Nka Itshireletsa Jang Gore ke se Tshwenngwe ka Tsa Tlhakanelodikobo?
Karabo ya Baebele
Ela tlhoko dikakantsho tseno tse di ka thusang tse di theilweng mo Baebeleng:
Nna kelotlhoko. Nna botsalano le badirimmogo le wena o bo o ba tlotle, mme o tile botsalano jo bo ka dirang gore go bonale e kete o ka rata go tlhakanela dikobo le bone.—Mathaio 10:16; Bakolosa 4:6.
Apara diaparo tse di nang le seriti. Go apara diaparo tse di tsosang keletso ya tlhakanelodikobo go ka dira gore batho ba nne le kgopolo e e phoso ka wena. Baebele e re kgothaletsa gore re apare “ka boingotlo le go itekanela sentle ga mogopolo.”—1 Timotheo 2:9.
Tlhopha ditsala tsa gago sentle. Fa o fetsa nako e ntsi le batho ba ba ratang go tshameka ka maikutlo a lorato kgotsa ba ba ratang go tlhakanela dikobo le mongwe le mongwe, le wena ba ka go tshwara ka tsela eo.—Diane 13:20.
Tila metlotlo e e leswe. Fa motlotlo o simolola go nna le “dikgang tse di leswe, puo ya boeleele kgotsa metlae e e sa siamang,” tswa o tsamaye.—Baefeso 5:4, Baebele ya God’s Word.
Tila maemo a a ka go tsenyang mo kotsing. Ka sekai, fa mongwe a go kopa gore o sale le ene kwa tirong morago ga tiro kwantle ga lebaka, o gane.—Diane 22:3.
Tlhomama. Fa motho mongwe a go tshwenya ka tsa tlhakanelodikobo, mmolelele gore ga o rate mekgwa ya gagwe. (1 Bakorintha 14:9) Ka sekai o ka nna wa re: “O nna o ikgotlha ka nna, mme ga ke rate se o se dirang. O se tlhole o dira jalo.” O ka nna wa kwalela motho yo o go tshwenyang lekwalo, o mo tlhalosetse se se diragetseng, kafa o ileng wa ikutlwa ka teng le gore o batla gore a dire eng mo nakong e e tlang. Mo tlhalosetse gore tsela e o lebang dilo ka yone e theilwe mo melaong ya boitsholo le mo go se o se dumelang.—1 Bathesalonika 4:3-5.
Kopa thuso. Fa e le gore motho yo o go tshwenyang o tswelela ka mokgwa oo, bolelela tsala e o e tshepang, mongwe kwa gae, modirimmogo kgotsa mongwe yo o thusang batho ba ba tshwenngwang ka tsa tlhakanelodikobo. (Diane 27:9) Batho ba le bantsi ba ba tshwenngwang ka tsa tlhakanelodikobo ba ile ba thusiwa ke go rapela. Tota le fa o ise o ko o rapele pele, o se ka wa nyatsa thuso e o ka e newang ke Jehofa, “Modimo wa kgomotso yotlhe.”—2 Bakorintha 1:3.
Go tshwenngwa ka tsa tlhakanelodikobo go dira gore batho ba le dimilione ba se ka ba itumelela maemo a kwa tirong, mme Baebele e ka thusa.