Fetola Dikakanyo Tse di Kgatlhanong le Kitso ka ga Modimo!

1. Moaposetoloi Paulo o ile a naya Bakeresete ba ba tloditsweng tlhagiso efe?

PAULO o ile a tlhagisa Bakeresete ba lekgolo la ntlha la dingwaga jaana: “Tlogelang go bopega jaaka tsamaiso eno ya dilo.” (Bar. 12:2) Ke eng fa a ile a tlhagisa bakaulengwe le bokgaitsadi ba ba neng ba ineetse mo Modimong e bile ba tloditswe ka moya o o boitshepo?—Bar. 1:7.

2-3. Satane o leka jang go re tlhoboganya le Jehofa, mme re ka fetola jang tsela e e sa siamang e re akanyang ka yone?

² Paulo o ne a tshwenyegile ka gonne Bakeresete bangwe ba ne ba tlhotlhelediwa ke dikakanyo tse di sa siamang le difilosofi tse di tlhotlheleditsweng ke Satane. (Baef. 4:17-19) Seno se ka diragalela mongwe le mongwe wa rona. Satane o batla gore re tlhanogele Jehofa, ka jalo, o dirisa ditsela tse di farologaneng go leka go re tsietsa. Ka sekai, fa e le gore re batla go tuma, a ka dirisa seo go dira gore re tlhanogele Jehofa. A ka nna a dirisa dilo tse re di ithutileng kwa gae, kwa sekolong le mo bathong ba bangwe go tlhotlheletsa tsela e re akanyang ka yone.

³ A go a kgonega gore re fetole dilo tse di “nweleletseng kwa teng thata” mo megopolong ya rona? (2 Bakor. 10:4) Paulo o ile a re: “Re pitikolola dikakanyo le selo sengwe le sengwe se se kwa godimo se se goleditsweng kgatlhanong le kitso ka ga Modimo; mme re tsenya kakanyo nngwe le nngwe mo botshwarong go e dira gore e utlwe Keresete.” (2 Bakor. 10:5) Jehofa a ka re thusa go fetola mekgwa e e sa siamang e re ka tswang re na le yone. Fela jaaka molemo o kgona go lwantsha tšhefu, Lefoko la Modimo le ka re thusa go lwantsha mekgwa e e sa siamang.

‘FETOLA MOGOPOLO WA GAGO’

4. Bontsi jwa rona re ne ra tshwanelwa ke go dira diphetogo dife fa re ne re simolola go ithuta Baebele?

⁴ Akanya ka diphetogo tse o ileng wa tshwanelwa ke go di dira fa o ne o simolola go ithuta Baebele le fa o ne o ineela mo go Jehofa. Bontsi jwa rona re ne ra tshwanelwa ke go tlogela go dira dilo tse di sa siamang. (1 Bakor. 6:9-11) Re leboga Jehofa go bo a ile a re thusa go tlogela dilo tseo.

5. Go ya ka Baroma 12:2, re tshwanetse go dira dilo dife tse pedi?

⁵ Mme gone, ga re a tshwanela go akanya gore ga re tlhoke go tswelela re dira diphetogo. Le fa gone re sa tlhole re dira maleo a a masisi a re neng re a dira pele re kolobediwa, re tshwanetse go nna kelotlhoko gore re se ka ra dira sepe se se ka re raelang go boa re dira maleo ao gape. Ke eng se se ka re thusang? Baebele ya re: “Tlogelang go bopega jaaka tsamaiso eno ya dilo, mme lo fetolwe ka go fetola megopolo ya lona.” (Bar. 12:2) Ka jalo, re tshwanetse go dira dilo tse pedi. Sa ntlha, re tshwanetse go ‘tlogela go bopega jaaka tsamaiso eno ya dilo,’ kgotsa go tlhotlhelediwa ke lefatshe leno. Sa bobedi, re tshwanetse go fetola tsela e re akanyang ka yone kgotsa mekgwa ya rona.

6. Re ithuta eng mo go se Jesu a ileng a se bua mo go Mathaio 12:43-45?

⁶ Go fetoga go Paulo a buang ka gone ga go kaye go fetola tsela e re lebegang ka yone. Go kaya go fetola se re leng sone ka fa teng. (Bona lebokoso le le reng “A o Fetogile Kgotsa o Itira e Kete o Fetogile?”) Re tshwanetse go fetola dikakanyo tsa rona, maikutlo a rona le dilo tse re di eletsang. Ka jalo, rotlhe re tshwanetse go ipotsa jaana: ‘A ke itira e kete ke a fetoga fela gore ke kgatlhe ba bangwe, kgotsa a ruri ke fetola se ke leng sone ka fa teng?’ Mafoko a ga Jesu a a mo go Mathaio 12:43-45, a bontsha se re tshwanetseng go se dira. (E bale.) Se Jesu a ileng a se bua se re ruta thuto eno ya botlhokwa: Ga go a lekana fela gore re tlogele go akanya ka dilo tse di sa siamang, fa re sena go di tlogela, re tshwanetse go akanya ka dilo tse Modimo a di amogelang.

‘DIRWA MOSHA MO MAATLENG A A TLHOTLHELETSANG MOGOPOLO WA GAGO’

7. Ke eng se se ka re thusang go fetola se re leng sone ka fa teng?

⁷ A re ka kgona go fetola se re leng sone ka fa teng? Lefoko la Modimo la re: “Lo dirwe basha mo maatleng a a tlhotlheletsang mogopolo wa lona, le gore lo apare botho jo bosha jo bo neng jwa bopiwa go ya ka go rata ga Modimo mo tshiamong ya boammaaruri le boikanyegi.” (Baef. 4:23, 24) Ee, re ka kgona go fetola se re leng sone ka fa teng, mme gone, ga go motlhofo. Re tshwanetse go tila dikeletso tse di sa siamang e bile re tshwanetse go tlogela go dira dilo tse di maswe. Mme ga go felele foo. Gape re tshwanetse go fetola megopolo ya rona. Seno se akaretsa dilo tse re di eletsang, boitshwaro jwa rona le mabaka a go bo re dira dilo. Go dira jalo go tlhoka gore re tseye matsapa le gore re se ka ra ineela.

8-9. Se se diragaletseng mokaulengwe mongwe se bontsha jang gore go botlhokwa go fetola se re leng sone ka fa teng?

⁸ Mma re tlotle ka sekai sa mokaulengwe mongwe yo o neng a rata ntwa pele e nna Mosupi. O ne a rata bojalwa e bile a rata go lwa mme moragonyana o ile a tlogela mekgwa eo a bo a kolobediwa. Seno se ile sa kgatlha batho ba le bantsi mo lefelong la bone. Fa a sena go kolobediwa, letsatsi lengwe o ile a kopana le teko e a neng a sa e lebelela. Monna mongwe o ne a ya kwa ga gagwe a tagilwe e bile a batla go mo lwantsha. Kwa tshimologong, mokaulengwe yono o ile a mo itlhokomolosa. Monna yoo o ne a simolola go tlhapatsa Jehofa mme mokaulengwe wa rona o ile a galefa fela thata. O ne a mo latela a bo a mo itaya. Ke eng fa a ile a dira jalo? Le fa gone go ithuta Baebele go ile ga mo thusa gore a se ka a rata ntwa jaaka pele, bothata e ne e le gore o ne a ise a fetole se a leng sone ka fa teng.

⁹ Mme gone, mokaulengwe yono ga a ka a ineela. (Dia. 24:16) Bagolwane ba ile ba mo thusa gore a nne a dire diphetogo. Morago ga nako o ile a nna mogolwane. Letsatsi lengwe o ile a lebana le teko e e tshwanang le e a kileng a lebana le yone mo nakong e e fetileng. Monna mongwe yo o tagilweng o ne a le kwa ntle ga Holo ya Bogosi mme a batla go betsa mogolwane mongwe. Mokaulengwe yono o ile a dirang? O ile a bua le monna yoo a ikokobeditse a bo a mo thusa gore a wele makgwafo, go tswa foo, o ile a mo isa gae. Ke eng fa a ile a dira jalo? O ne a fetotse se a leng sone ka fa teng. Jaanong e ne e le motho yo o ratang kagiso le yo o boikokobetso. Seno se ile sa dira gore Jehofa a bakwe.

10. Fa re batla go fetola se re leng sone ka fa teng, re tshwanetse go dira eng?

¹⁰ Ga re ka ke ra fetoga ka ponyo ya leitlho e bile ga re ka ke ra fetoga fa re sa tseye matsapa. Re ka nna ra tshwanelwa ke go iteka ka “tlhoafalo” dingwaga di le dintsi. (2 Pet. 1:5) Ga re kitla re fetoga fela ka gonne re na le nako e e telele re direla Jehofa. Re tshwanetse go tsaya matsapa gore re fetole se re leng sone ka fa teng. Go na le dilo dingwe tse di ka re thusang. Mma re tlotle ka di le mmalwa.

KE ENG SE SE KA GO THUSANG GO FETOGA?

11. Go rapela go ka re thusa jang go fetoga?

¹¹ Selo sa ntlha se re tshwanetseng go se dira ke go rapela. Re tshwanetse go rapela jaaka mopesalema yo o neng a re: “Bopa pelo e e itshekileng mo go nna, tlhe Modimo, mme o tsenye moya o mosha mo teng ga me, o o nitameng.” (Pes. 51:10) Re tshwanetse go lemoga gore re tlhoka go fetoga re bo re kopa Jehofa gore a re thuse. Re itse jang gore Jehofa o tla re thusa go fetoga? Re ka kgothadiwa ke se Jehofa a ileng a se solofetsa Baiseraele ba ba tlhogoethata. O ne a re: “Ke tla ba naya pelo e le nngwe fela, mme ke tla tsenya moya o mosha mo go bone . . . mme ke ba neye pelo ya nama,” e leng pelo e e iketleeleditseng go ikobela melao ya Modimo. (Esek. 11:19) Jehofa o ne a batla go ba thusa gore ba fetoge, mme le rona o tla re thusa.

12-13. (a) Go ya ka Pesalema 119:59, re tshwanetse go tlhatlhanya ka eng? (b) O tshwanetse go ipotsa dipotso dife?

¹² Gape go botlhokwa gore re tlhatlhanye ka dilo tse re di ithutang. Fa re bala Lefoko la Modimo letsatsi le letsatsi, re tshwanetse go ipha nako ya go tlhatlhanya kgotsa go akanya ka dilo tse re di balang gore re kgone go lemoga mekgwa e re tshwanetseng go e fetola. (Bala Pesalema 119:59; Baheb. 4:12; Jak. 1:25) Re tshwanetse go leka go bona gore a re ka tswa re na le mekgwa mengwe e e tlhotlhelediwang ke difilosofi tsa lefatshe. Re tshwanetse go amogela gore re na le makoa, re bo re dira ka natla go a baakanya.

¹³ Ka sekai, ipotse jaana: ‘A ke na le mokgwa wa go fufegela ba bangwe?’ (1 Pet. 2:1) ‘A ke tsaya gore ke botoka go na le batho ba bangwe ka ntlha ya kwa ke goletseng teng, ka gonne ke rutegile kgotsa ka gonne ke na le madi?’ (Dia. 16:5) ‘A ke nyenyefatsa batho ba ba se nang dilo tse ke nang le tsone kgotsa ba lotso lo longwe?’ (Jak. 2:2-4) ‘A ke rata dilo tsa lefatshe leno?’ (1 Joh. 2:15-17) ‘A ke rata boitlosobodutu jo bo tletseng boitsholo jo bo sa siamang le thubakanyo?’ (Pes. 97:10; 101:3; Amos. 5:15) Go araba dipotso tseno go tla go thusa go lemoga gore o na le bokoa bofe. Fa re ka kgona go fetola mekgwa e e sa siamang e e “nweleletseng kwa teng thata” mo dipelong tsa rona, Jehofa o tla itumela.—Pes. 19:14.

14. Ke eng fa go le botlhokwa gore re tlhophe ditsala tse di siameng?

¹⁴ Gape re tshwanetse go tlhopha ditsala tse di siameng. Boammaaruri ke gore, ditsala tsa rona di a re tlhotlheletsa. (Dia. 13:20) Re tshela le batho ba ba sa re kgothaletseng go akanya ka dilo tse Modimo a di amogelang, e ka tswa e le kwa sekolong kgotsa kwa tirong. Le fa go ntse jalo, re ka kgona go bona ditsala tse di siameng kwa dipokanong tsa rona. Fa re le koo, Bakeresetemmogo le rona ba re “[tlhotlheletsa] mo loratong le mo ditirong tse di molemo.”—Baheb. 10:24, 25.

“TSEPAMISIWA MO TUMELONG”

15-16. Satane o leka jang go fetola tsela e re akanyang ka yone?

¹⁵ O se ka wa lebala gore Satane o batla go fetola tsela e re akanyang ka yone. O dirisa maano otlhe go leka go re thibela gore re se ka ra kaelwa ke Lefoko la Modimo.

¹⁶ Satane o sa ntse a botsa potso eno e a ileng a e botsa Efa kwa tshimong ya Edene: “A tota go ntse jalo gore Modimo o rile . . . ?” (Gen. 3:1) Mo lefatsheng leno le le laolwang ke Satane, go le gantsi re utlwa batho ba botsa dipotso tse di jaaka tseno: ‘A tota Modimo ga a amogele lenyalo la batho ba bong jo bo tshwanang? A tota Modimo ga a batle lo keteka Keresemose le malatsi a botsalo? A tota Modimo ga a batle lo tshelwa madi? A tota Modimo yo o lorato ga a batle lo dirisana le batho ba lo ba ratang ba ba kgaotsweng?’

17. Re tshwanetse go dira eng fa mongwe a re botsa dipotso ka se re se dumelang, mme go ya ka Bakolosa 2:6 le 7, go dira jalo go tla re solegela molemo jang?

¹⁷ Re tshwanetse go tlhatswega pelo gore dilo tse re di dumelang ke boammaaruri. Fa re sa tseye matsapa go batla dikarabo tsa dipotso tse batho ba di botsang ka se re se dumelang, re ka nna ra simolola go belaela gore a mme se re se dumelang ke boammaaruri. Dipelaelo tseo di ka feleletsa di dira gore re se ka ra tlhola re dumela mo Modimong. Ka jalo, re tshwanetse go dira eng? Baebele ya re re fetole tsela e re akanyang ka yone gore re kgone go iponela “thato ya Modimo e e molemo le e e amogelesegang le e e itekanetseng.” (Bar. 12:2) Fa re ithuta Baebele ka metlha, re tla tlhatswega pelo gore se re se ithutang mo go yone ke boammaaruri le gore melao ya ga Jehofa e siame. Fa re dira jalo, re tla tshwana le setlhare se se nang le medi e e nonofileng, re tla nonofa e bile re tla “tsepamisiwa mo tumelong.”—Bala Bakolosa 2:6, 7.

18. Ke eng se se ka re thusang go itshireletsa gore re se ka ra tlhotlhelediwa ke lefatshe la ga Satane?

¹⁸ Mongwe le mongwe o tshwanetse go nonotsha tumelo ya gagwe. Ka jalo, tswelela o tsaya matsapa go fetola se o leng sone ka fa teng. Rapela ka metlha, o kope Jehofa gore a go thuse ka moya wa gagwe. Tlhatlhanya ka dilo tse o di ithutang mme o nne o leke go bona gore a go na le mekgwa mengwe e o tlhokang go e fetola. Tlhopha ditsala tse di siameng, tse di tla go thusang go fetola tsela e o akanyang ka yone. Fa o dira jalo, o tla kgona go itshireletsa gore o se ka wa tlhotlhelediwa ke lefatshe la ga Satane e bile o tla kgona go fetola “dikakanyo le selo sengwe le sengwe se se kwa godimo se se goleditsweng kgatlhanong le kitso ka ga Modimo.”—2 Bakor. 10:5.