“Ruri Leno ke Leina le le Boitshepotshepo le le Legolo la Modimo”

Mafoko ao a ne a buiwa ke Nicholas wa Cusa mo therong ya gagwe ka ngwaga wa 1430.a E ne e le motho yo o kgatlhegelang go ithuta dilo tse dintsi. Ka sekai, o ne a ithuta Segerika, Sehebera, filosofi, thutabodumedi, dipalo le thutodinaledi. Fa a na le dingwaga tse 22, o ne a nna moitse wa molao wa kereke ya Katoliki ya Roma. Ka 1448 o ne a tlhongwa go nna moruti.

Dingwaga di ka nna 550 tse di fetileng, Nicholas wa Cusa o ne a tlhoma legae la go tlhokomela batsofe kwa Kues, e jaanong e bidiwang Bernkastel-Kues, motse o o sekgala sa dikilometara di ka nna 130 go ela kwa borwa jwa Bonn, kwa Jeremane. Mo go yone kago eno jaanong go na le laeborari ya ga Cusa e e nang le mekwalo ya seatla e feta 310. Mongwe wa mekwalo eno ke o o bidiwang Codex Cusanus 220 o thero ya ga Cusa ya 1430 e tlhagang mo go one. Mo therong eo, In principio erat verbum (Mo Tshimologong Lefoko O ne A le Gone), Nicholas wa Cusa o ne a dirisa tsela ya Selatine ya go peleta Jehofa, e leng Iehoua.b Mo tsebe 56 go kwadilwe mafoko ano mabapi le leina la Modimo: “Ke leina le Modimo a le iphileng. Ke ditlhaka tse nnè tsa Sehebera tse di dirisiwang go kwala leina la Modimo. . . . Ruri leno ke leina le le boitshepotshepo le le legolo la Modimo.” Mafoko a ga Nicholas wa Cusa a dumalana le ntlha ya gore leina la Modimo le teng mo mekwalong ya ntlhantlha ya Dikwalo tsa Sehebera.—Ekes. 6:3.

Mokwalo ono wa bogologolo wa lekgolo la bo15 la dingwaga ke mongwe wa mekwalo ya bogologolo thata e leina la Modimo le le kwalwang ka ditlhaka tse nnè tsa Sehebera le kwadilweng go twe “Iehoua” mo go yone. Mokwalo ono ke bosupi jo bongwe gape jo bo bontshang gore ditsela tse dingwe tsa go kwala leina la Modimo tse di tshwanang le “Jehofa” ga di bolo go dirisiwa thata ka dingwagangwaga mo mekwalong fa go kwalwa leina la Modimo.

[Dintlha tse di kwa tlase]

[Setshwantsho mo go tsebe 16]

Laeborari ya ga Cusa