Kakantsho ya go Ithuta

Tshwara “Dipina Tsa Kobamelo” ka Tlhogo

“Fa ke kgobegile marapo, Jehofa o dirisa dipina tse di mo JW Broadcasting^® go nkgothatsa.”​—Lorraine, U.S.A.

Bakeresete ga ba bolo go opela “dipina tsa kobamelo” go baka Jehofa. (Bakol. 3:16) Go tshwara dipina tseno ka tlhogo go tla go thusa fa o se na buka ya dipina kgotsa sedirisiwa sa ileketeroniki. Dikakantsho tse di latelang di ka go thusa.

• Leka go tlhaloganya mafoko a pina. Go motlhofo go gopola selo se o se tlhaloganyang. Mafoko a dipina tsa rona tse dintsi, go akaretsa dipina tsa bana, a teng mo jw.org. Fa o le mo karolong ya Laeborari, ya kwa karolong ya Mmino.

• Kwala mafoko a pina e o batlang go e tshwara ka tlhogo. Seo se tla go thusa gore o a gopole.​—Dute. 17:18.

• Ikatise. Bala mafoko a pina kgapetsakgapetsa kgotsa e opele gantsinyana.

• Leka go bona gore a o e tshwere. Opela pina eo o sa lebelela mafoko a yone, go tswa foo leka go bona gore a o kgonne go e tshwara.