Tlhoma Mogopolo mo Tirong ya go Dira Barutwa
1. Ke eng se re tshwanetseng go se dira gore batho ba kgone go bolokwa?
1 Pego ya tirelo ya ngwaga wa 2014 e bontsha gore batho ba Modimo ba tlhagafetse e bile ba ikemiseditse go rera dikgang tse di molemo tsa Bogosi. (Math. 24:14) Tiro ya go rera ka ntlo le ntlo, matsholo a a kgethegileng a go tsamaisa dipampitshana le ditaletso mmogo le go neela bosupi phatlalatsa, go re thusitse gore re bolelele batho ba le bantsi ka molaetsa wa Baebele go feta le fa e leng pele. Mme gone, re tshwanetse go thusa batho gore ba nne barutwa ba ga Jesu ka go ithuta Baebele le bone gore ba kgone go bolokwa.—1 Tim. 2:4.
2. Ke dipotso dife tse re ka ipotsang tsone go re thusa gore re nne re eme sejaro go simolola thuto ya Baebele?
2 Nna o Eme Sejaro go Simolola Thuto ya Baebele: Fa o kopana le motho yo o kgatlhegelang molaetsa wa Baebele, a o leka ka natla go tsaya tshedimosetso ya gagwe le go boela kwa go ene ka bonako ka maikaelelo a go simolola thuto ya Baebele le ene? Ke leng la bofelo o neng o leka go simolola thuto ya Baebele mo lekgetlong la ntlha? Ke leng la bofelo o neng o kopa batho ba o ba nayang dimakasine kgwedi le kgwedi gore a o ka ithuta Baebele le bone? A o ile wa bontsha badirimmogo, baithuti, baagelani, ba losika le batho ba o ba tlwaetseng bidio ya Ke Eng fa o Tshwanetse go Ithuta Baebele? le ya Thuto ya Baebele e Tshwarwa Jang? Fa o dirisa kolotsana ya dikgatiso, a o leka go bolelela batho ba ba tsayang dikgatiso tse re di dirisang go ithuta le batho Baebele gore re na le thulaganyo ya mahala go ithuta Baebele ka kgatiso eo?
3. Ke eng se re se tlhokang gore re kgone go ruta batho boammaaruri ka tsela e e nang le diphelelo tse di molemo?
3 Jehofa le Jesu Ba a Re Thusa: Fa Jesu a ne a ntsha taelo ya gore go ‘dirwe barutwa,’ o ne a dirisa lefoko “tsamayang” e leng se se bontshang gore motho o tlhoka go tsaya matsapa. Mme gone, ga a ka a re latlhelela matsogo go na le moo, o ile a re solofetsa gore o tla re thusa. (Math. 28:19, 20) Jehofa le ene o re neile moya wa gagwe o o boitshepo, didirisiwa tse di ka re thusang e bile o a re thapisa gore re kgone go ruta batho boammaaruri. (Seka. 4:6; 2 Bakor. 4:7) Re ka rapela gore re ‘rate re bo re dire’ tiro eno e e botlhokwa thata.—Bafil. 2:13.
4. Ke ka ntlha yang fa re tshwanetse go tlhoma mogopolo mo tirong ya go dira barutwa?
4 Tiro ya go rera dikgang tse di molemo e dira gore motho a itumele thata. Mme gone, re itumela le go feta fa re ruta motho boammaaruri le go mo thusa go tsena ka “kgoro e e isang botshelong.” (Math. 7:14; 1 Bathes. 2:19, 20) Sa botlhokwa le go feta, fa re tlhomile mogopolo mo go direng barutwa, re itumedisa Jehofa yo o sa ‘eletseng gore ope a senngwe mme a eletsa gore botlhe ba fitlhe mo boikwatlhaong.’—2 Pet. 3:9.