Fa Botshelo bo Setse bo go Utlwaletse

Ka sekai, Sallya o ile a senyegelwa ke dilo tsa gagwe fa go ne go na le setsuatsue kwa United States. Sally a re: “Ke ne ke utlwile botlhoko mo e neng e kete nkare lefatshe phatloga ke tsene.”

Selo se sengwe se se ka dirang gore go nne thata go itshoka, ke fa o tlhokafaletswe. Janice wa kwa Australia a re: “Fa ke sena go tlhokafalelwa ke bana ba basimane ba babedi, ke ne ke phatlogile pelo, ke tlaletswe e bile ke sa itse gore ke direng. Ke ne ka bolelela Modimo gore ga ke tlhole ke kgona go itshokela botlhoko jono, ga ke tlhole ke batla go tshela e bile a ntlogele ke swe!”

Daniel le ene o ne a utlwa botlhoko thata fa a utlwa gore mosadi wa gagwe o ne a ratana le monna yo mongwe. Daniel a re: “Fa mosadi wa me a mpolelela gore o ntse a ratana le monna yo mongwe, e ne e kete motho o ntlhabile ka sengwe mo pelong. Nako le nako fa ke akanya ka kgang eno, ke ne ke utlwa botlhoko jo le nna ke neng ke sa bo tlhaloganye.”

Makasine ono o tla go thusa go bona gore ke eng fa o tshwanetse go tswelela o itshokile le:

• Fa o wetswe ke masetlapelo

• Fa o tlhokafaletswe

• Fa mokapelo wa gago a ratana

• Fa o lwala thata

• Fa o utlwaletswe ke botshelo

A re tlotle ka selo sa ntlha se se ka dirang gore go nne thata go itshoka: fa o wetswe ke masetlapelo.