Re na Le Matlotlo a a Botlhokwa A re Ka a Abelang ba Bangwe
1 Lefoko la Modimo le na le matlotlo a mantsi a semoya a re a anaanelang. (Pes. 12:6; 119:11, 14) Ka lekgetlho lengwe le le rileng, Jesu o ne a dirisa ditshwantsho tse di bontshang dikarolo tse di farologaneng tsa Bogosi mme morago ga foo o ne a botsa barutwa ba gagwe jaana: “A lo tlhalogantse dilo tseno tsotlhe?” Fa ba araba ka gore ba di tlhalogantse, o ne a ba raya a re: “E re ka go ntse jalo, motlhatlheledi mongwe le mongwe wa batho, fa a rutilwe ka bogosi jwa magodimo, o tshwana le monna, mong wa ntlo, yo o ntshang mo bobolokelong jwa gagwe jwa matlotlo dilo tse disha le tse dikgologolo.”—Math. 13:1-52.
2 Boammaaruri jwa Baebele jo re bo ithutileng fa re ne re simolola go ithuta bo ka tsewa bo tshwana le matlotlo a bogologolo. Fa re nna re tswelela pele re ithuta ka dilo tse di boteng tsa Lefoko la Modimo, re bona dithuto tse dingwe tsa Baebele, tse mo go rona e nnang matlotlo a masha. (1 Bakor. 2:7) Mo godimo ga moo, ka “motlhanka yo o boikanyego le yo o botlhale,” re kgona go tlhaloganya matlotlo ano a masha.—Math. 24:45.
3 Re anaanela thata matlotlo ano a semoya, a bogologolo le a masha. Seno se re tlhotlheletsa gore re batle go bona thapiso le go nna le boitemogelo jwa go nna barutisi ba Lefoko la Modimo, re abela ba bangwe matlotlo ano a boammaaruri jo re bo ithutileng ka bopelotshweu.
4 Ithute mo Sekaong sa ga Jesu: Go bontsha kafa a neng a ikutlwa ka teng ka matlotlo ano, Jesu o ne a dira matsapa a magolo a go a abela ba bangwe. Tota le fa a ne a lapile, ga a ka a emisa go ntsha matlotlo mo “bobolokelong,” jwa gagwe.—Joh. 4:6-14.
5 Lorato lo Jesu a neng a na le lone ka batho ba ba neng ba sa tlhaloganye dilo tsa semoya lo ile lwa mo tlhotlheletsa gore a ba abele matlotlo a a nayang botshelo a boammaaruri jwa Modimo. (Pes. 72:13) O ne a tlhomogela batho ba ba bolailweng ke tlala ya semoya pelo mme a tlhotlheletsega “go ba ruta dilo di le dintsi.”—Mar. 6:34.
6 Etsa Jesu: Fa re anaanela thata matlotlo a re nang le one jaaka Jesu, re tla tlhoafalela go bontsha batho matlotlo a semoya go tswa mo Baebeleng ka tlhamalalo. (Dia. 2:1-5) Le fa ka dinako tse dingwe re lapile, re tla bua ka boammaaruri jwa Dikwalo ka matlhagatlhaga go tswa pelong. (Mar. 6:34) Go anaanela thata ga rona matlotlo a re nang le one go tla re tlhotlheletsa gore re dire gotlhe mo re ka go kgonang mo bodireding, ka metlha re batla go nna le seabe se se oketsegileng.