1 | Thapelo—‘Latlhela Ditlhobaelo Tsotlhe Tsa Gago mo go Ene’
BAEBELE E A RE: ‘Latlhela ditlhobaelo tsotlhe tsa gago mo [Modimong], ka gonne o a go kgathalela.’—1 PETERE 5:7.
Se e Se Kayang
Jehofa Modimo o re laletsa gore re mmolelele sepe fela se se re tshwenyang. (Pesalema 55:22) Re ka rapelela sengwe le sengwe, se ka tswa se le segolo kgotsa se le sennye. Fa e le gore selo seo se botlhokwa mo go rona, se botlhokwa le mo go Jehofa, ka gonne o a re kgathalela. Go rapela go botlhokwa thata ka gonne go tla re naya kagiso ya mogopolo.—Bafilipi 4:6, 7.
Kafa Seno se ka Thusang ka Gone
Fa re lwantshana le bolwetse bongwe jwa tlhaloganyo, re ka nna ra ikutlwa re le nosi. Gantsi batho ba bangwe ga ba tlhaloganye ka botlalo boemo jo re leng mo go jone. (Diane 14:10) Mme gone, fa re rapela Modimo re mmolelela kafa re ikutlwang ka gone, ka metlha o tla re reetsa a le pelotelele e bile o tla re tlhaloganya. Jehofa o a re bona, o itse botlhoko jo re bo utlwang le ntwa e re leng mo go yone, e bile o batla gore re mo rapele, re mmolelele sengwe le sengwe se se re tshwenyang.—2 Ditiragalo 6:29, 30.
Go rapela Jehofa go dira gore re tlhatswege pelo le go feta gore o a re kgathalela. Re ka ikutlwa jaaka mopesalema mongwe yo o ileng a rapela a re: “O bone gore ke a boga; o itse matshwenyego a me a magolo.” (Pesalema 31:7) Go itse gore Jehofa o bona bothata jo re lwantshanang le jone, go ka re thusa gore re tswelele re itshokile le ka dinako tse di thata. Mme gone, ga se gore o bona mathata a rona fela. Gape o tlhaloganya se re lebaneng le sone e bile o re thusa go bona kgomotso le kgothatso mo Baebeleng.