Go Roba Go ya Ka Selekanyo sa Boiteko Joo re bo Dirang ka Namana
1 Jehofa Modimo o bontshitse ka ditsela di le dintsi ka moo a ratang batho ka gone. Jesu o ne a tlotlomatsa lorato lwa Modimo lo lo a gaisang otlhe, a bolelela boidiidi jo bo neng bo kgobakane gore Modimo “o tlhabisetsa ba ba molemō le ba ba boshula letsatsi ya gagwè, a nesetse basiami le basiamolodi pula.” (Math. 5:43-48) Ka nako nngwe, Jesu o ne a bontsha tsela e e tlhomologileng eo Rraagwe a neng a bontsha lorato ka yone—eleng setlhabelo sa Morwawe yo o tsetsweng a le esi, yoo Modimo o neng wa mo ntsha gore re bolokwe. (Yoh. 3:16) Jesu o ne a kgothaletsa bareetsi ba gagwe gore ba arabele ka tsela e e bontshang go lebogela lorato loo Jehofa a lo bontshitseng. A re leka go dira jalo?
2 E le gore re bontshe gore re anaanela ka botlalo le gore re bone melemo ya go ya go ile mo loratong lwa ga Jehofa, re tshwanetse ra mo itse. (Yoh. 17:3) Re tlhoka go gakololwa le go kaelwa gore re ka mo direla jang ka tsela eo a e amogelang. Jehofa o bontshitse ka moo a amegileng ka gone ka lorato ka go re neela Lefoko la gagwe le le tlhotlheleditsweng ebong Bibela, le ka go emisa phuthego ya gagwe e e molemo, eo re amogelang kgakololo le thuto ka yone. (Math. 24:45-47; 2 Tim. 3:16, 17) Jaaka batho ba ba ineetseng ba ga Jehofa, re rutilwe ka tsela ya gagwe. Mme a re bontsha ka boiteko joo re bo dirang ka namana gore re lebogela lorato lwa ga Jehofa? A re tsaya kgakololo ya gagwe tsia e le gore re mo itumedise mme ka go dira jalo re solegelwe molemo ka borona? (Isa. 48:17; Yak. 1:22) Moaposetoloi Paulo o ne a kwala jaana mo go 1 Bakorintha 3:8: “Me yana eo o yalañ le eo o nosañ, ba bañwe hèla: me moñwe le moñwe o tla amogèla tuèlō ea gagwè kaha tihoñ ea gagwè.”
3 Ee, re tshwanetse ra leka go dira seo Modimo o batlang gore re se dire. Ga se mongwe le mongwe yo o tswelelang pele ka selekanyo se se lekanang mo semoyeng. Go na le mabaka a le mantsi ao a ka nnang a bo a nna le seabe mo kgatelopeleng ya rona, mme go tla bo go se botlhale gore re ipapise le ba bangwe ka tsela eo e re kgobang marapo. Lefa go ntse jalo, selo se se botlhokwa ke boiteko joo rona ka namana re bo dirang. Re ka dirang gore re nne gaufi thata le phuthego? A go na le dikarolo tseo re ka tokafatsang mo go tsone fa re amogela maikarabelo ao re nang le one ka namana jaaka Bakeresete? Go tla batla gore re dire boiteko jo bo kanakang gore re tshegetse ditiro tsa phuthego ka tsela e e botoka? A go na le dintlha tseo re tlhokang go di dirisa fa go tsenwa mo ditaelong tseo phuthego e re neelang tsone?—1 Tim. 4:16.
ETSA BATHO BA BA IKANYEGANG
4 Mafoko a a molemo a Bogosi a ntse a rerwa ka masomesome a dingwaga ke bakaulengwe ba ba ikanyegang le bokgaitsadi. Batho ba ba ikanyegang bano, ba ba tshwanang le Paulo, ke batho bao ba tshwanelwang ke go ediwa. (1 Bakor. 11:1) Ba ile ba arabela mo loratong lwa Modimo mme ba roba melemo e le mentsi ka ntlha ya tiro ya bone eo ba e dirileng ka natla le maiteko ao ba neng ba a dira ka namana gore ba latele kgakololo ya Bibela. Ba bopa pinagare e e tiileng ya badiri ba ba tlhagafetseng mo phuthegong, ba sa tshabele maikarabelo ao ba nang le one. Re ka bona maungo a seo ba neng ba se dira.—Bar. 1:13; 2 Bakor. 3:1-3.
5 Jaanong, ngwaga le ngwaga go tla masome a a diketekete a batho ba basha mo phuthegong. (Isa. 60:8) Le bone ba tiisitse gore ba tla dira ka natla gore ba nne batho ba ba godileng semoyeng, mme tlhoafalo eo ba nang le yone mo tirong ya go rera e tshwanetse ya akgolwa. Ba solegelwa molemo ke fa ba bona ka moo Jehofa a segofatsang ka gone bao ba dirang ka natla mo tirelong ya gagwe. Sekao seo se tlhomiwang ke bakaulengwe ba ba godileng le bokgaitsadi se thusa batho ba basha gore ba lemoge gore eno ga se nako ya go repisa matsogo kana ya go tlogela go direla Modimo. Go sa kgathalesege gore a re baboledi ba basha kana ba ba nang le maitemogelo, a re tswelela pele re ntse re gola semoyeng, re amogela maikarabelo a rona ka namana a Bokeresete le go dirisa dilo tsotlhe tseo re di neetsweng tsa bolegodimo ka tsela e e molemo?
GO DIRISA SEO RE SE ITHUTANG
6 Bogologolo tala pele ga Jakobe a kwala gore re tshwanetse ra nna ‘badiri ba ba dirang,’ Moshe o ne a bolelela Bajuda jaana: “Me ke gōna bolokañ mahoko a.” (Yak. 1:25; Dute. 11:18) Ka jalo kitso ka boyone e ne e sa lekana. Bajuda ba ne ba tshwanetse ba dirisa mafoko a Molao e le fa ba utlwa Jehofa. Molao ono wa konokono o santse o ntse fela jalo. Eleruri Jesu, Morwa Modimo, o ne a itse kafa go leng botlhokwa ka gone go utlwa. (Yoh. 8:28) O ne a bolela jaana mo go Mathaio 7:24: “Moñwe le moñwe eo o utlwañ mahoko a, a me, a ba a a diha, o tla chwantshiwa le monna eo o botlhale.”
7 A re dirisa seo re se ithutang mo dikopanong tsa potologo? A re lemoga gore ke ka ntlha yang fa go le botlhokwa jaana mo nakong eno gore re nne re thantse mme re se ka ra robala? A re nna re ntshitse matlho dinameng gore re bone ditlhaselo tse di sa bonaleng tsa ga Diabolo le dirai tseo a re beelang tsone? A re anaanela kgakololo le ditlhagiso tseo re di neelwang gangwe le gape ke phuthego malebana le ka moo go leng botlhokwa ka gone gore re nne re le phepa mo boitshwarong le mo moyeng mo phuthegong? Rona ka namana re dirisa seo re se utlwang go ya bokgakaleng bofe?—Yak. 1:23-25.
8 Thulaganyo eo re ntseng re nna le yone bosheng jaana ya kopano e e kgethegileng ya letsatsi le le lengwe e otlelela kafa go tlhokafalang ka gone gore re nne boitshepo, fela jaaka fa Jehofa a le boitshepo. (1 Pet. 1:14-16) Boitshepo bo bolela go nna phepa go ya ka bodumedi kana go itsheka, boitsheko. Bo bolela boemo jwa go tlhaolelwa go direla Modimo. Re neilwe go dira bodihedi jwa mafoko a a molemo. Ka ntlha ya moo, re tshwanetse ra nna phepa semoyeng, mo boitsholong, le mo mmeleng e le gore re tle re tshwanele go jara Lefoko le le boitshepo la boammaaruri. Seno se tlhoka gore re itlhokomele go gaisa jaaka gale. (Baheb. 2:1) Fa re dira jalo, re tla roba masego go ya ka selekanyo sa boiteko joo re bo dirang ka namana.
BONA MELEMO KA GO ITHUTA KA NAMANA
9 Go ithuta ka namana go re thusa gore re age tumelo e e nonofileng, ebile go godisa tsela eo re anaanelang boammaaruri ka yone. Go re neela tsholofelo ebile go dira gore re nne re iketleeleditse go bua ka taolo. Go re neela temogo le botlhale ebile go re thusa gore re apare motho yo mosha. (Bakol. 1:9-11) Lefa go ntse jalo, go nna le thuto e e nang le matswela go tlhoka nako le boiteko, ebile ga go na tsela ya go kgabaganya eo motho a ka bonang kitso ya boamaaruri ka yone le go gola semoyeng. Seo re se dirang mo thutong ke seo re tlileng go se amogela mo go yone.—2 Bakor. 9:6, 7; Bagal. 6:7.
10 A beke nngwe le nngwe re beela nako kwa thoko ya go baakanyetsa dipokano tsa phuthego? Eno ke tsela e nngwe eo re ka bontshang ka yone gore re anaanela dijo tsa semoya tseo Jehofa a re tlamelang ka tsone ka motlhanka yo o boikanngo le yo o botlhale. Go baakanyetsa dipokano ka tsela e e tshwanetseng go re thusa gore re nne re ngaparetse thulaganyo ya go bala le go ithuta Lefoko la Modimo. A re beela nako kwa thoko beke nngwe le nngwe gore re ithute mmalo wa Bibela jaaka fa o rulagantswe mo thulaganyong ya Sekolo sa Bodihedi sa Bolegodimo? Go tsaya metsotso e se kae fela letsatsi lengwe le lengwe gore re bale dintlha tseno le gore re tlhatlhanye ka tsone. Pokano ya Tirelo e re thusa gore re nne re ntse re ntshitse matlho dinameng e le gore re bone ditsela tseo ka tsone re ka dirang gore bodihedi jwa rona jwa phatlalatsa e nne jo bo atlegileng. A re a baakanyetsa, re akanya ka mo go kgethegileng ka moo re ka dirisang dintlha tseno ka gone mo bodiheding? Mme a re dira boiteko jwa gore re di dirise ka yone nako eo? Go tshwanetswe ga dirwa dithulaganyo tse di kgethegileng tsa go baakanyetsa Thuto ya Tora ya Tebelo le Thuto ya Buka ya Phuthego. A re dira jalo?
NNA LE SEABE MO DIPOKANONG
11 Re ka solegelwa molemo ka mo go oketsegileng mo dipokanong fa re nna le seabe mo go tsone. Fa re baakanyetsa dipokano mme re bo re dira boiteko jwa gore re nne le seabe mo go tsone seno se re thusa gore re reetse ka kelotlhoko mo dipokanong ebile go dira gore go nne bonolo gore re solegelwe molemo ke dikakgelo tseo ba bangwe ba di neelang. Ba le bantsi ba santse ba gakologelwa kafa ba neng ba tshwere bothata ka gone fa ba ne ba akgela lekgetlo la ntlha kwa dipokanong kana mo puong ya bone ya ntlha ya diithuti mo Sekolong sa Bodihedi sa Bolegodimo. Lemororo go tshoga go gogolo go tshwanetse ga bo go fokotsegile, a re dira ka natla go dira gore kgatelopele ya rona ya semoya e bonale mo go botlhe? (1 Tim. 4:15) Ba bangwe ba solegelwa molemo ebile ba kgothadiwa ke dikakgelo tsa rona. Fa re ipaakanyeditse sentle, re ithutile dintlha tse di tlileng go sekasekiwa mo dipokanong, go nna le seabe ga rona ka tsela e e molemo go tla tlhotlheletsa ba bangwe mo loratong le mo ditirong tse di molemo.—Baheb. 10:23-25.
12 Dikakgelo tsa rona ga di a tshwanela go nna tse ditelele le tse di tlhakatlhakaneng. Gantsi go molemo go dira dikakgelo tse dikhutshwane tse di arabang ka tlhamalalo dipotso tse di bodiwang kana go thusa go tlhalosa kafa lokwalo longwe lo dirang ka gone. Fa re ipaakanyeditse sentle, re tla kgona go araba ka mafoko ao eleng a rona. Fa re dira jalo, re tla bona melemo e megolo thata le ba bangwe ba tla solegelwa molemo mo go golo thata. Ka ntlha yang? Ka gonne seno se dira gore re akanye ka seo re se buang mme re tlhalose ntlha ka tsela eo re e tlhaloganyang ka yone. Seno se ka nna sa dira gore go nne bonolo gore ba bangwe ba tlhaloganye dintlha tseno. Gape, se tla re thusa gore re gakologelwe tshedimosetso eno gore re e dirise mo nakong e nngwe.
JALA KA BOPELOTSHWEU MO TSHIMONG
13 Bodihedi jwa rona jwa Bokeresete ke letlotlo la tirelo. (2 Bakor. 4:7) A o bo leba jaaka jo bo ntseng jalo? Mo bodiheding jono, re na le tshiamelo ya go bolelela ba bangwe tumelo ya rona. Jesu o ne a bolela gore molomo o bua se se tletseng mo pelong. (Luke 6:45) Boiteko joo re bo dirang ka namana gore re nne le seabe ka botlalo mo bodiheding jwa tshimo bo re dira gore re bone melemo e le mentsi. Bo dira gore re tlhaloganye boammaaruri ka tsela e e botoka, ebile re kgona go dirisa Bibela ka mo go botoka. Re nna le boipelo jwa go leretse ba bangwe boammaaruri le go ba thusa gore ba ithute ka Mmopi wa bone yo Mogolo. Re ema jaaka bao ba supang kafa puso ya Modimo eleng e e siameng ka gone le kafa bolaodi jwa gagwe eleng jo bo siameng ka gone. Re itumetse ka gonne re a itse gore re itumedisa Jehofa, ka re dirilwe mo setshwanong sa gagwe ebile re dira thato ya gagwe.—Math. 5:48.
14 Fa re ntse re lekanya boiteko joo re bo dirang ka metlha, go obamela ga rona Jehofa ga e kitla e nna fela go mo direla ka go ikgolola. Seno se bolelang? Se bolela gore ga re kitla re nna batho ba ba sa direng ka pelo yotlhe fa re tshela tumalanong le thato ya Modimo, re dira fela se se lebegang e le tirelo ya rona mo go ene kana selekanyo se sennye re sa ineela mo go ene ka pelo yotlhe ka mmatota ebile re sa dire boiteko jo bo kalokalo. Go direla ga rona Jehofa go tshwanetse ga bo go dirwa ka pelo yotlhe. Re na le boikarabelo jwa Dikwalo jwa gore re neele gotlhe go re nang le gone mo tirelong ya gagwe. (Bakol. 3:23, 24) Gone ke boammaaruri gore maemo ga a tshwane, ebile Jehofa ga a batle mo go rona goo re ka se kang ra kgona go go dira. Lefa go ntse jalo, seo re ka kgonang go se dira, o lebeletse gore re se dire! (Math. 22:37) Ereka tsela eo batho ba leng ka yone e e tletseng ka boleo e na le go dira gore re se ka ra dira bojotlhe, go molemo gore re itlhatlhobe nako le nako mme re bone moo re ka dirang maiteko gone mo tirelong ya rona mo Modimong. A re itlwaeditse go nna re dira jalo?
15 Re tshwanetse ra nna re tlhagafetse fa e le gore re batla go tila go letla dilo tseo rona ka namana re di batlang le dikeletso tseo eleng tsa rona ka namana go re kganela gore re dire gotlhe goo re ka go kgonang mo tirelong ya ga Jehofa. Go ijesa monate, dilo tseo re di ratang, le ditiro tsa go itlosa bodutu di tshwanetse tsa dirwa ka tsela e e tshwanetseng. Gape, re tshwanetse ra itlhokomela gore re seka ra nna le mokgwa wa go tshwarega thata mo ditirong tsa boitshediso. Fa re tsaya kgakololo ya ga Jesu tsia e eleng go Mathaio 6:22, 23, kwa ntle ga pelaelo re tla kgona go dira boiteko jo bo oketsegileng mo go lateleleng dikgatlhego tsa semoya mme re robe kafa go tshwanelang.
16 Jaaka fa re tswelela re dira ka natla mo go apareng motho yo mosha, re tla amogela maikarabelo a rona a go dirisa kgakololo le dikakantsho tseo re di amogelang mo dipokanong tsa phuthego, mo dikopanong, mo dikopanong tse dikgolo, le ka dibuka. Ekete mongwe le mongwe wa rona a ka ithuta ka tlhoafalo, a nne le seabe ka tlhagafalo mo dipokanong, le gore a nne le seabe mo tirong eno e kgolo ya go dira barutwa go ya bokgakaleng joo maemo a rona ka namana a re letlang go bo dira. Fa re arabela loratong lwa Modimo jalo ka kanaanelo, re ka tlhomamisega gore re tla roba madua a mantsi a semoya jaanong mme re nne re bolokile tsholofelo e e tiileng ya botshelo jo bo sa khutleng mo lefatsheng le lesha la ga Jehofa.