Thuto e le Nngwe ya Maaka e Dirile Gore go Nne le Tse Dingwe

MOAPOSETOLOI PAULO o ne a kwalela Bakeresete ba ba neng ba tshela mo bofelong jwa lekgolo la ntlha la dingwaga C.E. a re: “Disang.” O ne a ba tlhagisa ka eng? “Gongwe go ka tswa go na le mongwe yo o tla lo tsayang jaaka ba a ba tsomileng a dirisa botlhajana le tsietso e e lolea go ya ka ngwao ya batho.”—Bakolosa 2:8.

Le fa Paulo a ne a ntsha tlhagiso eo, mo bogareng jwa lekgolo la bobedi la dingwaga C.E., Bakeresete bangwe ba ne ba simolola go dirisa dikgopolo tse di neng di rotloediwa ke borafilosofi ba bogologolo go tlhalosa dilo tse ba di dumelang. Ka ntlha yang? Ba ne ba batla go amogelwa ke batho ba ba rutegileng ba Mmusomogolo wa Roma le gore ba sokolole batho ba le bantsi.

Mongwe wa Bakeresete bao ba ba itsegeng thata e bong Justin Martyr, o ne a dumela gore Mmueledi wa Modimo o ne a iponaditse mo baitsefilosofing ba Bagerika ba ba neng ba tshela bogologolo pele Jesu a tla mo lefatsheng. Go ya ka Justin le barutisi ba ba neng ba ruta dikgopolo tse di tshwanang le tsa gagwe, go dirisa difilosofi le dithuto tsa maaka mo Bokereseteng go dirile gore batho ba le bantsi ba rate mofuta ono wa bodumedi.

Dithuto tsa ga Justin Martyr tse go tweng ke tsa Bokeresete di ne tsa dira gore batho ba le bantsi ba sokologe. Le fa go ntse jalo, go dirisa thuto e le nngwe ya maaka go ne ga dira gore go nne le tse dingwe mme kwa bofelong go ne ga nna le se gompieno se bidiwang dithuto tsa Bokeresete. Go bontsha gore dithuto tseno ga di boammaaruri, bapisa se dibuka tse di latelang di se buang le se tota Baebele e se rutang.