Kgotsofalela se o Nang le Sone
1 Dikwalo di re kgothaletsa go tlamela ba malapa a rona mme seno ga se a tshwanela go nna se se tlang pele mo botshelong jwa rona. Dilo tsa semoya ke tsone di tshwanetseng go tla pele. (Math. 6:33; 1 Tim. 5:8) Ga go motlhofo go dira dilo ka tekatekano mo ‘dinakong tseno tsa mathata tse go leng boima go lebana le tsone.’ (2 Tim. 3:1) Ke eng se se tla re thusang go dira jalo?
2 Dira Dilo Go ya Ka Baebele: Lefoko la Modimo le re tlhagisa gore go gagamalela dikhumo go ka tsenya bomoya jwa rona mo kotsing. (Mor. 5:10; Math. 13:22; 1 Tim. 6:9, 10) Mo nakong eno e e botlhokwa, go ka nna kotsi fa ope wa rona a tshwarega thata ka tiro ya boitshediso kana go batla go nna le madi a le mantsi mo e leng gore dilo tsa semoya—dipokano, go ithuta le tirelo ya tshimo—di tsaya maemo a bobedi mo matshelong a rona. (Luke 21:34-36) Go na le moo, Baebele e gakolola jaana: “E re ka re na le dijo le se re ipipang ka sone, re tla kgotsofalela dilo tseno.”—1 Tim. 6:7, 8.
3 Seno ga se reye gore Bakeresete ba tshwanetse go itsenya mo lehumeng ka boomo. Mme go re thusa go lemoga dilo tse tota re di tlhokang—dijo, diaparo le bonno jo bo lekaneng. Fa re na le dilo tse di tlhokegang tsa botshelo, ga re a tshwanela gore ka metlha re bo re ntse re gagamalela go tshela botshelo jwa maemo a a kwa godimo. Fa re akanyetsa go reka sengwe kana go amogela tiro nngwe e e oketsegileng, re tla bo re dira sentle fa re ipotsa jaana, ‘A tota ke a di tlhoka?’ Go dira jalo go tla re thusa go utlwa kgakololo e e tlhotlheleditsweng e e reng: “A mokgwa wa lona wa botshelo e se ka ya nna wa go rata madi, lo ntse lo kgotsofetse ka dilo tsa jaanong.”—Baheb. 13:5.
4 Fa re ikanya Jehofa o tla re segofatsa. (Dia. 3:5, 6) Le fa re tlhoka go bereka ka natla gore re nne le dilo tse re di tlhokang tsa letsatsi le letsatsi, ga re dire gore dilo tseo e nne tsone tse di tlang pele mo botshelong jwa rona. Le fa re humile kana re humanegile, re ikanya Jehofa gore a re neye dilo tse re di tlhokang. (Bafil. 4:11-13) Ka ntlha ya moo, re kgotsofalela se Modimo a re nayang sone le masego a mangwe a mantsi.
5 Etsa Tumelo ya ba Bangwe: Motsadi mongwe yo o se nang molekane yo o neng a godisetsa morwadie mo tseleng ya boammaaruri o ne a nna a tlhofofatsa botshelo jwa gagwe. Le fa a ne a rata legae la gagwe, o ne a fudugela kwa ntlong nngwe e nnye mme moragonyana a fudugela mo foleteng. Seno se ne sa dira gore a kgone go fokotsa diura tse a neng a di bereka gore a tle a nne le nako e e oketsegileng mo bodireding. Fa morwadie a setse a godile e bile a nyetswe, mmaagwe o ne a tlogela tiro pele ga nako le fa seno se ne se raya gore o tla nna le lotseno lo lonnye lwa madi. Kgaitsadi yono wa rona jaanong o na le dingwaga di le supa e le mmulatsela wa ka metlha mme ga a ikwatlhaele go bo a ile a itima dilo dingwe gore dilo tse di direlwang Bogosi e nne tsone tse di tlang pele mo botshelong jwa gagwe.
6 Mogolwane mongwe le mosadi wa gagwe ba ne ba bulatsela dingwaga di le dintsi ba ntse ba godisa bana ba bone ba bararo. Jaaka lelapa, ba ne ba ithuta go kgotsofala fa ba na le dilo tse ba di tlhokang go na le go nna le tse ba di batlang. Mokaulengwe yoo o akgela jaana: “Re ne re tshwanetse go tshela botshelo jo bo motlhofo. Le fa re ne re na le mathata ka dinako tse dingwe, ka dinako tsotlhe Jehofa o ne a re naya dilo tse re di tlhokang. . . . Mme fa ke bona lelapa la me le baya dilo tsa semoya kwa pele ka tsela eno, ke ikutlwa gore sengwe le sengwe se mo maemong a sone, mme ke ikutlwa ke kgotsofetse.” Mosadi wa gagwe o oketsa ka go re: “Fa ke bona [monna wa me] a tshwaregile ka dilo tsa semoya, ke ikutlwa ke kgotsofetse tota.” Bana le bone ba itumelela go bo batsadi ba bone ba dirile tshwetso ya go direla Jehofa ka nako e e tletseng.
7 Botlhe ba ba tlhophang tsela e e ntseng jalo ya go ineela mo Modimong go na le go gagamalela dikhumo, Baebele e ba solofetsa masego a a seng kana ka sepe gone jaanong le mo botshelong jo bo tlang.—1 Tim. 4:8.