BOTSHELO JWA BOKERESETE
Dikopano di re Thusa go Rata ba Bangwe
Goreng re itumelela dikopano tsa ngwaga le ngwaga? Fela jaaka Baiseraele, dikopano di re naya tshono ya go obamela Jehofa re na le bakaulengwe le bokgaitsadi ba le diketekete. Re rata tshedimosetso yotlhe e e re thusang gore re nne re atamalane le Jehofa. Gape re itumelela nako e re e fetsang le ditsala le ba malapa a rona. Ke sone se se dirang gore re batle go nna teng malatsi otlhe a kopano.
Fa re na le tshono ya go kopana mmogo, ga re a tshwanela go akanya fela ka gore seo se ka re tswela mosola jang mme gape re tshwanetse go batla ditsela tsa go bontsha ba bangwe gore re a ba rata. (Bag 6:10; Bah 10:24, 25) Fa o tshwarela mokaulengwe kgotsa kgaitsadi kgoro gore a fete kgotsa o boloka manno a o a tlhokang fela, o a bo o bontsha gore o amega ka ba bangwe. (Baf 2:3, 4) Dikopano di re thusa gore re nne le ditsala tse disha. Pele ga thulaganyo ya kopano e simologa le morago ga yone le ka nako ya boikhutso, re ka ipha nako ya go tlotla le mongwe yo re sa mo itseng. (2Bak 6:13) Seno se ka go thusa gore o nne tsala le motho yo o tlotlang le ene. Gape, fa batho ba bona kafa re ratang ba bangwe ka gone, ba ka feleletsa ba batla go direla Jehofa.—Joh 13:35.
LEBANG BIDIO YA KOPANO YA BODITŠHABATŠHABA YA “LORATO GA LO KE LO FELA”!, LO BO LO ARABA DIPOTSO TSE DI LATELANG:
Bakaulengwe ba ba etileng, ba ile ba bontshiwa jang lorato kwa dikopanong tsa boditšhabatšhaba tsa 2019?
Ke eng fa go le gontle go bona batho ba ga Jehofa ba ratana e bile ba utlwana?
Bakaulengwe ba Setlhopha se se Laolang ba tlhomolotse dintlha dife tse di tlhalosang lorato lwa Bokeresete?
O ka bontsha jang gore o rata ba bangwe fa o le kwa kopanong?
Lorato lo thusitse jang bakaulengwe ba kwa Germany le kwa South Korea gore ba nne ba le seoposengwe?
Re tshwanetse go ikemisetsa go dira eng?