Dirisa Ditshono Tse o Nang le Tsone go Anamisa Molaetsa wa Bogosi!

1. Re ka ithuta eng mo sekaong sa ga Dafide?

¹ Kgosi Dafide ga a ka a letla maemo a gagwe go mo kgoba marapo. Ka sekai, Dafide o ne a batla go agela Jehofa ntlo. Fa a ne a thibelwa go dira jalo, Dafide o ne a fetola mekgele ya gagwe mme a rulaganyetsa Solomone dilo gore a age tempele. (1 Dikg. 8:17-19; 1 Ditir. 29:3-9) Go na le gore Dafide a tlhome mogopolo mo go se a sa kgoneng go se dira, o ne a o tlhoma mo go se a neng a ka kgona go se dira. Re ka etsa Dafide jang fa re ntse re batla ditsela tsa go anamisa molaetsa wa Bogosi?

2. Re ka sekaseka maemo a rona jang?

² Dira Se o Ka se Kgonang: Ba le bantsi ba tlhofofaditse matshelo a bone gore ba tsenele bobulatsela jo bo thusang kgotsa jwa ka metlha. (Math. 6:22) A o ka nna mongwe wa bone? Fa o ntse o sekaseka maemo a gago ka thapelo, o ka lemoga gore “kgoro e kgolo e e isang kwa tirong” e go bulegetse. Fa go le jalo, dirisa tshono e o nang le yone!—1 Bakor. 16:8, 9.

3. Ke ditshono dife tsa go rera tse re ka di dirisang le fa maemo a rona a sa re letle go tsenela bobulatsela?

³ Go tweng fa maemo a gago a go thibela go nna mmulatsela? O se ka wa tlodisa ditshono tse o nang le tsone matlho. Ka sekai, fa o nna o kopana le batho ba e seng Basupi kwa tirong, goreng o sa dirise tshono eo go ba neela bosupi? Kgotsa fa o na le mathata a botsogo, a o ka dirisa ditshono tse o nang le tsone go rerela ba ba go thusang ka tsa kalafi? Se lebale gore go na le thulaganyo ya gore ba ba bokoa ka ntlha ya bogodi le go lwala thata, ba bege tirelo ya bone ya tshimo ka dikarolwana tsa metsotso e le 15. Fa o kwala pego ya gago ya kgwedi le kgwedi, tlhomamisa gore o kwala nako e o e dirisitseng o rera o se mo bodireding le dikgatiso dipe fela tse o di tsamaisitseng, go akaretsa dipampitshana le ditaletso tsa Segopotso le tsa kopano. O ka gakgamadiwa ke go bona kafa nako e nnye e o e fetsang mo bodireding e oketsang tirelo ya gago ka gone!

4. O ikemiseditse go dira eng?

⁴ Le fa maemo a rona e ka tswa e le afe, a re diriseng tshono epe fela e re nang le yone go anamisa dikgang tse di molemo. Re tla kgotsofadiwa ke go itse gore re dira sotlhe se re ka se kgonang ka ntlha ya Bogosi.—Mar. 14:8; Luke 21:2-4.