Go Anaanela Dikgatiso Tsa Rona
1 “Go dirwa ga dibuka tse dintsi ga go na bokhutlo.” (Mor. 12:12) Tshedimosetso e e mo dibukeng di le dintsi ga e tshwanele pampiri e e gatisitsweng mo go yone ka gonne ga e na mosola. Le fa go ntse jalo, ga go a nna jalo ka dibuka tse di gatisitsweng ke Basupi ba ga Jehofa. Tsone di mosola ka gonne di tshwere dijo tsa semoya tse di bolokang matshelo. Di thusa ba ba kgatlhegang go itse Jehofa e bile di nonotsha tumelo ya ba e setseng e le batlhanka ba Gagwe ba ba ineetseng.
2 Re batla go naya ba bangwe dikgatiso tsa rona ka re itse gore di ka ba solegela molemo. Le fa gone di abiwa kwantle ga tuelo, go di dira le go di abela ba bangwe go ja madi a le mantsi. Ka jalo ga re batle go aba dikgatiso tseno botlhaswa. Fa re sa tlhomamisege gore a mong wa ntlo o a kgatlhega, gantsi re tla mo naya dimakasine tsa Tora ya Tebelo le Tsogang! kgotsa pampitshana fela. Re tshwanetse go boela kwa go mongwe le mongwe yo re mo tsamaiseditseng kgatiso nngwe, mme fa a kgatlhega ka nako eno re ka nna ra mo naya kgatiso e nngwe gape.
3 Bangwe ba okaoka go bolelela beng ba matlo gore tiro e re e dirang e tshegediwa ka meneelo e e dirwang ka go rata, mme gantsi go molemo go ba bolelela. Seno se dira gore beng ba matlo ba bone gore tiro ya rona ga se ya go gweba. E dira gore ba bone gore mokgele wa rona ke go rera dikgang tse di molemo tsa Bogosi le go dira barutwa. E re thusa go bona ba tota ba kgatlhegang. Gantsi batho ba na le madi a go reka motsoko le dibuka tsa lefatshe. Fa tota ba kgatlhegela se o se ba boleletseng, ba tla bona botlhokwa jwa go ntsha moneelo go tshegetsa Bokeresete jwa boammaaruri. Ka go ba tlhalosetsa tsela e tiro ya rona e tshegediwang ka yone, re bontsha gore re anaanela dikgatiso tsa rona. Re bontsha gore re a lemoga gore go di dira go ja madi.
4 Fa re tlhalosa sentle kgang ya meneelo, beng ba matlo ba le bantsi ba tla rata go tshegetsa tiro ya rona e e botlhokwa. Go ka nna ga nna le dinako tse o bonang go sa tlhokege go umaka kgang ya meneelo, mme gantsi go molemo gore o dire jalo mo loetong lwa ntlha fa mong wa ntlo a kgatlhegela go bala dikgatiso tse re di mo nayang.