A Setopo sa ga Jesu Se ne Se Phuthetswe ka Letsela la Kwa Turin?

Karabo ya Baebele

Ga go na gope mo Baebele e buang gone ka let-sela le le kwa toropong ya Turin. Batho ba le bantsi ba akanya gore letsela leno ke lone le setopo sa ga Jesu Keresete se neng se phuthetswe ka lone. Seo se dirile gore madumedi mangwe a tseye gore letsela leo ke sengwe sa dilo tse di boitshepo tsa bogologolo. Letsela leno le beilwe mo lefelong le le sireletsegileng thata kwa kerekeng nngwe e e kwa Turin kwa Itali.

A Baebele e dumalana le kgopolo ya gore letsela leno ke lone le Jesu a neng a phuthetswe ka lone? Nnyaa.

Bona dintlha tse tharo tse Baebele e sa dumalaneng le tsone ka letsela leno.

1. Letsela leno le boleele jwa disentimetara di le 442 le bophara jwa disentimetara di le 113 mme go na le letsela le lengwe la boleele jwa disentimetara di le 8 le le rokeletsweng mo go lone.

   Se Baebele e se buang: Setopo sa ga Jesu se ne se phuthetswe ka matsela a le mmalwa e seng le le lengwe fela. Tlhogo ya gagwe e ne e phuthetswe ka letsela le sele. Fa Jesu a sena go tsosiwa, mongwe wa baaposetoloi ba gagwe o ile a ya kwa lebitleng mme a “bona dihapo di le fa fatshe, le letsela le le neng le le mo tlhogong ya gagwe le se fa fatshe le dihapo mme le phuthetswe fa thoko kwa lefelong le lengwe.”​—Johane 20:6, 7.

2. Letsela leno le na le madi a go dumelwang gore a tswa mo setopong se se neng se sa tlhapisiwa.

   Se Baebele e se buang: Fa Jesu a sena go swa, barutwa ba gagwe ba ile ba dira dilo go ya ka “tsela e Bajuda ba neng ba tlwaetse go baakanyetsa phitlho ka yone.” (Johane 19:39-42) Moetlo oo o ne o akaretsa go tlhapisa setopo le go se tshasa oli le dinkgisamonate pele se tsenngwa mo lebitleng. (Mathaio 26:12; Ditiro 9:37) Ka jalo, barutwa ba ga Jesu ba ile ba tlhapisa setopo sa gagwe pele ba se hapa ka matsela.

3. Go ya ka Encyclopædia Britannica, letsela leno le na le setshwantsho sa monna yo mmele wa gagwe otlhe o phuthetsweng ka letsela le le lengwe fela.

   Se Baebele e se buang: Barutwa ba ga Jesu ba ba kwadileng ka botshelo jwa gagwe ba tlhalosa loso lwa gagwe, gore go ne go se na ope mo lebitleng la gagwe le gore basadi bangwe ba ile ba bona “pono e e seng ya tlholego ya baengele, ba ba neng ba re [Jesu] o a tshela.” (Luke 24:15-24) Fa e le gore letsela leno le ne le le mo lebitleng la ga Jesu, barutwa ba gagwe ba ka bo ba kwadile ka lone le ka setshwantsho se se neng se le mo letseleng leo. Ka jalo, ga go na gope mo Baebele e buang gone ka setshwantsho seno.

A letsela leno le tshwanetse go tsewa le le boitshepo?

Nnyaa. Le fa e le gore ke lone le setopo sa ga Jesu se neng se phuthetswe ka lone, go tla bo go le phoso go le tsaya le le boitshepo. Utlwa mabaka a a tswang mo Baebeleng.

1. Ga go tlhokege. Jesu o ile a re: “Modimo ke Moya, mme ba ba mo obamelang ba tshwanetse go obamela ka moya le ka boammaaruri.” (Johane 4:24) Modimo ga a batle gore re dirise ditshwantsho fa re mo obamela.

2. Go kgatlhanong le Dikwalo. Melao e e Lesome e kgala go obamela ditshwantsho. (Duteronome 5:6-10) Gape Baebele ya re Bakeresete ba ‘itise mo medingwaneng.’ (1 Johane 5:21) Batho bangwe ba re ga ba tseye letsela leno e le modingwana, ke fela gore ba le tsaya e le sesupo sa tumelo ya bone. Mme fa o tseela selo kwa godimo, se feleletsa se fetogile modingwana wa gago.a Ka jalo, motho yo o batlang go itumedisa Modimo ga a kitla a tseela ditshwantsho kgotsa lone letsela leno kwa godimo a le dira modingwana wa gagwe.