Re ka Ikanya se Baebele e se Buang

Re ka se tlhomamisege gore ditshwetso tse re di dirang di tla nna le diphelelo tse di molemo fa re ikaega fela ka maikutlo a rona kgotsa a batho ba bangwe. Baebele e re bolelela lebaka, mme gape e dira se se fetang seo. E re thusa go itse se se siameng le se se sa siamang, mme seo se dira gore re itumele.

RE TLHOKA GO KAELWA KE MODIMO

Mo Baebeleng, Jehofaa Modimo o re tlhalosetsa gore batho ba tlhoka kaelo ya gagwe le gore ga ba ka ke ba kgona go ikaela. (Jeremia 10:23) Ke gone ka moo a re kwaletseng melao e re e fitlhelang mo Baebeleng. Jehofa o rata batho e bile ga a batle gore re dire ditshwetso tse di sa siamang tse di tla re utlwisang botlhoko le go re thatafaletsa botshelo. (Duteronome 5:29; 1 Johane 4:8) Mo godimo ga moo, e re ka e le Mmopi wa rona, o na le botlhale le kitso e e tlhokegang go re naya kgakololo e e molemo go gaisa tsotlhe. (Pesalema 100:3; 104:24) Mme gone, Modimo ga a pateletse ope go tshela ka melao ya gagwe.

Jehofa o ne a naya batho ba ntlha e bong Adame le Efa sengwe le sengwe se ba neng ba se tlhoka gore ba itumele. (Genesise 1:28, 29; 2:8, 15) Gape o ile a ba naya ditaelo tse di motlhofo tse a neng a solofetse gore ba di ikobele. Le fa go ntse jalo, o ile a ba letla gore ba itlhophele gore a ba tla ikobela ditaelo tseo kgotsa jang. (Genesise 2:9, 16, 17) Ka maswabi, Adame le Efa ba ile ba tlhopha go tshela ka tsela e bone ba neng ba e batla go na le go ikobela ditaelo tsa Modimo. (Genesise 3:6) Go ne ga felela ka eng? A batho ba itumelela botshelo fa ba itirela ditshwetso tsa gore ke eng se se siameng le se se sa siamang? Nnyaa. Se se ntseng se direga go ralala dingwaga, se bontsha gore go itlhokomolosa melao ya Modimo ga go tlise boitumelo jwa mmatota le kagiso.—Moreri 8:9.

Baebele e na le kgakololo e re e tlhokang e le gore re kgone go dira ditshwetso tse di siameng go sa kgathalesege gore re nna kae kgotsa re tswa mo lelapeng le le ntseng jang. (2 Timotheo 3:16, 17; bona lebokoso le le reng “Buka e e Kwaletsweng Batho Botlhe.”) A re bone gore Baebele e dira seo jang.

Ithute mo go oketsegileng gore ke eng fa go tshwanela go bo Baebele e bidiwa “lefoko la Modimo.”—1 Bathesalonika 2:13. Leba bidio ya setlhogo se se reng Mokwadi wa Baebele ke Mang? mo jw.org.

LEBAKA LA GO BO BANGWE BA AKANYA GORE BAEBELE E KA SE BA THUSE

Batho bangwe ba akanya gore Baebele ga e ka ke ya nna le dikgakololo tse di mosola. Ba ka nna ba bua dintlha tse di latelang.

Mongwe a ka re: “Baebele e a ikganetsa.”

Boammaaruri: Kwa tshimologong, go ka lebega e kete dikarolo dingwe tsa Baebele ga di dumalane le tse dingwe. Mme gone, fa o ithuta tsela e di kwadilweng ka yone le gore di kwadilwe leng, o tla lemoga gore tota di a dumalana.

Fa o batla go bona dikai dingwe tse di amanang le kgang eno, bala setlhogo se se reng, “A Baebele e a Ikganetsa?” mo jw.org.

Mongwe a ka re: “Batho ba ba reng ba dumela mo Baebeleng ba dira dilo tse di bosula, ka jalo e tshwanetse ya bo e se na kaelo e e siameng.”

Boammaaruri: Ga re ka ke ra pega Baebele molato ka ntlha ya boitshwaro jwa batho ba ba sa diriseng dithuto tsa yone. E ne ya bolelela pele gore batho ba le bantsi ba ba reng ba dumela mo Baebeleng, go akaretsa le baeteledipele ba bodumedi, ba ne ba tla dira se se farologaneng le se e se buang. Gape e ne ya tlhalosa gore ka ntlha ya seo, dithuto tsa Baebele di ne di tla “kgobiwa.”—2 Petere 2:1, 2.

Fa o batla go bona sekai se le sengwe se se bontshang ditsela tse ka tsone baeteledipele ba bodumedi ba le bantsi ba ba sa ikobeleng se Baebele e se rutang, bala setlhogo se se reng “Is Religion Just Another Big Business?” mo jw.org.

Mongwe a ka re: “Batho ba ba dumelang mo Baebeleng ga ba tlotle batho ba ba farologaneng le bone.”

Boammaaruri: Baebele e rotloetsa batho gore ba tlotle ba bangwe. Ga e ba kgothaletse gore. . .

ba itseye ba le botoka go feta ba bangwe. —Bafilipi 2:3.
ba nyatse batho ba ba sa dumeleng se ba se dumelang kgotsa ba ba tshelang ka tsela e e farologaneng le ya bone.—1 Petere 2:17.
ba pateletse batho go dumalana le bone.—Mathaio 10:14.

Baebele e bontsha gore ka metlha Modimo o tshwara batho ka bonolo le ka tekatekano e bile o batla gore le rona re dire se se tshwanang. —Baroma 9:14.

Fa o batla go itse mo go oketsegileng, bala setlhogo se se reng, “Go Itshokelana—Kafa Baebele e ka Thusang ka Gone” mo jw.org.

BAEBELE E RE BOLELELA SE MODIMO A BATLANG GORE RE SE DIRE

Baebele e re bolelela kafa Jehofa a ntseng a dirisana le batho ka gone go tloga kwa tshimologong. Se se kwadilweng mo go yone se re thusa go lemoga gore ke eng se Modimo a se tsayang se siame kgotsa se sa siama, se se re solegelang molemo kgotsa se se ka re utlwisang botlhoko. (Pesalema 19:7, 11) Re ithuta melaometheo e e sa felelweng ke nako e e re thusang go dira ditshwetso tse di siameng letsatsi le letsatsi.

Ka sekai, akanya ka kgakololo eno e e mo go Diane 13:20: “Yo o tsamayang le batho ba ba botlhale o tla nna botlhale, mme yo o dirisanang le dimatla, dilo ga di na go mo tsamaela sentle.” Molaomotheo ono o sa ntse o thusa le gompieno fela jaaka o ne o thusa mo nakong e e fetileng. Baebele e na le melaometheo e e botlhokwa e e tshwanang le ono e le mentsi.—Bona lebokoso le le reng, “Botlhale Jwa Baebele Jo bo Sa Felelweng ke Nako.”

Gongwe o ka tswa o ipotsa gore, ‘Nka tlhatswega pelo jang gore kgakololo ya Baebele e ka nthusa?’ Setlhogo se se latelang se tla tlotla ka maitemogelo a batho bangwe.

a Jehofa ke leina la Modimo.—Pesalema 83:18.

BOTLHALE JWA BAEBELE JO BO SA FELELWENG KE NAKO

Le fa gone Baebele e kwadilwe dingwaga di ka nna 2 000 tse di fetileng, e sa ntse e thusa le gompieno. Tsela e batho ba bopilweng ka yone ga e ise e fetoge—re sa ntse re batla go kgotsofala le go itumelela botshelo. (Moreri 1:9) Botlhale jo bo tswang mo Baebeleng jo bo sa felelweng ke nako, bo ka re thusa go fitlhelela seo.

Go Ikanyega

“Re eletsa go ikanyega mo dilong tsotlhe.” —Bahebera 13:18.
“A yo o utswang a se ka a tlhola a utswa; go na le moo a a dire ka natla.”—Baefeso 4:28.

Go Dirisana le ba Bangwe

“A mongwe le mongwe a nne a dire se se tswelang motho yo mongwe mosola, e seng se se tswelang ene mosola.”—1 Bakorintha 10:24.
“Tswelelang lo itshokelana e bile lo itshwarelana ka pelo yotlhe.”—Bakolosa 3:13.

Go Dira Ditshwetso

“Motho yo o se nang maitemogelo o dumela lefoko lengwe le lengwe, mme yo o botlhale o akanyetsa kgato nngwe le nngwe e a e tsayang.”—Diane 14:15.
“Yo o botlhale o bona kotsi a bo a iphitlha, mme yo o se nang maitemogelo o tswelela a tsamaya a bo a tlelwa ke ditlamorago tse di botlhoko.”—Diane 22:3.