Lebokoso La Dipotso

◼ A kgaitsadi o tshwanetse go rwala mo tlhogong fa a tshwere thuto ya Baebele a eme fa kgorong mme a tsamaya le mokaulengwe?

Fa kgaitsadi yo e leng mmoledi a tshwere thuto e e rulagantsweng ya ka metlha ya Baebele mme a na le mokaulengwe yo e leng mmoledi wa Bogosi, kgaitsadi yono o tshwanetse go rwala mo tlhogong. (1 Bakor. 11:3-10) Makasine wa Tora ya Tebelo wa July 15, 2002, tsebe 27, o tlhalosa jaana: “Eno ke thulaganyo ya go ruta e e rulagantsweng go sa le gale e e okamelwang ke motho yo o tshwereng thuto. Mo maemong a a ntseng jaana, thuto e latela se se dirwang kwa phuthegong. Fa mosadi yo e leng Mosupi a tshwara thuto e e ntseng jalo go na le Mosupi yo o kolobeditsweng wa monna, mosadi o tshwanetse go rwala mo tlhogong.” Seno se tshwanetse go dirwa e kane thuto e tshwarelwa mo ntlong, fa kgorong kgotsa mo maemong ape fela a mangwe.

Kafa letlhakoreng le lengwe, fa thuto ya Baebele e e tshwarwang go engwe fa kgorong e ise e nne thuto e e tlhomameng, go ka se tlhokege gore kgaitsadi a rwale fa a tsamaya le monna yo e leng mmoledi wa Bogosi, tota le fa boikaelelo jwa loeto lwa go boela e le go bontsha gore thuto ya Baebele e tshwarwa jang kgotsa go sekaseka tshedimosetso e e mo go nngwe ya dikgatiso tse di dirisiwang go ithuta. E re ka gantsi thuto e e tshwarwang go engwe fa kgorong e tsaya nako gore e nne thuto e e tlhomameng, ka gore go dirwe maeto a go boela gangwe le gape, baboledi ba tla tlhoka go sekaseka maemo le go nna tekatekano fa ba swetsa ka gore ke leng ba tshwanetseng go simolola go rwala.