NNANG LO DISITSE!

Madumedi a Tshegetsa Ntwa Kwa Ukraine—Baebele e a Reng ka Gone?

Ela tlhoko se baeteledipele ba bodumedi ba ileng ba se bua ka ntwa ya kwa Ukraine:

“Moeteledipele wa kereke ya kwa Russia ya Orthodox, Patriarch Kirill ga a ise a bue sepe se se bontshang gore o kgatlhanong le se Russia e se dirileng Ukraine. . . . Maloko a kereke ya gagwe a dumalana le se Russia e se dirileng e bile a bua maaka ka ntwa ya kwa Ukraine.”—EUobserver, March 7, 2022.
“Patriarch Kirill . . . o dumalana le se Russia e se dirileng Ukraine ka gonne a re go ne go ntse go na le dikgotlhang magareng ga Russia le Ukraine.”—AP News, March 8, 2022.
“Moeteledipele wa kereke ya Orthodox ya kwa Ukraine e bong Metropolitan Epiphanius I wa kwa Kyiv, o ile a segofatsa masole a a tla lwantshanang le masole a Russia . . . Gape o ile a tlhalosa gore go bolaya masole a Russia ga se boleo.”—Jerusalem Post, March 16, 2022.
“Re le mokgatlho wa (UCCRO) re tshegetsa masole a a tla lwantshang masole a Russia e bile re a a rapelela.”—UCCROa Statement, February 24, 2022.

O akanya eng? A madumedi a a latelang Keresete a tshwanetseng o kgothaletsa maloko a one go ya ntweng? Baebele e a reng?

Madumedi a tswa kgakala le go tshegetsa ntwa

Madumedi a le mantsi a ntse a kgothaletsa batho go ya ntweng, a tlhalosa gore go dira jalo ga go phoso e bile go siame. Basupi ba ga Jehofa ba na le dingwaga di le dintsi ba thusa batho go bona gore se madumedi a se dirang ga se a siama. Ela tlhoko dikai dingwe tse di tlhagang mo dikgatisong tsa rona.

“The Crusades—A ‘Tragic Illusion’” shows how the Roman Catholic Church was responsible for massacres committed in the name of God and of Christ.
Setlhogo se se buang ka “Kereke ya Katoliki mo Afrika” se tlhalosa gore bodumedi ga bo a ka jwa thibela dintwa tsa merafe mo Afrika.
Ditlhogo tse di latelang: “A Bodumedi bo Molato?,” “Seabe sa Bodumedi mo Dintweng Tsa Batho,” le “Bodumedi bo Nna le Seabe” di tlhalosa gore Kereke ya Katoliki, ya Orthodox, le ya Porotesetanta di ntse di tshegetsa dintwa ka dingwaga di le dintsi.

A Madumedi a Bokeresete a tshwanetse go tshegetsa dintwa?

Se Jesu a neng a se ruta: “O tshwanetse go rata moagelani wa gago jaaka o ithata.” (Mathaio 22:39) “Tswelelang lo rata baba ba lona.”—Mathaio 5:44-47.

Akanya ka seno: A madumedi a tla bo a ikobela taelo ya ga Jesu ya gore re ratane fa a kgothaletsa maloko a one go ya ntweng? Fa o batla go bona karabo bala setlhogo se se reng “Bakeresete ba Boammaaruri le Ntwa” le se se reng “A go A Kgonega Gore o Rate Baba ba Gago?”

Jesu o ne a re: “Fa Bogosi jwa me e ne e le karolo ya lefatshe leno, batlhokomedi ba me ba ka bo ba tlhabane.” (Johane 18:36) “Botlhe ba ba dirisang tšhaka ba tla bolawa ka tšhaka.”—Mathaio 26:47-52.

Akanya ka seno: E re ka Bakeresete ba ne ba sa tshwanela go lwa tota le fa ba batla go sireletsa Jesu, a seo se raya gore ba tshwanetse go nna le dibetsa tse ba ka itshireletsang ka tsone? Bala setlhogo se se reng “A Ntwa e Tsamaisana le Bokeresete?” go bona gore Bakeresete ba bogologolo ba ne ba etsa Jesu jang le go latela dithuto tsa gagwe.

Go tla direga eng ka madumedi a a tshegetsang dintwa?

Baebele e bontsha gore Modimo o kgatlhanong le madumedi a a ipitsang a Bokeresete mme a sa rute dithuto tsa ga Jesu.—Mathaio 7:21-23; Tito 1:16.

Mo bukeng ya Baebele ya Tshenolo Modimo o tlhalosa gore o pega madumedi otlhe molato wa madi “a batho botlhe ba ba bolailweng mo lefatsheng.” (Tshenolo 18:21, 24) Fa o batla go itse gore ke ka ntlha yang fa Modimo a dira jalo, bala setlhogo se se reng “Babelona o Mogolo ke Eng?”
Jesu o ne a tlhalosa gore madumedi otlhe a Modimo a atla a ganang a tla senngwa ka ntlha ya ditiro tsa one tse di bosula, fela jaaka setlhare se se ungwang maungo a a bodileng ‘se remiwa se bo se latlhelwa mo molelong.’ (Mathaio 7:15-20) Fa o batla go itse gore seo se tla direga jang, bala setlhogo se se reng “Bokhutlo jwa bodumedi jwa maaka bo atametse!”

Basupi ba ga Jehofa ba Farologane le Madumedi a Mangwe

Basupi ba ga Jehofa ba kwa Russia le ba kwa Ukraine ga ba tseye karolo mo dipolotiking le mo dintweng. Tota le ba ba mo lefatsheng lotlhe ba ikobela taelo ya ga Jesu ya gore re ratane. Ka jalo ga re itshunye nko le mo dintweng. Ka ntlha ya go bo Basupi ba ga Jehofa ba ikobela melao ya Baebele, bangwe ba bone ba a bogisiwa. (Johane 15:19, 20; 2 Timotheo 3:12) Ka sekai Puso ya Russia e ile ya isa Basupi ba bangwe kwa dikgolegelong mme ba bangwe ya ba otlhaya botlhoko. Mafelo a re kopanelang kwa go one a tshotswe. Go bona tshedimosetso e e oketsegileng tsena mo www.jw-russia.org.

Fa o batla go bona gore Basupi ba ga Jehofa ba bogisiwa jang kwa Russia leba bidio ya metsotso e le menê ya Jehovah’s Witnesses in Irkutsk Remain Faithful Despite Brutal Home Raids ka Seesemane.
Basupi ba ga Jehofa ba itsege ka go se tseye letlhakore mo dipolotiking. Tota le ka nako ya puso ya Ba-Nazi le ka nako ya Soviet Union Basupi ba ga Jehofa ba ne ba sa tseye letlhakore, leba bidio ya Emang lo Nitame fa lo Ganediwa.

Tsweetswee etela websaete ya rona fa o eletsa go itse dilo di le dintsi tse re di dumelang le tsholofetso e e mo Baebeleng ya gore ga go kitla go tlhola go nna le dintwa. (Isaia 2:4; Jeremia 29:11) O ka ikgolaganya le rona fa o eletsa go itse mo go oketsegileng.

Photo credits, go tswa ka fa molemeng go ya ka fa mojeng: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Mokgatlho wa UCCRO o na le dikereke di le 15 tse di akaretsang Ba-Orthodox, Ba-Katoliki ba Ba-Gerika le Ba-Roma, Baporotesetanta, Ba-Evangelical denominations, Bajuda le Ba Muslim.