Re Pitikolola Dilo Tse di Nweleletseng Kwa Teng Thata
1 Satane o foufaditse dipelo le megopolo ya batho ba le bantsi ka makgolo a le mantsi a dingwaga a dirisa dithuto tsa maaka le tsietso. O anamisitse dithuto tse di jaaka Tharonngwe, go sa sweng ga moya le molelo wa dihele. O tlhotlheletsa dipelaelo mo bathong malebana le go nna gone ga Mmopi le go dira gore ba belaele gore Modimo ke ene mokwadi wa Baebele. Dikgoreletsi tse dingwe tse di dirang gore batho ba se ka ba amogela molaetsa wa boammaaruri ke bomorafe le bosetšhaba. (2 Bakor. 4:4) Re ka pitikolola jang ditumelo tse di nweleletseng kwa teng thata tse di ntseng jalo?—2 Bakor. 10:4, 5.
2 Maikutlo a a Amega: Gantsi maikutlo a batho a amega thata ka ditumelo tse ba sa bolong go di rutiwa. Bangwe ga ba bolo go nna ba ntse ba dumela ditumelo tseo tse di phoso go simolola fa e sa le bana. Gore re thuse batho ba ba ntseng jalo, re tshwanetse go bua le bone ka tsela e e supang gore re tlotla dipono tsa bone.—1 Pet. 3:15.
3 Re ka bontsha batho bao gore re a ba tlotla ka go ba letla gore ba tlhalose gore ba dumela eng le gore ke ka ntlha yang fa ba dumela jalo. (Jak. 1:19) Gongwe ba dumela ba sa belaele gore moya ga o swe ka gonne ba swetswe ke mongwe yo ba mo ratang mme ba eletsa go mmona gape. Kgotsa ba ka tswa ba keteka malatsi a boikhutso ka gonne ba itumelela nako e ba kgonang go nna le ba malapa a bone ka yone. Go reetsa kafa ba ikutlwang ka teng go tla re thusa gore re kgone go tlhaloganya maikutlo a bone mme go tla dira gore re kgone go araba ka tsela e e ka nnang le matswela.—Dia. 16:23.
4 Etsa Jesu: Jesu o re tlhometse sekao se se molemo fa a ne a araba dipotso tsa monna yo o neng a itse Molao. Jesu ga a ka a mo naya dikarabo tse di tlhamaletseng e re ka monna yono a ne a se kitla a di amogela ka gonne a ne a rata ditumelo tsa gagwe thata. Go na le moo, Jesu o ne a mo lebisa mo Dikwalong, a mo kopa gore a tlhalose maikutlo a gagwe mme a bo a mo thusa gore a lemoge kgang ka go dirisa setshwantsho.—Luke 10:25-37.
5 Lefoko la Modimo le ka dira gore batho ba tlogele ditumelo tsa maaka tsa bodumedi. (Baheb. 4:12) Fa re tlhalosetsa batho boammaaruri ka bopelotelele le ka tsela e e amang pelo, re ka kgona go ba thusa gore ba gane dithuto tsa maaka mme ba amogele boammaaruri jo bo ka ba gololang.—Joh. 8:32.