boammaaruri ke maaka? Re tla bona dikarabo tsa dipotso tseno le tse dingwe mo setlhogong se se latelang.

[Setshwantsho mo go tsebe 3]

Maaka a dira gore banyalani ba se ka ba tshepana