Go Simolola Motlotlo o Dirisa Dipampitshana

Go simolola ka January 2018, khabara ya Bukana ya Botshelo le Bodiredi e ntse e tlhagisa karolo ya se re ka se buang mo bodireding. Re ntse re kgothalediwa go tlhoma mogopolo thata mo go bueng le batho go na le go ba naya dikgatiso fela. E le go thusa baboledi go tokafatsa tsela e ba buang le batho ka yone, dibidio tsa se re ka se buang mo bodireding di ntse di re bontsha gore re ka simolola motlotlo jang re dirisa Baebele fela. Mme gone, a seo se raya gore ga re a tshwanela go dirisa dikgatiso fa re rera ka ntlo le ntlo? Nnyaa! Ka sekai, dipampitshana e ka nna tsela e e motlhofo ya go simolola motlotlo. Re ka dirisa mokgwa o o latelang fa re buelela dipampitshana:

1. Botsa potso e e tlhagang mo tsebeng ya ntlha.

2. Mmontshe karabo e e tswang mo Baebeleng e e fitlhelwang mo temaneng kgotsa mo ditemaneng tse di kwa godimo mo tsebeng ya bobedi. Fa nako e go letla, bala dintlha tse di mo teng ga pampitshana eo lo bo lo tlotla ka tsone.

3. Naya mong wa ntlo pampitshana eo, o bo o mo kgothaletsa gore a bale dintlha tse di setseng ka nako ya gagwe.

4. Pele o tsamaya, mmontshe potso e e tlhagang mo setlhogong se se reng “Se o Ka Akanyang ka Sone” mme o rulaganye gore o tle go tlotla le ene ka karabo e e tswang mo Baebeleng mo nakong e e tlang.

Fa o boa, tlotla ka karabo ya potso e o neng wa e botsa o bo o botsa potso e nngwe e lo tla tlotlang ka yone mo nakong e e tlang. O ka nna wa tlhopha potso mo jw.org kgotsa mo kgatisong e e tlhagang ka fa morago ga pampitshana eo. Ka nako e e siameng, mmontshe boroutšhara jwa Dikgang Tse di Molemo Tse di Tswang Kwa Modimong! kgotsa kgatiso e nngwe e re ithutang le batho ka yone e e mo Lebokosong la go Ruta.