Nna Matsetseleko mo Bodiheding jwa Gago
1 Moaposetoloi Paulo o ne a kgothaletsa gore go nniwe le matsetseleko mo bodiheding. O ne a kwala jaana: “U tlhōahalèlè go ichupa u le molebosègi mo Modimoñ, u le modihi eo o senañ go tlhaywa ke ditlhoñ, u bua lehoko ya boamarure ka tshiamō.”—2 Tim. 2:15.
2 Go nna matsetseleko mo bodiheding ke selo seo motho a ka nnang le sone. Ka gone, re tshwanetse ra ‘tlhoafala’—re dire boiteko ka tlhoafalo—e le gore re ke re nne badihedi ba ba matsetseleko. Mme le fa go ntse jalo, ke eng seo se tla re thusang?
ITHUTE GO TSWA MO LEFOKONG LA MODIMO
3 Kitso eo re nang le yone ka namana ya Dikwalo e na le seabe ka tlhamalalo mo go nneng ga rona matsetseleko jaaka badihedi. Fa re tlwaelane botoka le seo Bibela e se rutang, seo se tla dira gore re nne matsetseleko mo go ‘bueng lefoko la boammaaruri ka tshiamo.’ Ka gone go botlhokwa gore re beele nako kwa thoko ya go ithuta ka namana.—1 Tim. 4:15, 16.
4 Tsela e nngwe eo re ka tlwaelanang le Lefoko la Modimo ka yone ke ka “go tlhōkōmèla segolo thata” tao e e tswang mo Bibeleng eo re e amogelang kwa dipokanong tsa phuthego. (Baheb. 2:1) Dintlha tse di molemo thata tseo di ka dirisiwang mo bodiheding go buiwa ka tsone mo dipuong tsa phatlalatsa kana motho a ka di ikgobokanyetsa go tswa mo Thutong ya Buka ya Phuthego. Sekolo sa Bodihedi sa Bolegodimo se re neela thapiso e e botlhokwa thata ya gore re nne barutisi ba ba matsetseleko, mme Pokano ya Tirelo e re neela dikakantsho tse di mosola le dipontsho tseo re ka di dirisang go re thusa gore re fetoge badihedi ba ba nang le bokgoni. Le fa go ntse jalo, gore re bapale go le gontsi, re tshwanetse ra bo re ipaakanyeditse sentle le go nna le seabe ka matlhagatlhaga mo dipokanong tsotlhe.
DIRISA DIKAKANTSHO
5 Paulo o ne a bolelela phuthego ya kwa Filipi gore e dirise dilo tseo e di ithutileng mo go ene. (Bafil. 4:9) Le rona re tshwanetse ra dirisa dilo tseo re di ithutang ka phuthego ya ga Jehofa. Ka sekai, mo tokololong ya July 15, 1988 ya Tora ya Tebelo, ditsebe 15-20, re ithutile ditsela tseo re ka itirelang tshimo e “ntšha” ka tsone mo ditulong tseo di berekiwang kgapetsa kgapetsa. Mo godimo ga go otlelela kafa go tlhokafalang ka gone gore re dirise mokgwa o mosha, o o ikuelang, e bile e le o o molemo wa 0go atameTOCla batho, setlhogo seno se ne sa re kgothaletsa gore re siamisetse mong wa ntlo gore a lebelele gore re tla mo etela ka metlha. Go ne ga neelwa kgakololo ya gore re batlane le ba ba tshwanelegang re dira jalo ka botlalo, re senka batho ba ba farologaneng bao ba nnang mo ntlong e le nngwe. Fa re dirisa dikakantsho tseno, re dirisa dilo tseo re di ithutang le go tokafatsa dikgono tsa rona mo bodiheding.
6 A re dirisa buka ya Go Fetolana ka metlha mo bodiheding jwa tshimo? Diketapele tse di akantshitsweng mo go yone mmogo le karolo e e leng malebana le ka moo re ka arabang ka gone batho bao go ka diragalang gore ba kgoreletse puisano, di ka lootsa dikgono tsa rona tsa go neela bosupi. Mo godimo ga moo, fa re baakanyetsa Setlhogo sa Motlotlo le tsela eo re tlileng go neela mpho ya kgwedi ka yone le go ithapisetsa seno go tla dira gore re nne le katlego mo bodiheding.
7 Fa e le gore o rata go nna le dikakantsho tse di oketsegileng tse di leng malebana le kafa o ka tokafatsang bodihedi jwa gago ka gone, buisana le molebedi wa tirelo kana motshwari wa lona wa thuto ya buka mme o mo kope gore a go thuse. Rotlhe re ka tokafatsa dikgono tsa rona jaaka badihedi, re “bua lehoko ya boamarure ka tshiamō.” Mo sebakeng se se sa fediseng pelo, Jehofa Modimo o tla fedisa tsamaiso eno e e boikepo. Go fitlhela ka nako eo, re eletsa go thusa ba le bantsi ka mo go ka kgonagalang ka gone gore ba bone poloko mme ka gone ba tlisetse Modimo wa rona e bong Jehofa tlotlo.—Yoh. 15:8.