SETLHOGO SA KA FA NTLE | A MODIMO O A GO KGATLHEGELA?
Modimo O a Go Tlhaloganya
“Wena Jehofa, o ntlhatlhobile, mme o a nkitse.”—PESALEMA 139:1.
“Matlho a gago a ne a mpona ke le losea lo lo mo popelong.”—PESALEMA 139:16
LEBAKA LA GO BO BANGWE BA BELAELA: Batho ba le bantsi ba akanya gore Modimo o leba batho e le baleofi—ba ba leswafetseng e bile ba sa tshwanelwe ke gore a ba kgathalele. Kendra yo o nang le bolwetse jwa go tshwenyega thata mo maikutlong, o ne a ikutlwa molato thata ka gonne a sa kgone go dira sotlhe se Modimo a se batlang. Ka ntlha ya seo, o ne a re, “Ke ne ka kgaotsa go rapela.”
SE LEFOKO LA MODIMO LE SE RUTANG: Jehofa ga a tlhome mogopolo mo diphosong tsa gago mme o tlhaloganya se tota o leng sone. Baebele ya re: “O itse popego ya rona sentle, a gakologelwa gore re lorole.” Gape ga a dirisane le rona go ya “kafa maleong a rona,” mme ka bopelotlhomogi o a re itshwarela fa re ikwatlhaya.—Pesalema 103:10, 14.
Akanya ka Dafide, kgosi ya kwa Iseraele e go builweng ka yone mo setlhogong sa ntlha sa motseletsele ono. Dafide o ne a rapela Modimo a re: “Matlho a gago a ne a mpona ke le losea lo lo mo popelong, mme dikarolo tsotlhe tsa lone di ne di kwadilwe mo bukeng ya gago . . . Mphukutse, tlhe Modimo, o itse pelo ya me.” (Pesalema 139:16, 23) Dafide o ne a tlhatswegile pelo gore le fa a ile a leofa—ka dinako dingwe e le boleo jo bo masisi—Jehofa o ne a kgona go bona pelo ya gagwe e e ikwatlhayang.
Jehofa o go tlhaloganya go feta motho ope fela. Baebele ya re: “Motho fela o bona se se bonalang mo matlhong; mme Jehofa ene, o bona se pelo e leng sone.” (1 Samuele 16:7) Modimo o tlhaloganya tsela e o itshwarang ka yone—gore se o se goditseng mo batsading ba gago, tsela e o godileng ka yone, lefelo le o goletseng kwa go lone le botho jwa gago di dira gore o nne motho yo o leng ene gone jaanong. Le fa gone o dira diphoso, o bona matsapa a o a tsayang go tokafatsa se o leng sone e bile o a a anaanela.
E re ka Modimo a tlhaloganya se tota o leng sone, a ka go gomotsa jang?