Dipotso Tse di Tswang Kwa Babading
Mmuso wa Lefatshe Lotlhe wa Maesemane le Maamerika o ne wa nna leng mmuso wa lefatshe wa bosupa o boporofeti jwa Baebele bo buileng ka one?
▪ Setshwantsho se segolo sa metale se Kgosi Nebukadenesare a se boneng, ga se emele mebuso yotlhe ya lefatshe. (Dan. 2:31-45) Se bontsha mebuso e le metlhano fela e e neng e busa go simolola mo motlheng wa ga Daniele go ya pele le e e neng ya nna le dikamano tse di rileng le batho ba Modimo.
Tlhaloso ya ga Daniele ya setshwantsho sa metale e bontsha ntlha ya gore Mmuso wa Lefatshe Lotlhe wa Maesemane le Maamerika o ne o tla tswa mo go Roma, e seng gore o ne o tla e fenya. Mo setshwantshong seo, Daniele o bona tshipi e e mo maotong e tswelela go fitlha kwa dinaong le kwa menwaneng ya maoto. (Mo dinaong le mo menwaneng ya maoto, tshipi e kopantswe le letsopa.)a Tlhaloso eo e bontsha gore Mmuso wa Lefatshe Lotlhe wa Maesemane le Maamerika o tla tlhaga mo maotong a tshipi. Hisitori e bontsha go nepa ga tlhaloso eo. Boritane, e e neng e le karolo ya Mmusomogolo wa Roma e ne ya simolola go tlhagelela kwa bofelong jwa dingwaga tsa bo1700. Moragonyana, United States of America le yone e ne ya simolola go nna setšhaba se se maatla. Le fa go ntse jalo, mmuso wa lefatshe lotlhe wa bosupa o Baebele e porofetileng ka one o ne o ise o nne gone. Ka ntlha yang? Boritane le United States di ne di ise di simolole go dirisana mmogo ka tsela e e kgethegileng. Seo se ne sa direga ka nako ya Ntwa ya Lefatshe ya I.
Ka nako eo, “bana ba bogosi” ba ne ba tsweletse ka tiro ya bone, bontsi jwa bone ba ne ba le kwa United States, ntlokgolo ya bone e ne e le kwa Brooklyn, New York. (Math. 13:36-43) Maloko a setlhopha sa batlodiwa a ne a rera ka tlhoafalo mo dinageng tse di neng di laolwa ke Mmusomogolo wa Boritane. Ka nako ya Ntwa ya Lefatshe ya I, Boritane le Amerika di ne tsa nna le kamano e e kgethegileng fa di ne di lwa le baba ba tsone ba dipolotiki. Gape di ne tsa nna le boipelafatso jwa bomorafe ka ntlha ya ntwa eo mme tsa bontsha bobaba kgatlhanong le ba e neng e le karolo ya losika lwa “mosadi” wa Modimo, tsa thibela dikgatiso tse ba neng ba di gatisitse, mme ba ba neng ba etelelapele mo tirong ya go rera ba ne ba tsenngwa mo dikgolegelong.—Tshen. 12:17.
Ka jalo, go ya ka se re se balang mo boporofeting jwa Baebele, mmuso wa lefatshe wa bosupa ga o a tlhomiwa kwa bofelong jwa dingwaga tsa bo1700 fa Boritane e ne e simolola go tlhagelela la ntlha. Go na le moo, o ne wa tlhomiwa kwa tshimologong ya letsatsi la Morena.b
[Dintlha tse di kwa tlase]
a Letsopa le le kopaneng le tshipi le emela dilo dingwe mo Mmusong wa Lefatshe Lotlhe wa Maesemane le Maamerika o o jaaka tshipi. Fa nako e ntse e ya, letsopa leno le ne la thatafaletsa mmuso ono gore o nonofe jaaka o ne o ka batla.
b Tlhaloso eno e baakanya tshedimosetso e re tlotlileng ka yone mo go tsebe 57, serapa 24 sa buka ya Boporofeti Jwa ga Daniele, le e e bontshitsweng mo tšhateng e e mo go tsebe 56 le 139.
[Setshwantsho mo go tsebe 19]
Bakaulengwe ba le robedi ba ba tswang kwa ntlokgolo ya Watchtower ba ne ba tsenngwa mo kgolegelong ka June 1918