Go Tokafatsa Bokgoni Jwa Rona mo Bodireding—Go Rera mo Matlong a a Nang le Intercom

Lebaka La go Bo go Le Botlhokwa: Go ka tshosa go neela bosupi mo matlong a a nang le intercom. Re ka dira jang gore seno se se ka sa fokotsa tlhoafalo ya rona mo bodireding? Se lebale gore batho ba bangwe ba ka kgona go rerelwa fela go dirisiwa intercom. (Bar. 10:14) Go na le maitemogelo a a bontshitseng gore tsela eno ya go rera e ka nna le diphelelo tse di molemo tota. (Bona 2011 Yearbook, ts. 65-66, le 2000 Yearbook, ts. 54, ser. 3 ka Seesemane.) Ela tlhoko dikakantsho tse di latelang.

Kafa O ka Go Dirang ka Gone:

Baakanyetsa puisano e khutshwane mme o e kwale gore o kgone go e bala ka tlhamalalo fa o bua le mong wa ntlo o dirisa intercom. Go dira jalo go ka go thusa gore o bue o sa tshoga. Di tloga fela, tlhalosa gore ke eng fa o etile. Fa leina la mong wa ntlo le kwadilwe mo intercom, le dirise fa o bua le ene. Fa o konela, mmotse gore a o ka mo tlisetsa (kgotsa wa mo tlogelela) pampitshana kgotsa makasine o o tla mo nayang tshedimosetso e e oketsegileng.
Bua ka dilo tse di molemo. Bua ka matlhagatlhaga o ntse o nyenya jaaka e kete lo lebane difatlhego.
Ritibala mme o bue ka tsela e o tlwaetseng go bua ka yone. Bua ka tsela e e utlwalang sentle. Tila go didimala lobaka lo loleele mme o se ka wa buela ka bonako.
Dirisa temogo. Mo dikagong tse dikgolo go na le di-intercom tse dintsi. Gongwe go ka nna molemo gore o ye mo matlong a le mararo kgotsa a le mmalwa go tswa foo o kwale nomoro ya ntlo e o feletseng mo go yone mme o boele ka nako e nngwe. Batho ba ba nnang mo kagong eo ba ka nna ba simolola go re belaela fa ba re bona re tsamayatsamaya kgotsa re eme lobaka lo loleele re tobetsa di-intercom tsotlhe.

Leka Seno mo Kgweding Eno:

Ka nako ya kobamelo ya lelapa, ikatisetseng go rera mo matlong a a nang le intercom.