O Baya Eng Kwa Pele?
1 O ne o ka araba potso eo jang? Ke boammaaruri gore rotlhe re eletsa go baya dilo tsa Bogosi kwa pele. (Math. 6:33) Mme gone re ka ipotsa jaana, ‘A ditshwetso tse ke di dirang di bontsha gore ke dira jalo?’ Baebele e re kgothatsa jaana: “Nnang lo ipontshe se lona ka bolona lo leng sone.” (2 Bakor. 13:5) Re ka ipontsha jang gore re baya Bogosi kwa pele?
2 Nako ya Rona: Re ka simolola ka go sekaseka kafa re tlhophang go dirisa nako ya rona ka gone. (Baef. 5:15, 16) Re dirisa nako e kana kang beke le beke re itisa le ba bangwe, re lebeletse thelebishine, re dirisa Internet kgotsa re dira tiro nngwe ya go itlosa bodutu? Fa re ka kwala nako e re e dirisetsang dilo tseno mme re bo re e bapisa le nako e re e dirisang mo dilong tsa semoya, re ka gakgamala. A re bereka diura tse di oketsegileng kwa tirong re tlhokomologa tirelo e e boitshepo e le fela gore re tle re nne le dilo tsa manobonobo? Re foswa ke dipokano kgotsa bodiredi ga kae ka go bo re eta ka mafelobeke go ya go itapolosa?
3 Baya Dilo Tsa Botlhokwa Kwa Pele: Bontsi jwa rona ga re na nako e e lekaneng ya go dira sengwe le sengwe se re neng re ka rata go se dira. Ka jalo go baya dilo tsa Bogosi kwa pele, re tshwanetse go sekaseka gore ke dilo dife tse di tshwanetseng go tla pele re bo re rulaganya gore re nne le nako ya “dilo tse di botlhokwa thata.” (Bafil. 1:10) Dilo tseno di akaretsa go ithuta Lefoko la Modimo, go nna le seabe mo bodireding, go tlhokomela lelapa la gago le go nna gone kwa dipokanong tsa Bokeresete. (Pes. 1:1, 2; Bar. 10:13, 14; 1 Tim. 5:8; Baheb. 10:24, 25) Ditiro tse dingwe tse di jaaka go ikatisa ka tsela e e lekaneng le boitlosobodutu jo bo siameng di mosola. (Mar. 6:31; 1 Tim. 4:8) Mme dilo tseno tse di seng botlhokwa thata di tshwanetse go bewa mo maemong a tsone.
4 Mokaulengwe mongwe yo mosha o ne a batla go baya dilo tsa Bogosi kwa pele ka go tsenela bodiredi jwa nako e e tletseng go na le go gagamalela thuto e e kwa godimo go ipaakanyetsa tiro ya lefatshe. O ne a ithuta puo e sele mme a fudugela kwa go nang le tlhokego e kgolwane gone. O ne a re: “Ke itumelela botshelo mono. Tshimo e monate tota! Ke eletsa e kete basha botlhe ba ka dira sengwe se se jaaka seno mme ba ikutlwele gore go ntse jang. Ga go na sepe se se gaisang go direla Jehofa ka peloyotlhe.” Ee, go baya Bogosi kwa pele go re tlisetsa masego mme sa botlhokwa le go feta, go itumedisa Rraarona yo o kwa legodimong, e bong Jehofa.—Baheb. 6:10.