Lebokoso la Dipotso
◼ Go tshwanetswe ga gakologelwa eng malebana le go bala dirapa kwa dipokanong?
Nako e ntsi e e abetsweng Thuto ya Tora ya Tebelo le Thuto ya Buka ya Phuthego e dirisediwa go bala dirapa. Seno se bolela gore mokaulengwe yo o abetsweng go bala o rwele boikarabelo jo bo masisi jwa go nna morutisi. O tshwanetse go bala ka tsela e e tla ‘phuthololang’ dintlha e le gore bareetsi ba se ka ba tlhaloganya fela mme gape ba tlhotlheletsege go tsaya kgato. (Neh. 8:8) Ka gone, motho yo o balang o tshwanetse go baakanyetsa kabelo ya gagwe sentle. (1 Tim. 4:13; bona thuto 6 ya Buka ya Kaelo ya Sekolo.) Dintlha dingwe tsa botlhokwa tsa go bala phatlalatsa ke tseno.
Gatelela Mogopolo ka Tsela e e Tshwanetseng: Tlhokomela e sale pele gore ke mafoko afe kana dipolelwana dife tse di tlhokang go gatelelwa go dira gore bareetsi ba tlhaloganye sentle.
Bitsa Mafoko Sentle: Go bitsa mafoko ka tshwanelo le ka phepafalo go botlhokwa gore bareetsi ba tlhaloganye mafoko a a tlhagang mo kgatisong. Leba mafoko a a sa tlwaelegang kana a a dirisiwang ka sewelo mo dikishinareng, kana reetsa dikhasete tsa Mokgatlho tse di rekotilweng.
Buela Kwa Godimo Mme o le Matlhagatlhaga: Go buela kwa godimo ka matlhagatlhaga go tsosa kgatlhego, go ama maikutlo, e bile go rotloetsa moreetsi.
Nna Bothitho le ka Tsela ya Motlotlo: Go phuthologa go dira gore o bale ka thelelo. Ka go baakanyetsa le go ikatisa, mmadi o tla phuthologa, mme seno se tla felela ka mmalo o o kgatlhang e seng o o lapisang le o o fedisang pelo.—Hab. 2:2.
Bala Dintlha Fela Jaaka di Kwadilwe: Dintlhanyana tse di kwa tlase mmogo le tshedimosetso e e mo masakaneng ka gale di balelwa kwa godimo fa e le gore di phepafatsa se se kwadilweng. Tse di sa balweng fela ke ditshupiso tse di bontshang buka e dintlha tseno di tserweng mo go yone. Ntlhanyana e e kwa tlase e tshwanetse go balwa fela fa e supilwe mo serapeng, o ka e tsenyeletsa ka go bua jaana: “Ntlhanyana e e kwa tlase e balega jaana . . .” Fa o fetsa go e bala, tswelela ka go bala serapa sotlhe.
Fa go bala phatlalatsa go dirilwe sentle, e nna nngwe ya ditsela tse di botlhokwa tseo re ka kgonang go ‘ruta ba bangwe go tlhokomela dilo tsotlhe tse re di laoletsweng’ ke Morutisi wa rona yo Mogolo.—Math. 28:20.