Ke ka Ntlha Yang fa o Tshwanetse go Naya Jehofa?
FA LETSATSI le ne le gotetse jalo kwa toropong e nnye ya Sarefathe kwa Sitone, motlholagadi mongwe o ne a iname a sela dikgong. O ne a tshwanetse go gotsa molelo gore a kgone go apaya dijonyana—mme e bile e le dijonyana tsa bofelo tse ene le morwawe yo mmotlana ba neng ba tlile go di ja. O ne a sa bolo go sotlega fa a ntse a leka go itlamela le morwawe ka nako ya leuba le tlala tse di tsereng lobaka lo loleele, mme seno se ne se feletse ka botlhoko. Ba ne ba se na dijo.
Go ne ga tla monna mongwe. Leina la gagwe e ne e le Elija, mme motlholagadi yono o ne a lemoga ka bonako fela gore ke moporofeti wa ga Jehofa. Go lebega a ne a kile a utlwa ka Modimo ono. Jehofa o ne a farologane le Baale, yoo kobamelo ya gagwe ya bosetlhogo e e leswe e neng e tletsetletse mo nageng ya Sitone. Ka jalo o ne a setse a iketleeditse go thusa fa Elija a ne a mo kopa metsi. Gongwe o ne a ikutlwa gore Jehofa o ne a tla mo amogela fa a ka dira jalo. (Mathaio 10:41, 42) Lefa go ntse jalo, Elija o ne a kopa mo go oketsegileng—dijonyana. O ne a tlhalosa gore dijo tse di setseng ke tsa bofelo. Lefa go ntse jalo, Elija o ne a nnela go kopa a mo tlhomamisetsa gore Jehofa o ne a tla mo naya dijo ka kgakgamatso go fitlha leuba le feta. O ne a dira eng? Baebele ya re: “A ya a dira jaaka polelo ya ga Elija.” (1 Dikgosi 17:10-15) Mafokonyana ano a tlhalosa tiro e e supang tumelo e kgolo—tumelo eno e ne e le kgolo, mo le Jesu Keresete a neng a tlotlomatsa motlholagadi yono dingwaga di le sekete moragonyana!—Luke 4:25, 26.
Lefa go ntse jalo, go ka lebega go sa utlwale gore Jehofa o ne a ka batla go le gontsi jaana mo mosading yo a neng a sena sepe. Gone mme go ntse jalo, segolo thata fa re akanya ka thapelo e e neng ya rapelwa ke monna mongwe wa maemo a a kwa godimo. Batho ba ne ba neela ka bopelotshweu fa Kgosi Dafite a ne a kgobokanyetsa morwawe Solomone meneelo e a neng a tla e dirisa go aga tempele. Go ya ka dipalo tsa segompieno, dineo tse di neng tsa ntshiwa di ne di balwa ka dimilione di le diketekete tsa diranta! Lefa go ntse jalo, Dafite o ne a rapela Jehofa jaana: “Nna ke mang, le batho ba me ke bomang, fa e bo ne ne fano re ntsha dilo ka pelo yotlhe ka mokgwa o o ntseng jaana? Gonne dilo tsotlhe di tswa mo go wena, mme re go neile mo e leng ga gago fela.” (1 Ditirafalo 29:14) Fela jaaka Dafite a boletse, sengwe le sengwe ke sa ga Jehofa. Ka jalo, nako nngwe le nngwe fa re ntsha sepe fela gore go tsweledisiwe kobamelo e e itshekileng, re a bo re naya Jehofa se e setseng e le sa gagwe. (Pesalema 50:10) Ka jalo, go tsoga potso eno, Tota ke eng fa Jehofa a batla re mo neela dilo pele?
Karolo ya Botlhokwa ya Kobamelo e e Itshekileng
Karabo e e motlhofo go gaisa ke gore, go tloga fela bogologolo, Jehofa o ne a dira gore go aba e nne karolo ya botlhokwa ya kobamelo e e itshekileng. Monna yo o ikanyegang, Abele, o ne a ntshetsa Jehofa setlhabelo ka dingwe tsa diphologolo tsa gagwe tse a di ratang thata. Ditlhogo tsa ditso e bong Noa, Aberahame, Isake, Jakobe le Jobe le tsone di ne tsa neela ka tsela e e tshwanang.—Genesise 4:4; 8:20; 12:7; 26:25; 31:54; Jobe 1:5.
Molao wa ga Moshe o ne o laola meneelo e e ntshediwang Jehofa. Ka sekai, Baiseraele botlhe ba ne ba laelwa gore ba ntshe tsa bolesome, kana ba neele karolo ya bolesome ya maungo a dijalo le karolo ya bolesome ya se matsomane a bone a oketsegileng ka sone. (Dipalo 18:25-28) Meneelo e mengwe e ne e sa laolwe thatathata jaana. Ka sekai, Moiseraele mongwe le mongwe o ne a tshwanetse go neela Jehofa maitibolo a leruo le mabutswapele a dijalo. (Ekesodo 22:29, 30; 23:19) Lefa go ntse jalo, Molao o ne o tlogelela mo mothong gore a bone gore o tla neela mabutswapele a le kana kang, se se botlhokwa e ne e le go ntsha a a gaisang. Gape Molao o ne o laola gore go ntshiwe ditshupelo tsa tebogo le tsa ikano tse di neng di ntshiwa fela ka go rata. (Lefitiko 7:15, 16) Jehofa o ne a kgothaletsa batho ba gagwe gore ba ntshe go lekana tsela e a neng a ba segofaditse ka yone. (Duteronome 16:17) Fela jaaka go ne go ntse fa go ne go agiwa motlaagana mme morago go agiwa tempele, mongwe le mongwe o ne a ntsha kafa pelo ya gagwe e neng e mo laola ka gone. (Ekesodo 35:21; 1 Ditirafalo 29:9) Eleruri, meneelo e e ntseng jalo e e neng e ntshiwa ka go rata e ne e itumedisa Jehofa fela thata!
Mo ‘molaong wa ga Keresete,’ tsotlhe di ne di ntshiwa ka go rata. (Bagalatia 6:2; 2 Bakorinthe 9:7) Seo se ne se sa reye gore balatedi ba ga Keresete ba ne ba sa tlhole ba ntsha sepe kana gore ba ne ba ntsha go le gonnye. E ne e le se se farologaneng! Jaaka fa Jesu le baaposetoloi ba gagwe ba ne ba rera mo Iseraele, setlhopha sa basadi se ne se ba sala morago e bile se ba direla ka dithoto tsa bone. (Luke 8:1-3) Moaposetoloi Paulo le ene o ne a amogela dimpho go mo thusa mo tirong ya gagwe ya borongwa, mme le ene o ne a kgothaletsa diphuthego dingwe go neela ba ba tlhokang madi. (2 Bakorinthe 8:14; Bafilipi 1:3-5) Setlhopha se se laolang kwa Jerusalema se ne sa tlhoma banna ba ba nang le boikarabelo gore ba tlhomamise gore meneelo e neelwa ba ba e tlhokang. (Ditiro 6:2-4) Ka phepafalo, Bakeresete ba pele ba ne ba bona e le tshiamelo tota go ema nokeng kobamelo e e itshekileng ka ditsela tseo.
Lefa go ntse jalo, re ka ipotsa lebaka la go bo Jehofa a dirile go aba karolo ya kobamelo ya gagwe. Akanyetsa mabaka ano a manè.
Lebaka La go Bo re Aba
Sa ntlha, Jehofa o dira go aba karolo ya kobamelo ya boammaaruri gonne re solegelwa molemo fa re dira jalo. Go re thusa go anaanela bomolemo jwa Modimo thata. Ka sekai, ke eng fa motsadi a itumela thata fa ngwana a mo rekela mpho kana a e mo direla? A mpho eno ke sengwe se motsadi a se tlhokang thata se a neng a ka se ka a se bona ka tsela epe? Gongwe ga go a nna jalo. Go na le moo, motsadi o itumelela go bona ngwana a na le moya wa go supa tebogo le go aba. Ke ka one mabaka ao Jehofa a re kgothaletsang gore re abe e bile o itumela thata fa re dira jalo. Re mmontsha ka seno gore ruri re itumelela bopelonomi le bopelotshweu jwa gagwe mo go rona. Ke moabi wa “neo nngwe le nngwe e e molemo, le se se molemo sengwe le sengwe se se tletseng,” ka jalo ga re kitla re tlhoka mabaka a go mo leboga. (Jakobe 1:17) Mo godimo ga moo, Jehofa o ntshitse Morwawe yo o rategang, a mo letla gore a swe gore re kgone go tshelela ruri. (Johane 3:16) A re ka kgona go mo leboga ka botlalo?
Sa bobedi, fa re itlwaetsa go aba, re tla bo re ithuta go etsa Jehofa le Morwawe, Jesu Keresete, mo selong se se botlhokwa thata. Jehofa o aba ka dinako tsotlhe, o pelotshweu ka metlha. Fela jaaka Baebele e bolela, o re naya “botshelo, le mowa le dilo tsotlhe.” (Ditiro 17:25) Re ka mo lebogela mowa o re o hemang, dijo dingwe le dingwe tse re di itumelelang fa re di ja, nako nngwe le nngwe e re e itumelelang le e re e kgotsofalelang mo botshelong. (Ditiro 14:17) Jesu o ne a supa moya wa go rata go aba fela jaaka Rraagwe. O ne a direla batho a sa ikgogone. A o ne o itse gore fa Jesu a ne a dira dikgakgamatso, o ne a felelwa ke nonofo? Dikwalo di re bolelela ka makgetlho a a fetang le le lengwe gore “nonofo e ne e tswa mo go ene” fa a ne a fodisa balwetse. (Luke 6:19; 8:45, 46) Jesu o ne a le pelotshweu tota mo a neng a goromeletsa moya wa gagwe, botshelo jwa gagwe, mo losong.—Isaia 53:12.
Ka jalo, fa re aba, e ka tswa e le nako ya rona, nonofo kana dithoto, re etsa Jehofa e bile re itumedisa pelo ya gagwe. (Diane 27:11; Baefeso 5:1) Gape re latela sekao se se itekanetseng sa motho yo a neng a itshola sentle se re se tlogeletsweng ke Jesu Keresete.—1 Petere 2:21.
Sa boraro, go aba go kgotsofatsa dilo tse di tlhokegang tota. Ke boammaaruri gore Jehofa o ne a ka kgona go dira dilo tse di tlhokegang tsa Bogosi kwa ntle ga thuso ya rona, fela jaaka a ne a ka kgona go rulaganya gore maje a goe go na le gore a re dirise gore re rere lefoko. (Luke 19:40) Lefa go ntse jalo, o tlhophile go re tlotlomatsa ka ditshiamelo tseno. Ka jalo, fa re neela ka dithoto tsa rona gore dilo tse di direlwang Bogosi di tswelele, re kgotsofadiwa ke go itse gore re dira karolo ya mmatota mo tirong eno e e botlhokwa thata e e dirwang mo lefatsheng.—Mathaio 24:14.
Tota ga go tlhokege gore go bolelwe gore go tlhokega gore tiro ya lefatshe lotlhe e e dirwang ke Basupi ba ga Jehofa e ntshediwe madi. Mo ngwageng wa tirelo wa 1995, Mokgatlho o ne wa dirisa dimilione di ka nna 260 tsa diranta fela mo go tlameleng babulatsela ba ba kgethegileng, barongwa le balebedi ba ba etang mo dikabelong tsa bone tsa tirelo ya tshimo. Lefa go ntse jalo, madi ao a mannye thata fa a bapisiwa le a ditiro tsa go aga le a go tsamaisa diofise tsa makala le mafelo a bogatisetso go dikologa lefatshe. Lefa go ntse jalo, tseno tsotlhe di kgonega ka ntlha ya meneelo e e ntshiwang ka go rata!
Batho ba ga Jehofa ka kakaretso ga ba ke ba tsaya gore fa ba humanegile ba ka lesa ba bangwe gore ba rwale morwalo ba le nosi. Boikutlo jo bo ntseng jalo bo ka dira gore re latlhegelwe re se ka ra dira karolo eno ya kobamelo ya rona. Go ya ka moaposetoloi Paulo, Bakeresete ba kwa Maketonia ba ne ba le mo ‘khumanegong e kgolo.’ Lefa go ntse jalo, ba ne ba ikopela thata gore ba newe tshiamelo ya go aba. Mme Paulo o ne a supa gore ba ne ba ntsha, go “fetisa nonofo ya bone”!—2 Bakorinthe 8:1-4.
Sa bonè, Jehofa o dirile gore go aba e nne karolo ya kobamelo ya boammaaruri gonne go aba go tla re thusa gore re itumele. Jesu ka boene o ne a bolela jaana: “Go aba go lesego bogolo go go amogela.” (Ditiro 20:35) Ke kafa Jehofa a re dirileng ka teng. Ke lebaka le lengwe la go bo re ka ikutlwa gore lefa re ka mo naya go le kana kang, seo ga se kitla se lekana go supa kafa re mo anaanelang ka teng mo dipelong tsa rona. Lefa go ntse jalo, se se itumedisang ke gore Jehofa ga a solofele gore re abe go feta kafa re ka kgonang ka teng. Re ka tshepa gore o itumela thata fa re neela kafa re kgonang ka teng ka boitumelo!—2 Bakorinthe 8:12; 9:7.
O Bona Masego fa o Supa Moya wa go Aba
Fa re boela kwa sekaing se re se umakileng pele, mma re re motlholagadi wa Sarefathe o ne a akanya gore Elija o ne a tla newa dijo ke motho mongwe o sele. A bo a ka bo a ne a ile a se ka a segofadiwa jang ne!
Tota ga go na pelaelo ya gore Jehofa o segofatsa ba ba supang moya wa go aba. (Diane 11:25) Motlholagadi wa kwa Sarefathe ga a ka a boga fa a sena go aba dijo tse a neng a akanya gore ke tsa bofelo. Jehofa o ne a mo duela ka go mo direla kgakgamatso. Fela jaaka Elija a ne a solofeditse, sejana sa gagwe sa boupe le sa lookwane di ne tsa nna di tletse go fitlha leuba le feta. Lefa go ntse jalo, o ne a bona tuelo e kgolo go gaisa. Fa ngwana wa gagwe a ne a tsenwa ke bolwetse a bo a swa, Elija, monna wa Modimo wa boammaaruri, o ne a mo tsosa. A bo seo se tshwanetse sa bo se ile sa mo nonotsha semoyeng jang ne!—1 Dikgosi 17:16-24.
Gompieno ga re lebelele gore re ka segofadiwa ka dikgakgamatso. (1 Bakorinthe 13:8) Lefa go ntse jalo, Jehofa o re tlhomamisetsa gore o tla ema nokeng ba ba mo direlang ka moya otlhe. (Mathaio 6:33) Ka jalo, re ka tshwana le motlholagadi wa Sarefathe mo go seo, re aba ka bopelotshweu, re tshepa tota gore Jehofa o tla re tlamela. Ka mo go tshwanang, re ka itumelela masego a magolo a semoya. Fa e le gore re itlwaeditse go aba ka metlha, go na le go aba ka sewelo, ka tshoganetso fela, re tla kgona go boloka leitlho la rona le bona sentle e bile le lebile dilo tse di direlwang Bogosi jaaka Jesu a ne a akantsha. (Luke 11:34; bapisa 1 Bakorinthe 16:1, 2.) Gape go tla re thusa gore re ikutlwe re atamalane le Jehofa le Jesu jaaka badirimmogo le bone. (1 Bakorinthe 3:9) Mme go tla oketsa moya wa bopelotshweu, wa go aba oo baobamedi ba ga Jehofa mo lefatsheng lotlhe ba tlhaolwang ka one.
[Lebokoso mo go tsebe 31]
DITSELA TSE BANGWE BA NTSHANG
MENEELO Ya Tiro Ya Lefatshe Ka Bophara Ka Tsone
Batho ba bantsi ba beela kwa thoko madi a ba a tsenyang mo mabokoseng a moneelo a a kwa Holong ya Bogosi. Diphuthego di romela madi ano kgwedi nngwe le nngwe kwa ntlokgolong ya lefatshe lotlhe kwa Brooklyn, kwa New York, kana kwa ofising ya lekala ya lefelo la bone.
Go ka nna ga romelwa meneelo ya madi a a ntshitsweng ka go rata ka tlhamalalo kwa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, kana kwa ofising ya Mokgatlho e e thusang naga ya gaeno. Dibenya kana dilo tse dingwe tse di tlhwatlhwakgolo di ka ntshiwa moneelo. Go tla tlhokega gore meneelo eno e romelwe le lekwalo le lekhutshwane le le tlhalosang gore eno ke mpho fela.
Thulaganyo ya meneelo e e ikaegileng ka mabaka mangwe
Madi a ka neelwa Mokgatlho wa Watch Tower gore o a tlhokomele go fitlha motho yo o a ntshitseng a tlhokafala, go dumalanwe gore mong wa madi o tla a busediwa fa a a tlhoka.
GO ABA O RULAGANTSE SENTLE
Mo godimo ga go ntsha dimpho tsa madi ka tlhamalalo le meneelo e e ikaegileng ka mabaka mangwe, go na le mekgwa e mengwe gape ya go aba e e tsweledisang tiro ya Bogosi mo lefatsheng lotlhe. E akaretsa:
Inshorense: Mokgatlho wa Watch Tower o ka kwalwa gore ke one o tla amogelang madi a inshorense ya botshelo kana a thulaganyo ya go tlogela tiro/phenshene. Mokgatlho o tshwanetse go itsisiwe ka thulaganyo epe fela e e ntseng jalo.
Ditoko le Dibonto: Ditoko le dibonto di ka newa Mokgatlho wa Watch Tower ka tlhamalalo jaaka mpho kana ka thulaganyo e mo go yone yo o ntshitseng moneelo ono a tswelelang a bona lotseno lwa one.
Ditsha le Dikago Tsa Tsone: Ditsha le dikago tse di kgonang go rekisiwa di ka neelwa Mokgatlho wa Watch Tower ka tlhamalalo kana ka gore di nne tsa mong fa a santse a tshela, mo a ka tswelelang a nna mo go tsone fa a santse a tshela. Motho o tshwanetse go ikgolaganya le Mokgatlho pele a kwadisa ditsha dipe le dikago tsa tsone mo leineng la Mokgatlho.
Diwili: Dithoto kana madi di ka tlogelelwa Mokgatlho wa Watch Tower ka wili e e kwadilweng semmuso. Go tshwanetse ga romelwa khopi ya wili kwa Mokgatlhong.
Bao ba kgatlhegelang dithulaganyo tseno tsa go aba ba tshwanetse go ikgolaganya le Treasurer’s Office kwa atereseng e e kwadilweng fa tlase kana ofisi ya Mokgatlho e e thusang naga ya lona. Treasurer’s Office e tshwanetse go amogela makwalo a a tshwanetseng a dithulaganyo tseno.
PLANNED GIVING DESK
TREASURER’S Office Watch Tower Bible and Tract Society of Pennsylvania
Private Bag X2067, Krugersdorp, 1740
Nomoro ya mogala: (011) 761-1000