Thusang ba ba Senang Tumelo
1 Mo motlheng o re tshelang mo go one, mongwe le mongwe o batla go lebiwa jaaka motho yo o rutegileng le yo o kgonang go akanya. Difilosofi tsa batho le megopolo e e kgatlhang e tseelwa kwa godimo, mme melemo ya semoya e a itlhokomolosiwa. Batho ba ba tlhoafetseng ba ba batlang go utlwa mabaka a a utlwalang le boammaaruri jo motho a ka bo tlhaloganyang ba tla itumelela go bona tshono ya go sekaseka buka eno ya Bibela—A Ke Lefoko la Modimo Kana la Batho? Buka eno e ka kgona go thusa batho ba ba senang tumelo. (Bar. 1:19, 20) Tlhomamisa gore o dira maeto a go boela mo bathong ba ba bontshang kgatlhego.
2 O ka nna wa simolola motlotlo wa gago jaana:
◼ “Mo loetong lwa me lwa nako e e fetileng, re ne ra botsa potso e e reng, Isagwe ya motho le lefatshe ke eng? Ela tlhoko gore buka e ke neng ka e go tlogelela e araba potso eo jang.” Bula tsebe ya 161 mo bukeng ya Lefoko la Modimo mme o mo kgothaletse gore a bale dirapa 29 le 30. Fa motho a bontsha kgatlhego e e oketsegileng, o ka nna wa mmotsa jaana: “Fa e le gore ke seo isagwe e leng sone, ke eng he fa lefatshe le tletse ka bothubaki le bosetlhogo jo bongwe jo bontsi jaana?” Fa go tshwanela, go ka nna ga tlotliwa ka ntlha eo ka nako eo kana mo loetong le le latelang ka go buisana mmogo ka kgaolo 10 ya buka ya Lefoko la Modimo.
3 Kana o ka nna wa simolola jaana fa o boela:
◼ “Timotheo wa Bobedi 3:16, 17 e bua ka tsela e e dirang gore motho a akanye fa e tlhalosa ka gore Baebele e tswa kae; ke ka rata go itse gore wena o akanya eng ka gone. [E bale o bo o letele karabo.] A ga o dumalane le nna gore fa batho ba ba oketsegileng ba ne ba ka bo ba leba Baebele ka tsela eno re ne re se kitla re tshwanelwa ke go lebana le mathata a a kalo a a masisi mo tikologong ya rona?” Letela gore a bue sengwe. Bala serapa 4 mo tsebeng 176 mo bukeng ya Lefoko la Modimo. Botsa mongantlo gore a o ka boa ka nako e e mo tshwanelang gore lo tle go tsweledisa puisano.
4 O ka nna wa simolola motlotlo ka go bolela jaana, o tshotse Baebele ya gago ka seatla:
◼ “Re lo etetse gape gore re tle go tlhalosa gore ke ka ntlha yang fa go le botlhokwa gore re ithute Baebele mo metlheng eno ya rona. Bontsi jwa batho ba na le Baebele, mme ke ba le mmalwa fela ba ba iphang nako ya go e bala. Ba bangwe ba re bolelela fela ba sa potapote gore ga ba tlhole ba ikanya Baebele thata. Wena o ikutlwa jang ka seo? [Letela karabo.] Sengwe sa dilo tse di dirang gore re dumele gore Baebele ke Lefoko la Modimo le le tlhotlheleditsweng ke ka go bo dipolelelopele tsa yone di a diragadiwa.” Bula tsebe 134 mme o bale serapa se se simololang. Fa o sena go tlhalosa dintlha tse dingwe tse di kgatlhang mo kgaolong eno ka bokhutshwane, bolela gore o tla boa gape mo malatsing a sekae go tla go tsweledisa puisano.
5 Tsela e nngwe e o ka simololang loeto lwa gago lwa go boela ka yone ke ka go bolela jaana:
◼ “Batho ba ile ba utlwisiwa botlhoko thata le go hutsafadiwa thata ke bosula le boikepo. Baebele, Lefoko la Modimo le tlhalosa gore ke ka ntlha yang fa re diragalelwa ke mathata ano. [Bula tsebe 134, mme o bale serapa 1 sa kgaolo 10.] Batho ba ba iphang nako ya go tlhatlhoba Baebele ba tla kgona go tlhaloganya boperofeti jo bo gakgamatsang jono jwa Baebele mme gape ba tla nna le tsholofelo ya go bona lefatshe le fetolwa gore e nne paradaise e ntle.” Tlhalosetsa mongantlo ka thulaganyo ya rona ya thuto ya Baebele ya mahala ya legae, o bo o mmolelela gore o tla boa gape ka nako e e tla mo tshwanelang.
6 Re ka kgona go thusa batho ba bangwe ka go dirisa buka eno gore e ba thuse gore ba nne le lebaka le le utlwalang la go dumela mo Mmoping wa bone.