Etsa Boikutlo Jwa Mogopolo Jwa ga Jesu
1. Jesu o ne a bontsha boikutlo bofe jwa mogopolo?
1 Le fa gone re ise nke re bone Morwa Modimo, ka ntlha ya pego e e kwadilweng ya botshelo le bodiredi jwa ga Jesu, ruri re ile ra kgona go mo rata. (1 Pet. 1:8) O ne a ikobela thato ya ga Rraagwe ka go tlogela boemo jwa gagwe jo bo tlotlometseng kwa legodimong, mme a tla mo lefatsheng. Fa a sena go nna motho, o ne a direla ba bangwe kwantle ga bogagapa mme morago ga moo a ntshetsa batho botshelo jwa gagwe. (Math. 20:28) Lefoko la Modimo le re rotloetsa jaana: “Bolokang boikutlo jono jwa mogopolo mo go lona jo gape bo neng bo le mo go Keresete Jesu.” Re ka etsa jang moya wa gagwe wa go intsha setlhabelo?—Bafil. 2:5-8.
2. Ke kgwetlho efe e Bakeresete ba le bantsi ba lebanang le yone, mme ke eng se se ka ba thusang go e fenya?
2 Fa re Ikutlwa re Lapile: Le fa gone Jesu a ne a itekanetse, o ne a tle a lape. Ka lekgetlo lengwe, o ne a neela mosadi mongwe wa Mosamarea bosupi ka botlalo le fa gone a ne “a lapisitswe ke loeto.” (Joh. 4:6) Bakeresete ba le bantsi gompieno ba lebana le kgwetlho e e tshwanang. Morago ga tiro e e lapisang ya beke yotlhe, go ka nna ga nna bokete go bona maatla a go nna le seabe mo tirong ya go rera. Le fa go ntse jalo, fa re dira tiro eno ka metlha, re tla lemoga gore bodiredi jwa Bokeresete bo re lapolosa semoyeng.—Joh. 4:32-34.
3. Re ka etsa jang sekao sa ga Jesu sa go nna a iketleeleditse go ruta?
3 Mo lekgetlong le lengwe, Jesu le barutwa ba gagwe ba ne ba ya kwa lefelong le le se nang batho gore ba ikhutse go se kae. Le fa go ntse jalo, boidiidi jo bogolo bo ne jwa utlwa ka gone mme jwa itlhaganelela koo go ba raka. Go na le gore a ikutlwe a tshwenngwa, Jesu o ne a “tlhotlheletsega go ba tlhomogela pelo” mme a simolola go “ba ruta dilo di le dintsi.” (Mar. 6:30-34) Re tlhoka go nna le boikutlo jo bo tshwanang le jono gore re simolole le go tshwara dithuto tsa Baebele. Re tshwanetse go tswelela pele re iteka re bo re rate batho ka tsela ya mmatota. Fa e le gore gone jaanong ga o na thuto ya Baebele e o e tshwarang, tswelela pele o leke go nna le yone.
4. Go tsaya bobulatsela jo bo thusang go ka re thusa jang gore re etse boikutlo jwa mogopolo jwa ga Keresete?
4 Baya Dilo Tsa Semoya Kwa Pele: Bobulatsela jo bo thusang bo ka re thusa gore re tlhome mogopolo le go feta mo ditirong tsa semoya. Kgaitsadi mongwe yo mosha o ne a kwala jaana: “Mmè wa tsala nngwe ya me o ne a re kgothatsa ka bobedi jwa rona gore re tseye bobulatsela jo bo thusang le ene ka kgwedi e le nngwe. Ruri ke itumeletse go bo re ile ra bula tsela le ene. Ke ile ka itumelela go itse bakaulengwe ba me le bokgaitsadi botoka, mme ka bonako fela ke fa e kete ke maloko a lelapa mo go nna. Gape ke itumeletse go nna le tshono e e oketsegileng ya go bua le ba bangwe ka ga Jehofa le go ba ruta boammaaruri jo bo kgatlhang jwa Bogosi. Dilo tseno tsotlhe di dirile gore ke ikutlwe ke atamalane thata le Jehofa le phuthego ya gagwe.”—Pes. 34:8.
5. Ke eng fa re tshwanetse go tswelela pele re leka go etsa boikutlo jwa mogopolo jwa ga Jesu?
5 Rotlhe re lebana le ntwa fa gare ga mebele ya rona e e sa itekanelang le keletso ya rona ya go itumedisa Jehofa. (Bar. 7:21-23) Re tshwanetse go gana moya wa lefatshe wa go itshomarela. (Math. 16:22, 23) Jehofa a ka re thusa ka moya wa gagwe o o boitshepo gore re kgone go fitlhelela seno. (Bagal. 5:16, 17) Fa re ntse re letetse go gololwa ga rona le go tsena mo lefatsheng la Modimo le lesha la tshiamo, e kete re ka etsa boikutlo jwa mogopolo jwa ga Jesu ka go baya dilo tse di direlwang Bogosi le dikgatlhego tsa ba bangwe kwa pele ga tsa rona.—Math. 6:33; Bar. 15:1-3.