A Leitlho la Gago Ga le A Raraana?
1. Go nna le ‘leitlho le le sa raraanang’ go bolela eng?
1 Se re tlhomileng matlho a rona mo go sone se tlhotlheletsa se re se dirang. A bo mafoko ano a ga Jesu a tshwanela jang ne: “Ka jalo, fa leitlho la gago le sa raraana, mmele otlhe wa gago o tla tlala lesedi”! (Math. 6:22) Fa leitlho la rona le sa “raraana” ka tsela ya semoya, le lebile mo boikaelelong bo le bongwe—go dira thato ya Modimo. Re baya Bogosi kwa pele mme ga re itewe tsebe ke dithoto tse di sa tlhokegeng kgotsa ditiro tse di ka kgoreletsang bodiredi jwa rona.
2. Ke eng se se ka sokamisang pono ya rona mme ke eng se se tla re thusang?
2 Botlhokwa Jwa go Itshekatsheka: Pono ya rona e ka sokamisiwa ke se baphasalatsi ba re bolelelang gore re a se tlhoka kgotsa ke se ba bangwe ba nang le sone. Pele ga re dira sengwe kgotsa re reka sengwe se se tla re tlhokang nako e ntsi, madi a mantsi kgotsa maatla a mantsi, go tla bo go le molemo go “bala ditshenyegelo” ka go ipotsa gore, ‘A seno se tla tokafatsa tirelo ya me go Jehofa kgotsa se tla e kgoreletsa?’ (Luke 14:28; Bafil. 1:9-11) Gape go botlhale gore ka metlha re nne re sekaseke kafa re ka tlhofofatsang matshelo a rona le go feta ka teng e le gore re dire mo go oketsegileng mo bodireding.—2 Bakor. 13:5; Baef. 5:10.
3. Re ithuta eng malebana le diphetogo tse kgaitsadi mongwe a neng a di dira gore a tlhofofatse botshelo jwa gagwe?
3 Fa kgaitsadi mongwe a ne a simolola go nna mmulatsela wa ka metlha, o ne a tlhopha go tswelela ka tiro ya gagwe ya boitshediso ya nako e e tletseng le fa gone go dira tiro ya nakwana go ne go ka mo naya madi a a lekaneng go ka itlamela ka dilo tse a di tlhokang. Kgabagare o ne a bolela jaana: “Ga go na ope yo o ka nnang motlhanka wa beng ba babedi. Ke ne ka tshwanela go tlogela dilo tse ke di batlang gore ke tle ke itlamele ka dilo tse ke di tlhokang. Ke ne ka lemoga gore dithoto di a fela fa nako e ntse e tsamaya mme ke tla tshwanelwa ke go bereka thata gore ke nne le tsone.” Maemo a gagwe a ne a mo letla gore a dire diphetogo go tlhofofatsa botshelo jwa gagwe le go fetola tiro e le gore a tswelele mo bodireding jwa bobulatsela.
4. Ke ka ntlha yang fa gone jaanong go potlakile gore re nne le leitlho le le sa raraanang?
4 Go potlaka ga dinako tse re tshelang mo go tsone go dira gore go nne botlhokwa le go feta gore re nne le leitlho le le sa raraanang. Letsatsi lengwe le lengwe le le fetang le re atametsa gaufi le bokhutlo jwa tsamaiso eno ya dilo le tshimologo ya lefatshe le lesha la Modimo. (1 Bakor. 7:29, 31) Ka go tlhoma mogopolo mo tirong ya go rera, re ka kgona go ipoloka mmogo le ba ba re reetsang.—1 Tim. 4:16.