‘Dikgang Tseno Tse di Molemo di Tla Rerwa’!
1. Re itse jang gore ga go na sepe se se ka emisang tiro ya go rera?
1 Ga go na sepe gotlhelele se se ka thibelang Jehofa go diragatsa thato ya gagwe. (Isa. 14:24) Le fa go ne go lebega e kete Moatlhodi Gidione le banna ba gagwe ba ba 300 ga ba kitla ba fenya kgatlhanong le mophato wa masole wa Bamidiana ba ba 135 000, Jehofa o ne a mmolelela jaana: “Ruri o tla boloka Iseraele mo seatleng sa Bamidiana. A ga ke go rome?” (Baatlh. 6:14) Ke tiro efe e Jehofa a e emang nokeng gompieno? Jesu o ne a re: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni.” (Math. 24:14) Ga go na ope yo o tla kgonang go emisa tiro eno gore e se ka ya dirwa!
2. Ke ka ntlha yang fa re ka solofela gore Jehofa a thuse mongwe le mongwe wa rona mo bodireding?
2 Jehofa o Thusa Mongwe le Mongwe wa Rona: Le fa re tlhomamisega gore Jehofa a ka dira gore Basupi ba gagwe ba atlege e le setlhopha, a re ka solofela gore Jehofa a thuse mongwe le mongwe wa rona? Mo nakong e moaposetoloi Paulo a neng a tlhoka thuso ka yone, o ne a utlwa kafa Jehofa a neng a mo tshegetsa ka teng ka Morwawe e bong Jesu. (2 Tim. 4:17) Ka tsela e e tshwanang re ka tshepa gore Jehofa o tla segofatsa maiteko a mongwe le mongwe wa rona a a dirang go diragatsa thato ya gagwe.—1 Joh. 5:14.
3. Ke maemo afe a Jehofa a re thusang mo go one?
3 A ditlhobaelo tsa letsatsi le letsatsi tsa botshelo di go tlogela o se na maatla a le kalo go nna le seabe mo bodireding? “O naya yo o lapileng maatla.” (Isa. 40:29-31) A o lebane le pogiso kgotsa kganetso? “Latlhela mokgweleo wa gago mo go Jehofa, mme ene o tla go tshegetsa.” (Pes. 55:22) A ka dinako dingwe ga o itshepe? “Tsamaya, mme ke tla nna le molomo wa gago.” (Ekes. 4:11, 12) A o na le mathata a botsogo a a dirang gore o se ka wa nna le seabe ka botlalo mo bodireding? Jehofa o anaanela e bile a ka dirisa maiteko a gago a o a dirang ka moya otlhe, go sa kgathalesege gore a mannye go le kana kang.—1 Bakor. 3:6, 9.
4. Go nna le tshepo mo go Jehofa go tla re ama jang?
4 Seatla sa ga Jehofa “ke sone se se otlolotsweng, ke mang yo o ka se busetsang morago?” (Isa. 14:27) E re ka re tshepa gore Jehofa o tla segofatsa bodiredi jwa rona, e kete re ka tswelela re rera “ka bopelokgale ka taolo ya ga Jehofa.”—Dit. 14:3.