Ditsela Tsa go Atolosa Bodiredi Jwa Gago
1 Dingwaga di le 40 tse di fetileng, setlhogo se se reng “A o Dira Bojotlhe Jwa Gago?” se ne sa tswa mo go Tora ya Tebelo ya January 15, 1955 (ka Seesemane). Se ne sa tlhalosa sentle ka moo go ka kgonegang ka teng gore batho ba ga Jehofa ba tokafatse maiteko a ba a dirang mo bodireding e le gore ba ka oketsa tiro ya bone ya Bogosi. Kgakololo eo e e molemo e sa ntse e dira le gompieno, fa re ntse re tswelela pele re dira bojotlhe jwa rona.
2 Tirelo yotlhe ya rona e tshwanetse ya tlhotlhelediwa ke taolo e kgolo go di gaisa tsotlhe: “O tshwanetse go rata Jehofa Modimo wa gago ka pelo yotlhe ya gago le ka moya otlhe wa gago le ka mogopolo otlhe wa gago le ka nonofo yotlhe ya gago.” (Mar. 12:30) Re bontsha gore re rata Jehofa thata ka go dirisa ditshono tsotlhe tse re nang le tsone ka botlalo gore re tsweledise tiro ya gagwe ya Bogosi. Akanya ka ditsela tse di latelang tse re ka atolosang bodiredi jwa rona ka tsone.
3 Rwala Boikarabelo Jwa Gago: Bakaulengwe ba ba ineetseng ba ka gagamalela go tshwanelega gore ba nne batlhanka ba bodiredi mme go tswa foo ba gatele pele go direla e le bagolwane. Ditlhogo tsa “A o Eletsa go Dira Sengwe se Segolwane?” le “A o Tshwanelegela go Direla?” tse di mo makasineng wa Tora ya Tebelo ya September 1, 1990, di ne tsa rotloetsa bakaulengwe ba le bantsi gore ba tshwanelegele go tsaya maikarabelo mo phuthegong. Botsa bagolwane ba ba mo phuthegong ya gago gore ke dikakantsho dife tse di kgethegileng tse o ka di dirisang gore o senke boemo jono le gore o tshwanelege.
4 Bagolwane le batlhanka ba bodiredi ba ba iseng ba nyale ba kopiwa go akanya ka kelotlhoko ka go ikwadisetsa go ya kwa Sekolong sa Thapiso sa Bodiredi. O ka itlwaetsa sekolo seno ka go bala ditshupiso tse di ka fa tlase ga “Ministerial Training School” mo go Watch Tower Publications Indexes tsa 1986-1995, 1996 le 1997. A o bona gore o bulegetswe ke ‘kgoro e kgolo ya tirelo’ kwa pele? (1 Bakor. 16:9a) Bakaulengwe ba bantsi ba ba neng ba dirisa sebaka seno ba ne ba sa akanya ka ditshiamelo tsotlhe tsa tirelo tse ba ka nnang le tsone. Gompieno ba ipelela go direla kwa Bethele kana kwa tshimong e le babulatsela ba ba kgethegileng, barongwa kana balebedi ba ba etang.
5 Senka Ditsela Tsa go Direla ka Nako e e Tletseng: Basha ba ba alogang kwa sekolong se segolwane, bommalapa le mongwe fela yo o leng mo dingwageng tsa go tlogela tiro ya boitshediso ba tshwanetse go akanyetsa go nna babulatsela ka tsela e e masisi. Tlhatlhoba tsenyeletso e e mo go Tirelo ya Rona ya Bogosi ya July 1998, mme o bue le babulatsela ba maemo a bone a neng a tshwana le a gago. Go ka nna ga direga gore o tla tlhotlheletsega go atolosa bodiredi jwa gago ka go nna mmulatsela, jaaka ba dira. (1 Bakor. 11:1) A o ka kgona go atolosa tirelo ya gago ka go dira diura di le 70 ka kgwedi mme ka jalo o direle o le mmulatsela wa ka metlha?
6 Bakaulengwe le bokgaitsadi ba ba fetang 17 000 jaanong ba direla kwa diofising tsa makala le kwa magaeng a Bethele mo lefatsheng lotlhe. Tirelo ya Rona ya Bogosi ya March 1995 e ne ya tlotla ka se se tlhokegang gore o ikwadisetse tirelo e e ntseng jalo. Ke ka ntlha yang fa o sa bale tsenyeletso eo mme o bone fa o se mongwe yo o ka nnang a tshwanelegela tshiamelo e e tlhomologileng eo ya tirelo ya Bethele?
7 Direla Kwa go Nang le Tlhokego e Kgolwane Gone: A o nna mo tshimong e e berekiwang gantsi thata kana koo go nang le bakaulengwe ba bantsi ba lo thusanang morwalo ono? A o setse o kile wa akanya ka go atolosa bodiredi jwa gago ka go fudugela kwa go nang le tlhokego e kgolwane gone? Gongwe o ka fudugela kwa motsaneng o o fa gaufi kwa go tlhokegang badiri ba ba oketsegileng gone. (Math. 9:37, 38) O se ke wa potlakela go dira tshwetso. Go tlhokega gore o akanyetse seno ka thapelo. (Luke 14:28-30) Buisana le bagolwane le molebedi wa potologo ka boemo jwa gago. Ba ka go bontsha mabaka a gore a go tla bo go le botlhale go fuduga gone jaanong kana go ipaakanyetsa go dira jalo mo nakong e e tlang. Fa o rata go kwalela Mokgatlho gore o bone kakantsho ya gore ke kae kwa o ka fudugelang teng, lekwalo la gago le tshwanetse la romelwa mmogo le lekwalo le le saenilweng ke Komiti ya Tirelo ya Phuthego ya lona.
8 Tokafatsa Tirelo ya Gago: E kete rotlhe re ka nna le seabe ka botlalo mo bodireding ka go tokafatsa tirelo ya rona ya tshimo. A o nna le seabe mo dikarolong tsotlhe tsa tiro eno, go akaretsa le go neela bosupi ka ntlo le ntlo le jo e seng jwa tlwaelo mmogo le go dira maeto a go boela le dithuto tsa Baebele? Fa o tshwara thuto, a o ka tokafatsa bokgoni jwa gago jwa go ruta? Go ka nna botlhale gore o tlhatlhobe tsenyeletso ya Tirelo ya Rona ya Bogosi ya June 1996 go bona dikakantsho tse o ka di dirisang gore o rotloetse diithuti tsa gago go ineela le go kolobediwa.
9 Kgaolo ya 9 ya Re Rulaganyeditswe go Swetsa Bodihedi jwa Rona e bua mo gontsi ka ditsela tse di ka dirisiwang go atolosa le go tokafatsa bodiredi jwa rona. Eleruri rotlhe re tshwanetse go eletsa go dira sotlhe se re ka se kgonang mo tirelong ya Modimo. Ke ka ntlha yang fa o sa akanyetse mekgele ya gago ya semoya ka tsela e e masisi? Dira jaaka 1 Timotheo 4:15 e akantsha: “Tlhatlhanya ka dilo tseno; nwelelela mo go tsone, gore botswelelopele jwa gago bo bonatshege mo bathong botlhe.”