Go Thusa Basha Gore Ba Tlose Bohutsana mo ao Bone
1 Jehofa o batla gore re ipelele mpho ya gagwe e e tlhotlhwakgolo ya botshelo. Ka gone, o re file kgololesego e e seng kana ka sepe e le gore re ke re latele dilo tseo pelo ya rona e di eletsang. Mme le fa go ntse jalo mo godimo ga kgololesego eo ya go dira dilo, Jehofa o re leba jaaka bao ba ikarabelang mo go seo re se dirang.—Mor. 11:9.
2 E re ka re sa itekanela e bile re le baleofi jaaka fa re ntse jaana, re ka tlosa jang bohutsana mo go rona joo bo ka re welang ka ntlha ya tsela eo re tshelang ka yone? (Mor. 11:10) A go ka kgonagala gore tota le e leng basha ba ba se nang boitemogelo ba tlose bohutsana mo go bone? Se se re itumedisang ke gore, karabo ya seno ke ee. Jehofa o itse sentle kafa re tlhokang go kaelwa ka gone, mme o re file kgakololo le kaelo ka lorato go thusa basha mmogo le ba ba godileng ka go tshwana gore ba fenye mathata a a golang ao metlha eno ya bofelo e itsegeng ka one.—Pes. 19:7; 119:9; 2 Tim. 3:1.
BOIKARABELO JWA BATSADI
3 Batsadi ga ba ka ke ba sireletsa bana ba bone gotlhelele mo dilong tse di ba tlhotlheletsang go dira bosula. Mme le fa go ntse jalo, mogopolo wa ngwana o ka nonotshiwa jang? Ka ‘go mo godisetsa mo kotlhaong le mo taong ya Morena.’ (Baef. 6:4) Magareng ga tse dingwe, seno se kopanyeletsa thuto ya lelapa, kaelo ya semoya le ya mo boitshwarong, tiro e e molemo ya fa sekolo se tswa, kotlhao e e tshwanetseng, le sekao se se molemo sa batsadi.
4 Buka ya Dipotso Tse Basha Ba Di Botsang—Dikarabo Tse Di Nang le Tharabololo, eo e golotsweng kwa Kopanong ya Kgaolo ya “Poifomodimo,” e diretswe go thusa basha. Gape e thusa batsadi gore ba tlotle le bana ba bone ka ditekanyetso tse di siameng. Fa melao ya Modimo e tsenngwa ka katlego mo mogopolong wa ngwana le mo pelong ya gagwe, melao eno e ka nna jaaka tlhotlheletso e e mo laolang, kana e e mo tsamaisang. Fa lelapa le tlotla ka dintlha tse di mo bukeng eno e ntšha seno se tla fa basha nonofo ya gore ba kgone go tlosa bohutsana mo go bone.
5 Ka nako eo buka ya Dipotso Tse Basha Ba Di Botsang e neng e gololwa ka yone, batsadi ba ne ba kgothalediwa gore ba e dirise jaaka eo ba bonang dintlha tsa motlotlo wa lelapa mo go yone. Kwa bokhutlong jwa kgaolo nngwe le nngwe, go na le karolo nngwe e e bidiwang “Dipotso tsa Puisano.” Dipotso tseno ga di a direlwa gore go tlhatlhobiwe dirapa ka go latelana ga tsone ka tsone. Potso nngwe le nngwe e akaretsa setlhogwana se le sengwe kana go feta moo. Ditlhogo dingwe tsa malapa di ka nna tsa tlhopha go sekaseka dipotso tseno morago ga go sena go balwa kgaolo yotlhe. Ba bangwe ba ka nna ba tla ba botsa dipotso mo gare, ka nako ya fa dintlha tse di leng ka fa tlase ga ditlhogwana tseo dipotso tseo di theilweng mo go tsone di balwa.
GO THUSA BASHA BAO BA LENG MO TSHIMONG YA RONA
6 Re ka nna ra bona basha ba le bantsi mo tshimong ya rona. Gongwe o setse o rulaganyeditse mokgwa oo o tlileng go o dirisa fa o ba e neela. Kana o ka nna wa rata go bolela sengwe sa go tshwana le seno:
7 “Re atisa go akanya ka bosha jaaka nako e e itumedisang thata ya matshelo a rona. Mme le fa go ntse jalo, sebe sa phiri ke gore, gompieno re bona basha ba le bantsi ba ba sa itumelang. A ga go a nna jalo? [Mo letle gore a arabe.] Ditekanyetso tse di fetogafetogang di bakile gore go nne le lefatshe le le tlhakatlhakaneng le le nang le mathata a le mantsi ao a amang basha mme a ba amoga boitumelo. Ba ka bona kae kaelo e e ikanyegang? [Mo letle gore a akgele.] Bona seo Bibela e se kgothaletsang mo go Pesalema 119:9. [E bale.] Bibela e tlotlomatsa boikarabelo joo batsadi ba nang le jone mo go ruteng se se siameng mme morago ga moo e neela taelo eno e e mo go Diane 1:8: [E bale.] Tumalanong le seno, buka ya Dipotso Tse Basha Ba Di Botsang—Dikarabo Tse Di Nang le Tharabololo e tletse ka kaelo e e mosola go ka dirisiwa eo e theilweng mo Bibeleng, mme e bile e na le maitemogelo a le mantsi ao e leng a mmatota a botshelo ao a tla thusang basha gore ba bone ka moo ba ka lebanang le isagwe ka katlego ka gone le go dira jalo ka boitumelo. [Mmontshe ditlhogo di le mmalwa tsa dikgaolo go ka tsosa kgatlhego ya gagwe.] O ka nna wa ipelela buka eno e e mosola e bile e na le ditshwantsho tse dintle ka moneelo wa R3.75 fela.”
8 Bibela e bontsha gore basha ba tshwanetse ba dirisa maikatlapelo a bone mo mekgeleng e e botlhale, e e botlhokwa. Eleruri buka eno e tla bontsha ba le bantsi kwa botlhale jo bo seng kana ka sepe bo ka bonwang teng—e leng mo Bibeleng. Abo e le sedirisiwa se se botlhokwa jang ne sa go kaela basha gore ba nne le botshelo jo bo tletseng gone jaanong le kwa isagweng e e bolokesegileng!—Mor. 12:1.