Ga ba A ka Ba Ikgogona go Neela Bosupi

¹ Leina la rona, Basupi ba ga Jehofa, le a re tlhaola e bile le tlhalosa tiro ya rona. Re supa ka bogolo jwa Modimo wa rona Jehofa. (Isa. 43:10, 12) Mongwe le mongwe o tshwanetse go nna le seabe mo go neeleng bosupi jono fa e le gore o batla go nna leloko la phuthego. Tsela e kgolo ya go neela bosupi ke ka bodihedi jwa rona jwa phatlalatsa, jo bo akaretsang go tsamaya ka ntlo le ntlo, go dira tiro ya mmila, go dira maeto a go boela, le go tshwara dithuto tsa Baebele. Rotlhe re kgothadiwa gore re leke go nna le seabe ka botlalo.—1 Bakor. 15:58.

² Lefa go ntse jalo, bangwe mo phuthegong ba kgona go dira selekanyo se se rileng fela. Bolwetsi jo bo masisi kana bokoa bongwe bo ka nna jwa dira gore ba se ka ba kgona. Ba losika ba ba ganetsang ba ka tswa ba ba beela dikgoreletsi tse di kgolo. Mosha a ka tswa a kganelwa ke motsadi yo o sa dumeleng. Batho ba ba nnang kwa mafelong a a kgakala ba ka nna ba bona go sa kgonege fa ba sena sepalangwa. Ditlhong di ka nna tsa dira gore batho ba ba boi ba ikgogone. Baboledi bangwe ba ba leng mo maemong a a ntseng jaaka ano kana a a tshwanang ba ka nna ba bo ba ikutlwa gore ga ba dire se ba tshwanetseng go se dira jaaka Bakeresete ka go bo ba dira go le gonnye thata go na le se ba bangwe ba se dirang e bile ba dira go le gonnye thata go na le se tota ba batlang go se dira. Ga go na lebaka lepe la gore ba nyatse maiteko a ba a dirang. (Bagal. 6:4) Ba ka gomodiwa ke go itse gore Jehofa o a itumela fa ba dira gotlhe mo ba ka go kgonang go sa kgathalesege gore ke maemo afe a ba lebaneng nao.—Luke 21:1-4.

³ Go Senka Tsela ya go Nna le Seabe: Re ile ra anelwa maitemogelo a le mantsi a a supang kafa batho bangwe ba ileng ba se ka ba letla maemo a a boima go ba thibela go neela bosupi. Ba ile ba tsaya kgato, ba ikakanyetsa ditsela tse dintsi tse ba ka neelang bosupi jo e seng jwa ka tlwaelo ka gone. Batho ba ba nnang fela kwa gae ba ile ba dirisa mogala go bula tsela ya go neela bosupi. Ba leba moeng mongwe le mongwe jaaka motho yo a ka reetsang. Le mororo mosadi yo o nnang le lelapa le le ganetsang a ka tswa a sa kgone go neela bosupi mo lelapeng, o dirisa ditshono tsotlhe go bua le baagisani kana ba bangwe ba a kopanang le bone letsatsi le letsatsi.

⁴ Mosha a ka nna a bo a kganelwa ke motsadi yo o sa dumeleng gore a nne le seabe mo tirong ya rona ya go neela bosupi phatlalatsa. Go na le gore a lebe seo jaaka sekgoreletsi se segolo, a ka nna a leba baithutikaene le barutabana ba gagwe jaaka “tshimo” ya gagwe ka namana, a neela bosupi ka tsela e e molemo gongwe e bile a tshware le dithuto tsa Bibela. Batho ba bantsi ba ba nnang kwa mafelong a a kgakala ba ile ba kgona go nna le seabe ka go kwala makwalo. Batho ba ba tlhotlhelediwang ke tlhoafalo ya Bokeresete ka metlha ba tla batla ditsela tseo ka tsone ba ka tilang go nna “bobodu, le fa e le botlhoka loungo, mo kitsong ya Morena wa rona Jesu Keresete.”—2 Pet. 1:8.

⁵ Jehofa o tlhomile tsela e le nngwe fela e ka yone re tshwanetseng go dira tiro ya rona ya go neela bosupi, e leng go e dira “ka pelo yotlhe.” (Bakol. 3:23) Le mororo nako e re e dirisang le se re kgonang go se dira se se kitla se tshwana, lebaka le legolo la go bo re go dira le a tshwana—lorato lwa boammaaruri le tswa mo ‘pelong e e itekanetseng.’ (1 Ditir. 28:9; 1 Bakor. 16:14) Fa re dira gotlhe mo re ka go kgonang, le ka motlha re ka se ka ra nna le lebaka lepe la go ikutlwa re tlhaela mo tumelong kana gore ga re batho ba sepe mo phuthegong ka go bo re dira go le gonnye fela. Le rona re ka bolela jaaka Paulo ka boammaaruri gore ga re a ka ‘ra ikgogona go bolela sengwe le sengwe se se molemo, le go ruta mo phatlalatsa.’—Dit. 20:20, NW.